ब्लोदानं २६ क्वःगु स्थापना दिवस
येँ – ब्लड डोनर्स एशोसियसन नेपाल (ब्लोदानं) थःगु २६ क्वःगु स्थापना दिवसलिसें प्यक्वःगु राष्ट्रिय रक्तदाता दिवस–२०७५ छगू ज्याझ्वः यासें हंगु दु । ब्लोदानया केन्द्रीय अध्यक्ष ई. सानुबाबु प्रजापतिया सभापतित्वय् जूगु ज्याझ्वः येँ महानगरपालिकाया उपप्रमुख हरिप्रभा खड्गी श्रेष्ठया प्रमुख आतिथ्यताय् जूगु खः ।
ज्याझ्वःया उलेज्या यासें येँ मनपा उपप्रमुख श्रेष्ठं हिदान ज्याझ्वलय् मिसातय् सहभागिता म्हो जुयाच्वंगु अवस्थाय् मिसातय् सहभागिता अप्वयेकेत संस्था सक्रिय रुपं न्ह्यचिलेमाःगु खँय् बः बिसें संस्थां याना वयाच्वंगु ज्याझ्वःयात कयाः च्वछायादिल ।
ज्याझ्वलय् पाहांकथं झायादीम्ह संस्थाया सल्लाहकार भाष्करराज राजकर्णिकारं स्वयमसेवी हिदानया क्षेत्रय् ब्लोदानं आपालं च्वछायेबहगु ज्या याना वयाच्वंसां प्रचारप्रसारया म्होतिं यानाः संस्था व वं याना वयाच्वंगु ज्याया जानकारी यक्वसित दयाच्वंगु मदु धयादिल ।
अथे हे मेम्ह वरिष्ठ सल्लाहकार सूर्यकुमारी श्रेष्ठं स्वंगू दशक न्ह्यवंनिसें स्वयमसेवी हिदानया क्षेत्रय् लगे जुयाच्वंगु संस्थायात हाल निर्माण जुयाच्वंगु रक्तसंचार सेवा केन्द्रया भवनय् ब्लोदानया कार्य सम्पदानया निंतिं आवश्यक थाय् उपलब्ध याकेमाःगु खँय् बः बियादिल ।
सभापतिया थासं संस्थाया केन्द्रीय नायः ई. प्रजापतिं ब्लोदान संस्था स्थापना यायेमाःगुया औचित्य, संस्थाया गतिविधि नापं राष्ट्रिय रक्तदाता दिवसया महत्वयात कयाः कुलादीगु खः । लिसें वय्कलं विना शोधभर्ना ल्वगियात सहजरुपं हि उपलब्ध याकेगु वातावरण दयेका यंकेगु निंतिं राष्ट्रिय रक्त अभियानय् सरोकारवाला निकाय व व्यक्तिलिसे सहकार्य याना वनेमाःगु खँय् बः बियादिल ।
ब्लोदानया वरिष्ठ सल्लाहकारलिसें केन्द्रीय रक्तसंचार सेवाया पुलांम्ह जनसम्पर्क अधिकृत श्रेष्ठं कोषया निंतिं न्यय्द्वः तका ग्वाहालि यानादीगु खःसा कोषय् ग्वाहालि यानादीपिं व्यक्ति व संघसंस्थायात लुमन्ति चिं नं लःल्हाःगु खः । नापं हरेक वालय् हिदान ज्याझ्वः संचालन यायेगु सम्बन्धय् ब्लोदान व येँ जिल्ला सहकारी संघ दथुइ छगू सम्झौता नं याःगु खः ।
ज्याझ्वलय् पाहांकथं केन्द्रीय रक्तसंचार सेवाया निर्देशक डा. मनिता राजकर्णिकार, वरिष्ठ हास्य कलाकार सन्तोष पन्त, वरिष्ठ सल्लाहकारपिं सुभाष गोयल, लोकनारायण सुवेदी, विदुर खड्का, सल्लाहकारपिं ललितबहादुर महर्जन, ज्ञानुराजा महर्जन, रमेशध्वज बस्नेत, शिव मन्दिल श्रेष्ठ, राजेन्द्रकुमार श्रेष्ठ, राजेश श्रेष्ठ, भारती कसाः व संजिव खनाल नापं काठमाडौं जिल्ला बचत तथा ऋण सहकारी संघया नायः दिपक पनेरु, नेपाल साइक्लिङ्ग एशोसिएशनया नायः छिमी गुरुङ्ग, फ्रेण्डस् अफ आरएच नेगेटिभ ब्लड ग्रुपया नायः जीवन बस्नेत तथा कलाकार श्रीकृष्ण सिंखडा झायादीगु खः ।
LEAVE YOUR COMMENTS