गुथितय्गु राष्ट्रिय सम्मेलनया खँय्

गबले गबले थःपिंत ततःधंगु समस्या वइ, अबले अबले झी थवंथः मिले नं जुइसःपिं जुयाच्वन । पृथ्वीनारायण शाहं नेपाःगाः त्याकेगु झ्वलय् ख्वपय् आक्रमण यायेगु तरखर यानाच्वंगु इलय् ख्वपया फुक्कं धइथें गुथिगाना दतात्रय चोकय् मुनाः शरण वःपिंत मरण यायेगु मखु, बरु गोर्खाया जुजु पृथ्वीनारायण शाहलिसे थः त्वाय् खःसां युद्ध हे यायेगु धकाः निर्णय याःगु खः ।

थ्व छगू कथं ख्वपया गुथियारतय्गु अबलेया साहस नं खः । येँय् छलछाम यानाः व यलय् ६ प्रधानतय्सं अःपुक शासन सत्ता पृथ्वीनारायण शाहयात त्वःता बिउगु इलय् नं ख्वप देसय् अथे याये मजिउ, बरु ल्वानाः सिना वनेमाः धइगु खँय् थःपिनि अडान कायम यायेवं
थन स्वन्हु स्वचा तक युद्ध जूगु खः ।

अबलेनिसें सी दत कि नेपाली उखान ‘भाई फुटे गँवार लुटे’ धइथें झी थः थः मिले मजुल वा ल्वानाच्वन धाःसा मेपिंसं जक थन वया लबः काइगु जुयाच्वन । थज्याःगु थीथी कथंया इतिहासं नं क्यं कि झी माल धाःसा थः थः दथुइ मिले नं जुइसःपिं जुयाच्वन ।

गुथि विधेयकं थीथी कथं मोहीयानी हक सुरक्षित मजुइगु, ज्या यानाच्वंपिंत जग्गां बञ्चित याइगु व जग्गा न गुथिया नामय् दइ, न मोहीया नामय् वइ, अले न त उगु गुथिया जग्गा सदुपयोग हे जुयाः झीगु थःगु संस्कृति, परम्परा व जात्रापात्रा बांलाक चले जुइगु हे सम्भावना मदइगु खँय् चिउताः प्वंकुसें थौं नेवाःत छप्पँ छधी जुयाच्वंगु ई खः ।

थ्व तसकं बांलाःगु पक्ष नं खः । नेवाःत दना वःगु कारणं जक थौं दुईतिहाइ बहुमत दुगु सरकार तकं लिचिलेत बाध्य जूगु खः । विदेशं लिहां वयाकथं थः ससलय् फोन यानाः येँ देय्यापिंसं जितः छु धाल धकाः न्यंगु इलय् वयात ‘भाजु ला बेमान खनी’ धाल धकाः लिसः न्वयेवं झी जिलाजं प्रधानमन्त्री केपी ओलीं उगु विधेयेक लित कायेत बाध्य जूवंगु खः ।

अथे खःसां हाकनं हाकनं थुकथं हे अन्यायपूर्वक गुथि विधेयक सदनय् प्रस्ताव यायेफुगु खँ धाःसा आः नं कामय जुयाच्वंगु दु । सदनय् न्हून्हूगु विधयेक पारित यायेत प्रस्ताव याइगु स्वाभाविक खः । थ्व इलय् राष्ट्रिय सभाय् उगु विधेयक पेश याःगु खः । राष्ट्रिय सभा बुद्धिजीवीतय् व थीथी कथंया विज्ञतय् सहलह यायेगु थाय् खः ।

क्रिश्चियनतय्गु राष्ट्रिय सम्मेलन यानाः होली वाइन छ्वाकाः सकल नेपाःमितय्त क्रिश्चियन यायेगु अभियान चले यानाच्वं थें नेवाःत छप्पँ छधी यायेगु आधार धइगु हे गुथि खः । दाफा खः ।

विधेयक ला क्वय्या सदन वा प्रतिनिधिसभा वा सदनय् हे पेश यायेमाःगु खः । तर जनप्रतिनिधिमुलक सभा कथं काइगु प्रतिनिधिसभा वा क्वय्या सदनय् पेश मयासे छक्वलं हे च्वय्या सदनय् पेश यानाः क्वय् हयेगु वा सुटुक्क पास याकेगु षडयन्त्र जक थ्व इलय् याःगु खःला धइगु नं संकेत वःगु दु ।

थ्व गुथि विधेयक दर्ता जूगुया लिउने छुं ई न्ह्यः नेपालय् क्रिश्चियनतय्गु अन्तर्राष्ट्रिय सम्मेलन क्वचाःगु व उगु सम्मेलन क्वचाये धुंकाः प्रधानमन्त्री केपी ओलीयात छगू करोड सिरपाः लःल्हाःगु जक मखु कि वय्कःयात मानार्थ विद्यावारिधिं छाय्पियाः नेपाः क्रिश्चियन देय् यायेत स्वःगु खँ नं स्वापू दयाच्वंगु खने दयावःगु दु ।

