इतुम्बहाःया म्युजियम दाताया कारणं विवाद

येँ (नेपालभाषा टाइम्स)÷थनया ऐतिहासिक इतुम्बहालय् दयेकेत्यंगु म्युजियम उलेज्या न्ह्यः विवादय् लाःगु दु । उगु म्युजियम दयेकेगु लागिं अमेरिकाया न्यूयोर्कय् च्वंगु रुबिन म्युजियम अफ आर्टं २० हजार डलर दां बीत्यंगु खः ।

तर उगु म्युजियम संसारया थीथी देशं खुया हःगु, लुटे याना हःगु पुरातात्विक ज्वलं न्यानाः थःथाय् ब्वइम्ह जूगुलिं वयाके ध्यबा काये मजिउ धासें थनया थीथी सम्पदाविद्तय्सं सः तया हःगु दु ।

इतुम्बहालं खुया यंकूगु छगू ऐतिहासिक ज्वलं थ्वहे म्युजियमं दछि न्ह्यः लित बिउगु खः । तर इतुम्बहाः संरक्षण समितिं धाःसा इतुम्बहालय् वाय्त्यः फ्वाय्त्यः जुइक वांछ्वया तःगु वस्तुत सुरक्षाया लागिं छथासं तयाः म्युजियम दयेकेत्यनागु धासें उकी विरोध मयायेत इनाप याःगु दु ।