जुम्लाय् ७० प्रतिशत मस्तय् बालविवाह

जुम्ला- जुम्लाय् मचाबलय् हे इहिपा याइपिनि ल्याः झन् झन् अप्वया वनाच्वंगु लूगु दु । नकतिनि सार्वजनिक जूगु छगू तथ्यांक कथं जुम्लाया ७० प्रतिशत मस्तय्सं उमेर मगाःनिवं हे इहिपा यानाच्वंगु दु ।
जिल्लाय् बालविवाह पनेगु लागिं दर्जनौं एनजीओ व आईएनजीओत सक्रिय जुयाच्वंसां नं बालविवाह धाःसा म्हो मजूगु अझ विडम्बनाया खँ जुयाच्वंगु दु । थन सचेतना अभियान चले यायेगु धकाः सक्रिय जुयाच्वंगु छुं एनजीओतय्सं ला थुकिया हे लागिं धकाः तःधंगु हे रकमया धनराशी समेत खर्च यानाच्वंगु दु । थुकिया लागिं उमिसं छेँय् छेँय् हे वनाः धाः वनेगु, सतक नाटक क्यनेगु थेंज्याःगु ज्याझ्वःत यानाच्वंगु खः । प्लान नेपालया आर्थिक ग्वाहालि कयाः आत्मसम्मानका लागि सहकार्य क्याड नेपालं जिल्लाया स्वंगू स्थानीय तहलय् बालविवाह पनेत ज्याझ्वःत यानाच्वंगु दुसा अन हे अप्वः बालविवाह जुयाच्वंगु तथ्यांक पिहां वःगु दु ।
वि.सं. २०६८ या जनगणना कथं जुम्लाया कूल जनसंख्या एक लाख १८ हजार दु । उकी ५५ हजार ४४२ मस्त दु । उकी मध्ये ७० प्रतिशत मस्तय्गु इहिपा उमेर मगाःनिवं जुयाच्वंगु तथ्यांक पिहां वःगु दु ।
क्याड नेपालया कथं कर्णाली प्रदेशय् दकलय् कम डोल्पाय् ४९ प्रतिशत व दकलय् अप्वः रुकुमपश्चिमय् ७१ प्रतिशत बालविवाह जुइगु जुयाच्वंगु दु । जुम्लाय् ७० प्रतिशत बालविवाह जुयाच्वंगु दु । हुम्लाय् ५२, मुगुइ ५७, कालीकोटय् ५९, जाजरकोटय् ६५, सुर्खेतय् ६८, सल्यानय् ६९ र दैलेखय् ७० प्रतिशत बालविवाह जुयाच्वंगु खँ क्याडया परियोजना अधिकृत जयलक्ष्मी चौलागाईं कनादीगु दु ।
गामय् बालविवाह जुयाच्वंसां उजुरीया रुपय् मुद्दा मवःगु खँ जिल्ला प्रहरी कार्यालय जुम्लाया प्रहरी नायब उपरीक्षक दानबहादुर थापां कनादीगु दु । बालविवाह पनेत जनप्रतिनिधि व स्थानीय सरकार सक्रिय मजूगुलिं बालविवाह पनेगु ज्या ताःमलाःगु खँ धाःगु दु । (रासस)

सम्बन्धित बुखँ

LEAVE YOUR COMMENTS