झी पुचः विराटनगरया नेपालभाषा प्रशिक्षण कक्षा क्वचाल
येँ (नेपालभाषा टाइम्स) – झी पुचः (नेपालभाषा व सांस्कृतिक संघं) विराटनगरया ग्वसालय् जूगु नेपालभाषा प्रशिक्षण कक्षा क्वचाःगु दु ।
पुचःया ग्वसालय् नेवाः समुदायया भाषा, साहित्य, कला, संस्कृतिया संरक्षण व न्हू पुस्तायात मांभाय्या अपनत्व ब्वलंकेया ल्याखं बाःछियंकंया उगु कक्षा न्ह्याःगु खः ।
भाषा प्रशिक्षण कक्षाय् मचांनिसें ज्याथःजिथिपिनिगु उत्साहजनक उपस्थिति दुगु पुचलं जानकारी बिउगु दु । प्रशिक्षणय् राजनीतिकर्मी, कानुन व्यवसायी, प्राध्यापन, इन्जिनियरिङ, कला, व्यवसायीतय् सहभागिता दुगु खः ।
विराटनगरया संस्कृतिविद्लिसें भाषाविद् गणेश वज्राचार्यं सहजीकरण यानादीगु नेपालभाषा प्रशिक्षण कक्षाय् नेवाः भाय् नवायेगु, च्वयेगु, ब्याकरण, साहित्य, इतिहासलिसें नेवाः कला, संस्कृतिया थीथी व्यावहारिक पक्षयात कयाः प्रशिक्षण बियादीगु खः ।
प्रशिक्षणय् मचांनिसें ज्याथःजिथितक थीथी उमेर समूहया स्वंगू दजर्न मल्याक नेवाः समुदायया प्रशिक्षार्थीतय् सहभागिता दुगु खः । पुचलं बिउगु जानकारीकथं प्रशिक्षणय् ११ दँ दुपिं शुभम् श्रेष्ठ, आराध्या श्रेष्ठ, १३ दँ दुम्ह रुविन श्रेष्ठ, १७ दँया प्रभा श्रेष्ठ व उर्वशी श्रेष्ठ निसें कयाः सिभिल इन्जिनियर सचिन श्रेष्ठ, वासः व्यवसायी हरि मोहन श्रेष्ठ, कलाकार पुनमप्रकाश श्रेष्ठ, वरिष्ठ अधिवक्ता सुरेशलाल श्रेष्ठ, प्राज्ञिक व्यक्तित्व प्रा.डा. सम्झना श्रेष्ठ, कांग्रेस नेतृलिसें महिला संघ विराटनगरया सभापति ६७ दँ दुम्ह शिला श्रेष्ठ लगायतं सक्रिय रुपं प्रशिक्षण कयादीगु खः ।
वंगु आइतवाः जूगु समापन ज्याझ्वलय् प्रशिक्षार्थीतय्त दसिपौ लःल्हाःगु खःसा प्रशिक्षक वज्राचार्य व सक्रिय सहभागि प्रशिक्षार्थी रुविन श्रेष्ठलिसें प्रशिक्षणय् ग्वाहालि यानादीपिंत सुभाय् पौ नं लःल्हाःगु खः ।
समापन ज्याझ्वलय् पुचःया नायः शरद श्रेष्ठं मांभाय् ल्यंकेगु झी सकसिगु दायित्व व कर्तव्य खः धासें वइगु दिनय् नं थुकथंया रचनात्मक ज्याझ्वः व प्रशिक्षण बिया वनेगु प्रतिवद्धता प्वंकादिल ।
नेपालभाषा प्रशिक्षण कक्षा वंगु तछलागा त्रयोदशि (असार २८ गते)निसें न्ह्याःगु खःसा वंगु दिल्लाथ्व द्वादशि (साउन १० गते) आइतवाः समापन ज्याझ्वः याःगु खः ।
LEAVE YOUR COMMENTS