निकास पने मजिल
संघीय सरकार अस्थिर जुइवं आः प्रदेशया सरकारय् नं अस्थिरता ब्वलनेगु शुरु जूगु दु। प्रधानमन्त्रीं वंगु पुस ५ गते ल्ह्वंगु पलाःयात सर्वोच्च अदालतं करेक्सन याना बीवं नेपाःया राजनीति छगू कथं अन्यौलय् लानाच्वंगु थौंया अवस्था खः । थौंया अवस्थाय् वर्तमान सरकारया स्थिति छु खः धइगु न्ह्यसः छखे ब्वलनाच्वंगु दुसा मेखे विपक्षी राजनीतिक पार्टीतय्सं गज्याःगु लँपु ज्वनी धइगु स्पष्ट जुइ फयाच्वंगु मदु ।
थौं वयाः छखे नेपाल कम्युनिष्ट पार्टी एमाले दुने निगू गुटया दथुइ लडाईं जुयाच्वंगु दुसा मेखे संकटय् लानाच्वंगु राजनीतियात न्ह्यःने यंकेगु निंतिं विपक्षी राजनीतिक पार्टीतय्सं नं खःकथं निर्णय याये फयाच्वंगु मदु। विशेषतः वर्तमान राजनीतिइ नेपाली कांग्रेस निर्णायक शक्ति खः । तर कांग्रेसया हे छगू पक्ष वर्तमान सरकारं घोषणा याःगु चुनावय् वनेमाःगु पक्षय् च्वनाच्वंगु दुसा मेगु पक्ष दकलय् न्हापां प्रधानमन्त्री केपी ओलीं ल्ह्वंगु प्रतिगामी पलाःयात भिंकाः जक निर्वाचनय् वनेमाः धायेगु यानाच्वंगु दु ।
उकथं हे मेगु छगू निर्णायक शक्ति खः, माओवादी केन्द्र । माओवादी केन्द्रं प्रतिगमनयात भिंकाः न्हूगु सरकार गठन यायेमाःगु खँ धासें उकिया पहल यायेत नेपाली कांग्रेसया नेता शेरबहादुर देउवायात इनाप यायेधुंकूगु दुसा जनता समाजवादी पार्टीं नं प्रतिगमन भिंकेगु निंतिं आः कांग्रेसं हे नेतृत्व यायेमाः धयाच्वंगु अवस्था खः । अथे ला जसपा दुने सरकार गठन यायेगु वा वर्तमान सरकारयात हे निरन्तरता बीगु धइगु बारे स्पष्ट जुइ फयाच्वंगु मदु। पूर्व राजपाया नेतातय्सं आः हे नं वर्तमान प्रधानमन्त्रीं थःपिनिगु माग पूवंकीगु खःसा थ्वहे सरकारयात समर्थन यानाः वनेमाः धायेगु यानाच्वंगु दु। मेखे पार्टीया अध्यक्ष व संघीय परिषद्या अध्यक्षं धाःसा प्रतिगमनकारी शक्तिलिसे गुगुं नं कथं सत्ता गठबन्धन याये फइ मखु धयाच्वंगु अवस्था दु ।
थुकथं स्वयेबलय् वर्तमान अवस्थाय् नेपाःया राजनीति पूर्ण रुपं अन्यौलय् लानाच्वंगु दु। तर थ्व अन्यौल चीकेगु निंतिं राजनीतिक पार्टी दुने गुगु बहस व सहलह जुइमाःगु खः व धाःसा जुयाच्वंगु मदु। आःया अवस्थायात स्वयेगु खःसा छुं छगू राजनीतिक पार्टीं मेगु राजनीतिक पार्टीयात विश्वास याये मफयाच्वंगु मदु। राजनीतिक पार्टीया नेतातय् थ्व कमजोरीया कारणं जुइगु घाटा फये मालीपिं धाःसा नेपाली जनता खः ।
छुं नं ज्या सही इलय् मजुल धाःसा उकिं राजनीतिक पार्टी जक मखु देय् व जनतायात तकं तःधंगु संकटय् लाकी । आः नं देय्या राजनीति अन्यौलय् लानाच्वंगु इलय् राजनीतिक पार्टीतय्सं निर्णय यायेमाःगु अवस्था खः । तर पार्टीतय्सं वर्तमान सरकारया बारे निर्णय याये मफयेवं आः छु जुइ धइगु न्ह्यसः ब्वलनाच्वंगु दु । गबलय् तक राजनीतिक रुपं सही निर्णय जुइ मखु उकिया लिच्वः देय्या फुक्कं क्षेत्रय् लायेफु। तर राजनीतिक पार्टीतय्सं थ्व खँय् हेक्का तयाच्वंगु मदु। यदि ताः ई तक राजनीति थुकथं हे न्ह्यानाच्वन खःसा देय्या उद्योगधन्दांनिसें कयाः प्रगतिया फुक्क हे क्षेत्र थुकिया संक्रमणय् लाइगु खतरा ब्वलनी । तर दुर्भाग्य, राजनीतिक पार्टीतय्सं आः तक नं थ्व खँय् ध्यान बियाच्वंगु मदुनि ।
कांग्रेस सभापति देउवां थ्व खँय् ध्यान मबियाच्वंगु कारण गनं वय्कः नं संघीय व्यवस्थायात थुकथं हे भद्रगोल याना तयेगु पक्षय् जकं वनाच्वंगु मखुला ?