अबले सकसितं क्रिश्चियन यायेगु झ्वलय् प्रधानमन्त्रीयात होली वाइन छ्वाकाः पवित्र पादरीया दर्जा बिउथें आः नं होली वाइन छ्यलाः हे परम्परा व संस्कृतियात नष्ट यानाः नेपाः क्रिश्चियन मुलुक यायेत स्वयेगु ज्या जकं थ्व इलय् यायेत तंगु खःला धइगु नं खने दयावःगु खः । उकिं हे नेवाःतय्सं थौं गुथितय्गु राष्ट्रिय सम्मेलन यायेमाःगु खः ।

क्रिश्चियनतय्गु राष्ट्रिय सम्मेलन यानाः होली वाइन छ्वाकाः सकल नेपाःमितय्त क्रिश्चियन यायेगु अभियान चले यानाच्वं थें नेवाःत छप्पँ छधी यायेगु आधार धइगु हे गुथि खः । दाफा खः । छगू इलय् नेपालमण्डल टेलिभिजनं दाफा भजनया राष्ट्रिय सम्मेलन यानाः दाफा म्ये हायेकाः झीगु म्वायेगु व मिले जुयाच्वंगुया मू आधार जुयाच्वंगु दाफायात विकास यायेगु सुरुवात यानाक्वंगु खः ।

आः नं शताब्दी पुरुष सत्यमोहन जोशी थेंज्याःपिं तकं दाफालिसे स्वानाच्वंगु गुथिगानाया राष्ट्रिय सम्मेलन यायेगु पक्षय् दी । थथे स्वयेगु इलय् नेपालय् गुथिपाखें हे जमीन व जग्गाया अस्तित्वयात ल्यंकाः थनया जात्रा पर्व व रहनसहनयात आः तकं निरन्तरता बियाच्वंगु खनेदु ।

झीगु धर्म, संस्कृति व संस्कार ल्यंकेगु खःसा थ्व दाफा भजन खलः, धल्चा गुथि, सी गुथि व परम्परागत रुपं ताः ईनिसें न्ह्याना वयाच्वंगु थीथी कथंया गुथि व गुथिया जग्गा हे ल्यंकेमाःगु खनेदु । उकिया लागिं नं थ्व इलय् जुइत्यंगु गुथितय्गु राष्ट्रिय सम्मेलन पाय्छि हे खः धइगु खनेदु ।

नेवाःतय्गु राष्ट्रिय संगठन नेवाः देय् दबूपाखें नेवाःतय्त समस्या जुइगु इलय् थीथी कथंया राष्ट्रिय सम्मेलन यानाः समस्याया समाधान यायेगु उपाय मालेगु ज्या जुयाच्वंगु दु । नेपाः संघीयता वने धुंकाः थ्व देय्यात गुकथं संघ राज्यय् हयेगु धइगु खँय् नं नेवाःतय् धारणाय् एकरुपता हयेगु नेवाः देय् दबूपाखें राष्ट्रिय सम्मेलन याःगु खः ।

यलय् अबले नेवाः देय् दबुलिं याःगु राष्ट्रिय सम्मेलनं नेपालमण्डल लागा वा स्वनिगः लगायत स्वनिगः जःखःया हालया झिंस्वंगू जिल्लायात नालाः नेपालमण्डल लागा नेवाःतय् राज्य जुइमाःगु माग न्ह्यब्वःगु खः । तर आः तक नं उकिया स्पष्ट किटान धाःसा जुइफुगु मदुनि । ३ नम्बर प्रदेशयात नेपालमण्डल लागा वा नेवाः ताम्सालिङ लागा छु नां तयेगु धइगु खँय् विवाद ज्यंकेफुगु मदुनि ।

प्रदेश ३ नेवाः जातिं ताः ई न्ह्यवंनिसें बसोबास यानाच्वंगु ऐतिहासिक थाय्बाय् जूगु ल्याखं आः थ्व गुथितय्गु राष्ट्रिय सम्मेलन जुइगु इलय् नं थ्व खँ वइतिनि ।नेवाः देय् दबूया जातीय परिषद्या बैठकं थथे नेवाःतय् राष्ट्रिय संगठन नेवाः देय् दबूपाखें गुथितय्गु राष्ट्रिय सम्मेलन यायेगु क्वःछिउगु खः ।

गुथि धइगु पुलांगु कथंया सहकारी खः । सहकारीया सुरुवात नेपालय् चितवनया बखानपुरय् च्वंगु छगू सहकारी चालेवं २०१३ सालय् जक सुरु
जूगु तायेकी । तर नेपालय् गुथिया सुरु वा गोष्ठीकाया सुरु धाःसा झिंनिसः दँ पुलां जुइधुंकूगु रेकर्ड दु ।

थथे न्हापा न्हापा थ्व जात्रा पर्व व सामुहिक ज्या न्ह्यागु हे यायेमाःसां गोष्ठी, गुथि वा गुथिपाखें हे जूगु जुयाः नं पंचायतीकाल व पृथ्वीनारायण शाहं नेपाः कब्जा याये धुंकाः लिपांनिसें हे थुकियात वाय्त्यः फ्वाय्त्यःया व्यवहार यानाच्वंगु खः धइगु सीदु । उकिं नं थ्व इलय् जुइत्यंगु गुथितय्गु राष्ट्रिय सम्मेलनया थःगु हे महत्व दु ।

सम्बन्धित बुखँ

LEAVE YOUR COMMENTS