जनगायक रामकृष्ण दुवालयात हन

किपू (नेपालभाषा टाइम्स)- ईलोहं प्रकाशनया ग्वसालय् जनगायक रामकृष्ण दुवालयात हंगु दु । थुकिया लिसें वय्कःया कृति ‘जिगु देय् जित यः’ म्येया म्यूजिक भिडियो नं सार्वजनिक याःगु दु । ईलोहं प्रकाशनया प्रबन्ध निर्देशक नरेशवीर शाक्यया सभापतित्वय् जूगु ज्याझ्वलय् बागमति प्रदेशया सांसद शैलेन्द्रमान बज्राचार्य, किपू नगरपालिकाया पुलांम्ह मेयर रमेश महर्जन, किपू नगरपालिकाया वडा ८ या अध्यक्ष सानुमैंया महर्जन पाहांकथं झायादीगु खः ।

सम्मानया झ्वलय् जनगायक दुवालयात वडा अध्यक्ष महर्जनं खादां क्वयेकाः, पुलांम्ह मेयर रमेश महर्जनं दोसल्लां न्ययेकाः सांसद बज्राचार्यं सम्मानपत्र लःल्हानादीगु खःसा प्रबन्ध निर्देशक शाक्यं २५,०००।– तका नगद लःल्हानादीगु खः ।

ज्याझ्वलय् जनगायक रामकृष्ण दुवालया पेजथ्री विशेषांक व स्केच पोष्टर, रामकृष्ण दुवालया जीवनी दुथ्याःगु ईलोहं प्रकाशनं पिथना वयाच्वंगु रञ्जना आखःया लय्पौ व ‘जिगु देय् जित यः’ बोलया म्यूजिक भिडियोया प्रिमियर नं जूगु खः ।

जिगु देय् जितः यः बोलया म्ये किपूया रानी शोभा महर्जनं सः बियातःगु खःसा जीवित् जल्मीं न्हूगु संगीत संयोजन यानातःगु खः । भिडियोय् नेपालभाषाया लोकंह्वाःम्ह कलाकार हिसिला महर्जनं अभिनय यानातःगु दु । म्ये पेजथ्री बाःछिपौया सम्पादक दर्शनवीर शाक्यं निर्देशन याःगु खः ।

किपूया जोशीननि हेरिटेज होम्सय् जूगु ज्याझ्वलय् लोक कवि राजभाइ जकःमिं रामकृष्ण दुवालबारे चिनाखँ न्यंकूगु खःसा स्केच आर्टिस्ट अर्पिता शाक्यं स्केच यानादीगु पोष्टर नं लःल्हाःगु खः ।