जि संघीयता विरोधी मखु : प्रधानमन्त्री
प्रदेश कमजोर याःगुलिं हिंसा अप्वःगु द्वपं
येँ (नेपालभाषा टाइम्स) – प्रधानमन्त्री बालेन्द्र शाहं थः संघीयता विरोधी मखु धयादीगु दु । सुनसरीइ जूगु घटना लिपा ब्वलंगु परिस्थितियात कयाः मधेस केन्द्रीत दलतय्लिसे सहलहया झ्वलय् प्रधानमन्त्री शाहं थ्व खँ धयादीगु खः ।
बैठकय् सहभागी जुयादीम्ह राष्ट्रिय मुक्ति पार्टी नेपालया नायः राजेन्द्र महतों प्रधानमन्त्री शाहं थःत संघीयता विरोधीकथं मकायेत इनाप यासें थःत म्हगसय् नं संघीयता विरोधी धकाः मथुइकेत इनाप यानादीगु खँ कनादीगु दु । सहलहया झ्वलय् नेतातय्सं सरकारं प्रदेशयात कमजोर यानाच्वंगु व संघीयताया विरोधय् वनाच्वंगुलिं मधेसय् हिंसा अप्वयाच्वंगु खँ धाःगु खः । प्रदेश बल्लाःगु खःसा प्रदेश स्तरं हे थज्याःगु हिंसा नियन्त्रण यायेफइगु खँ धाःगु इलय् प्रधानमन्त्री शाहं थः संघीयता विरोधी मखुगु स्पष्ट याःगु खः । थ्व झ्वलय् वय्कलं थः दुथ्याःगु राष्ट्रिय स्वतन्त्र पार्टी नं संघीयता विरोधी मखु धयादीगु खः ।
थ्व झ्वलय् प्रधानमन्त्री शाहं न्हापा थम्हं ‘बलगर’ संघीयता धयागुया अर्थ थुकियात अझ बल्लाकेगु व अधिकार सम्पन्न दयेकेगु धयागु, थुकिया निंतिं संघीयताया संरचनागत हिउपाः व अधिकारया बाँडफाँटय् बः बियागु नं स्पष्ट यानादीगु खः । बैठकय् सहभागी नेतातय्सं सरकार सुनसरीइ जूगु घटनाप्रति गम्भीर मजूगुलिं दंगा तच्वया वंगु धासें सुरक्षा संयन्त्रं बांलाक ज्या मयाःगु व गृहमन्त्री नं घटनास्थलय् लिबाक जक थ्यंगु धासें आलोचना याःगु खः ।
प्रधानमन्त्रीं मधेशया नेता व सांसदतय्त नापलात
सुनसरीइ मनूतय् ज्यान वंक साम्प्रदायिक घटना जूसां सुम्क च्वनाच्वंम्ह प्रधानमन्त्री बालेन शाहं म्हिगः मधेश केन्द्रीत दलया नेतातलिसें मधेसया सांसदतय्त नापलाःगु दु । सुनसरीया घटना न्यनावनाः न्यागू जिल्लाय् तक कर्फ्रयु तयेमाःगु अवस्थाय् वयेधुंकाः बल्ल सक्रिय जूम्ह प्रधानमन्त्रीं म्हिगः सिंहदरवारय् मधेश केन्द्रीत दलया नेतात व सांसदतय्त नापलाःगु खः ।
म्हिगः प्रधानमन्त्रीं शाहं मधेश केन्द्रीत दलया नेतात राजेन्द्र महतो, महन्थ ठाकुर, सीके राउत, लालबाबु राउत, समिम मियाँ अन्सारी, अमरेशकुमार सिंह, शरतसिंह भण्डारी, जयकान्त राउत, प्रभु शाह लगायतयालिसे सहलह यानादीगु खः । सहलह लिपा संचारकर्मीतलिसे खँल्हासें राष्ट्रिय मुक्ति पार्टीया नायः राजेन्द्र महतों मधेशया थीथी जिल्लाय् खनेदुगु समस्या ज्यंकेगु निंतिं थःपिंसं थीथी सुझाव बियागु खँ कनादिसें सरकारं मधेसलिसे यानाच्वंगु सम्झौता कार्यान्वयन यायेमाःगु सुझाव बियागु खँ धयादिल ।
प्रधानमन्त्रीलिसेया सहलह सकारात्मक जूगु धयादिसें जनमत पार्टीया नायः सिके राउतं थःपिंसं थज्याःगु घटनायात सामान्य जक मतायेकेत इनाप यासें थम्हं हरेक जिल्लाय् अन्तरधार्मिक काउन्सिल गठन यायेत सुझाव बियागु धयादिल । वय्कलं हरेक जिल्लाय् थीथी धर्मया गुरु व धार्मिक अभियन्तात दुथ्याकाः अन्तरधार्मिक काउन्सिल गठन यायेगु व उकिया बैठक लय् छक्वः अनिवार्यकथं च्वनेगु प्रस्ताव यानागु खँ कनादिल ।
म्हिगः हे प्रधानमन्त्री शाहं तराई मधेसया थीथी निर्वाचन क्षेत्रं त्यानावःपिं थःगु हे पार्टीया सांसदतय्त नं नापलानादीगु खः । उगु सहलहय् सांसदतय्सं थःपिनिगु निर्वाचन क्षेत्रय् थप हिंसा मजुइकेया निंतिं सरोकारवालातलिसे संवाद यायेगु, सामाजिक सञ्जालय् अफवाह न्यंकीपिं, सामाजिक सद्भाव स्यंकेत स्वइपिं, हिंसा न्यंकेत स्वइपिंत सुक्ष्म निगरानी तयेगु निंतिं थःपिंसं नं भूमिका म्हितेगु प्रतिबद्धता प्वंकागु खँ धाःगु दु । थ्व झ्वलय् सांसदतय्सं सीमा नाकाय्कडाइ यायेत, अय्लाः मीगुलिइ प्रतिबन्ध तयेत, कर्फ्रयुयात बुलुहुँ चीकायंकेत व जेनजीतय् दथुइ सामाजिक सद्भाव सम्बन्धी जनचेतना न्यंकेगु निंतिं सरकारं भूमिका म्हितेमाःगु माग याःगु खः ।
LEAVE YOUR COMMENTS