ने. सं. ११४६ दिल्लागा पारू -

सम्यक महादानया निंतिं येँ मनपाया बजेट

येँ (नेपालभाषा टाइम्स) – येँ महानगरपालिकाया कार्यवाहक मेयर सुनिता डंगोलं वइगु माघ १ गते न्यायेकीगु सम्यक महादानया निंतिं महानगरपालिकां बजेट विनियोजना यानागु जानकारी बियादीगु दु । म्हिगः येँ मनपा २७ वडाया ग्वसालय् माःबतिइ जूगु पञ्चदान उलेज्या ज्याझ्वलय् न्ववायेगु झ्वलय् वय्कलंं उगु जानकारी बियादीगु खः ।

वय्कलं येँ मनपां बजेटया व्यवस्था यायेधुनागुलिं आः सम्यक महादानया ज्याझ्वःया ग्वसाः ग्वयेगु दायित्व समुदायया जूगु धासें धयादिल, ‘छिकपिंसं हस्ते धयादिसें येँ मनपा हाइसे धायेत न्ह्याबलें तयार दु । झीगु थ्व सांस्कृतिक सम्पदायात ल्यंकेत ग्वाहालि यायेत न्ह्याबलें तयार दु ।’

वय्कलं वंगु नीप्यदँ न्ह्यवंनिसें सम्यक महादान मजुयाच्वंगुलिइ थुगुसी यायेगु निंतिं समुदाययात इनाप यासें धयादिल, ‘वंगु नीप्यदँ न्ह्यवंनिसें सम्यक महादान जूगु मदुनि । थ्व इलय् मयासे गबलय् यायेगु ? आः वइगु माघ १ गते तःजिक सम्यक महादान यानाः झीसं न्हू पुस्तायात स्यनेमाःगु दु । पुस्तान्तरण यायेमाःगु दु । यदि थुकथं मयाना वनधाःसा लिपाया पुस्तां थज्याःगु खँ सीमखु । अथेजुयाः समुदायं न्ह्यचिलादिसँ, ग्वाहालि यायेत स्थानीय सरकार तयार दु ।’

ज्याझ्वलय् पुलांम्ह बागमति प्रदेशया पुलांम्ह मन्त्री हरिप्रभा खड्गी श्रेष्ठं येँ सम्यक महादानया निंतिं आवश्यक जूगु बजेटया निंतिं स्थानीय निकाय निसें प्रदेश सरकारय् नं कुतः यायेगु खँ धयादिसें नेवाःतय् संस्कृति ल्यंकेगु निंतिं माःगु ग्वाहालि यायेगु खँ धयादीगु दु । वय्कलं नेवाः संस्कृतियात ल्यंकेगु निंतिं निरन्तर ज्याझ्वः यायेमाःगु सुझाव नं बियादीगु दु ।

ग्वसाः खलःया संयोजक दिपकलाल प्रधानं लसकुस यासें न्ह्याःगु ज्याझ्वलय् महाबू बहाःया थाय्पा संघरत्न शाक्यं दिनाच्वंगु सम्यक महादानया यायेगु निंतिं थःपिंसं पञ्चदानया ज्याझ्वः यानागु जानकारी बियादल । वय्कलं धयादिल, ‘थनिं नीप्यदँ न्ह्यःनिसें दिनाच्वंगु सम्यक महादान दिके मजिउ धइगु सन्देश बीत नं जिमिसं थुगु ज्याझ्वः यानागु खः ।’ ज्याझ्वः २७ वडा योगेशकुमार खड्गीया सभापतित्वय् जूगु खः ।

थ्व स्वयां न्ह्यः म्हिगः हे महाबू बहाः दुहां वनेगु लँय् दयेकूगु ध्वाखाया उलेज्या नं कार्यवाहक मेयर डंगोलं यानादीगु खः ।

म्हिगः जूगु पञ्चदानय् येँया झिंच्यागू बहाः मध्ये गुंगू बहाःया गुम्ह तथागत दिपकरपिनिगु ब्वति दुगु खःसा थीथी बहाः बहीया सछिम्ह थाय्पा आजुपिंसं ब्वति कयादीगु खः । पञ्चदान लिपा शोभायात्रा यानाः असनय् द्यः ब्वयेगु ज्या नं जूगु खः ।