नेवाः पत्रकारतय्त सिरपाः

येँ  – नेवाः पत्रकार राष्ट्रिय दबूपाखें नेवाः पत्रकारतय् स्वास्थ्य ग्वाहालिया लागिं१२ लाख तकाया अक्षय कोष सुरु याःगु दु । पत्रकार दबूया खुक्वःगु दँमुँज्याया झ्वलय् शनिवाः ‘नेवाः पत्रकार कल्याण अक्षय कोष’ या घोषणा याःगु खः । उकिया नितिं येँ मनपापाखें खुगू लाख व मेपिं दातापिंपाखें खुगू लाख तका लःल्हाःगु खः ।

उगु हे ज्याझ्वलय् जलस्येँ ल्वचं मफयाच्वंम्ह फोटो पत्रकार आशाकाजी महर्जनयात छगू लाख व स्वीन्याद्वः तका नं लःल्हाःगु खः । नेवाः पत्रकार राष्ट्रिय दबुलिं आः विश्वया हे नेवाः पत्रकारतय्त संगठित याना वनीगु जूगु दु । पत्रकार दबूया न्हूगु न्हूगु विधानय् विश्वया नेवाः पत्रकारतय्त संगठित यायेगु नापं संघीय संरचना कथं न्ह्याः वनेगु व्यवस्था याना तःगु दु ।

विधान अधिवेशनय् मूछ्याञ्जे सुनिल महर्जनं पेश यानादीगु संघीय संरचना कथंया मस्यौदा विधान पारित याःगु खः । येँ मनपाया मेयर विद्यासुन्दर शाक्य मूपाहां कथं झाःगु उगु ज्याझ्वलय् नेवाः पत्रकारपिं रुकमणि श्रेष्ठयात वाङ्मय शताब्दीपुरुष डा. सत्यमोहन जोशी सिरपाः, राजु शाक्ययात भिक्षु कुमार काश्यप स्मृति पत्रकारिता सिरपाः, ईश्वर कुमार जोशीयात ज्ञानदेवी स्मृति पत्रकारिता सिरपाःव नातिकाजि महर्जनयात बाबुराजा ज्यापु फोटो पत्रकारिता सिरपाः लःल्हाःगु खः ।

नेवाः पत्रकार राष्ट्रिय दबूया नायः श्रीकृष्ण महर्जनया सभापतित्वय् जूगु उगु ज्याझ्वलय् ३ नम्बर प्रदेशया सांसद राजेश शाक्य, प्रेस काउन्सिल नेपालया कावा अध्यक्ष किशोर श्रेष्ठ, नेपाल आदिवासी जनजाति पत्रकार महासंघया अध्यक्ष दण्ड गुरुङपिंसं नं न्ववानादीगु खः ।
ज्याझ्वलय् दांभरि सुरेन्द्रभक्त श्रेष्ठं अक्षय कोषया नितिं आर्थिक ग्वाहालि बारे जानकारी बियादीगु खः ।

सम्बन्धित बुखँ

LEAVE YOUR COMMENTS