छुं नं निर्णय इलय् मजुल धाःसा उकिया उपादेयता लिपा दइ मखु। आः सरकार गठन यायेगु निंतिं माओवादी केन्द्र व जसपां कांग्रेस सभापति शेरबहादुर देउवायात इनाप यायेधुंकूगु अवस्थाय् नं देउवां निर्णय याये फयाच्वंगु मदु, उकिया अदृश्य कारण छु खः धकाः जनतां न्ह्यसः तयाच्वंगु दु। थौंया इलय् गुलि फु उलि याकनं ओली सरकारयात विदा बियाः न्हूगु सरकार गठन यायेगु जक मखु संघीयतायात क्वातुका यंकेगु दायित्व समेत राजनीतिक पार्टीया खः । तर कांग्रेस सभापति देउवां थ्व खँय् ध्यान मबियाच्वंगु कारण गनं वय्कः नं संघीय व्यवस्थायात थुकथं हे भद्रगोल याना तयेगु पक्षय् जकं वनाच्वंगु मखुला धइगु स्वाभाविक न्ह्यसः ब्वलनाच्वंगु दु ।
आः हे नं स्थानीय निकायया प्रतिनिधितय्सं संघीय सरकार व प्रदेश सरकारया कारणं यानाः थःपिसं गुलि सोचे यानागु खः उकथं ज्या याये मफुगु खँ धायेगु यानाच्वंगु दु। उलि जक मखु, स्थानीय सरकारं न्ह्याकाच्वंगु विकास निर्माणया ज्यायात व्यवस्थापन यायेगु लागिं आवश्यककाननुत दयेकेगु ज्या तकं संघीय व प्रदेशया सरकारं यानाच्वंगु मदु धइगु द्वपं स्थानीय सरकारया दु ।
थुकथं स्वयेगु खःसा आः संघीय सरकार जक मखु प्रदेश सरकारया नापनापं स्थानीय सरकारत तकं राजनीतिक अन्यौलया चक्रब्युह दुने फँसे जुजुं वनाच्वंगु संकेत वःगु दु। जनतालिसे प्रत्यक्ष स्वापू तयाः ज्या याये माःगु स्थानीय तह तकं केन्द्रीय राजनीतिया थ्व अन्यौलय् लाः वन धाःसा थुकिं ब्वलंकीगु लिच्वः कल्पनातीत हे जू वनीगु निश्चित दु। थज्याःगु जटिल जुजुं वनाच्वंगु राजनीतिक अन्यौलं पिहां वयेगु खःसां नं आः तत्काल यायेमाःगु ज्या धइगु न्हूगु सरकारया गठन हे खः । उकिया निंतिं कांग्रेस सभापति थम्हं थःगु नेतृत्वय् सरकार दयेकेगु वा मेगु राजनीतिक पार्टीयात समर्थन यानाः सरकार दयेके बीगु खः, निर्णय वयेमाल । उकिया निंतिं जसपा नेता डा. बाबुराम भट्टराईं यदि कांग्रेसं मफुसा थम्हं सरकार दयेके स्पष्ट धयादीधुंकूगु दु ।
अतः थज्याःगु इलय् यदि कांग्रेसं तत्काल निर्णय याये मफुत धाःसा देय् संवैधानिक अराजक अवस्थाय् दुहां वनेफु। अज्याःगु अवस्था वल धाःसा उकिया जिम्मा नं कांग्रेसं हे काये माली । उकिं प्रतिगमनया लँपुइ न्ह्याः वनाच्वंम्ह वर्तमान प्रधानमन्त्रीयात गुलि फु उलि याकनं बिदा बीमाःगु अवस्था दु। राजनीतिक नेतातय्सं पाय्छिगु इलय् राजनीतिक निर्णय मयायेगु खःसा उकिया लिच्वः देय् व जनतायात लाइगु स्वाभाविक खः । थज्याःगु इलय् थःगु राजनीतिक पार्टीयात जुइगु लबः व द्यापंया ल्याःचाः स्वयाच्वनेगु खःसा थुकिं कालान्तरय् वनाः राजनीतिक पार्टीतय्गु निर्णय क्षमताय् संगीन न्ह्यसः ब्वलनी । मखु थःगु राजनीतिक द्याःचाःया जक बिचाः यायेगु खःसा जनतां उकियात कयाः गुकथं मूल्यांकन याइ धइगु बारे राजनीतिक पार्टीतय्सं मस्यूगु पक्का नं मखु। अथे जुयाः देय्या निंतिं नं पार्टीतय्सं इलय् हे राजनीतिक निर्णय याये माःगु दायित्व सकल नेताया ब्वहलय् वयाच्वंगु दु ।
LEAVE YOUR COMMENTS