कोरोनां मानसिक समस्या अप्वयेकल

येँ – हलिंन्यंकं कोरोना महामारी न्यना वनेवं नेपालय् नं उकियात पनेगु लागिं लकडाउन जुल । थगुने करिब च्याला तक लकडाउन जुल । लकडाउनं यानाः आर्थिक, सामाजिक, पर्यटन फुक्क हे ख्यः अस्तव्यस्त जू वन । थुकिया नापं भारत व मेमेगु देशय् वैदेशिक रोजगारीइ वनाच्वंपिं मनूतय्सं छ्वयाहःगु ध्यबापाखें छेँ चले याये माःपिं मनूतय् परिवारय् तःधंगु मार लाः वन । थुकिं यानाः गुलिखे मनूतय्के मनोसामाजिक समस्या समेत खने दया वःगु दु । थुखेपाखे धाःसा म्हो जक मनूतय् ध्यान वनाच्वंगु खनेदु ।

छुं ई कोरोना महामारी स्थिर जूगु खःसां आः हानं कोरोना सङ्क्रमणया निगूगु भेरियन्ट न्यना वंगु दु । वंगु छुं ई थुखेंनिसें नेपालय् कोरोनाया निगूगु भेरियन्टया कारणं हाहाकार जुयाच्वंगु अवस्था दु ।

भारतसहित थीथी देशय् वैदेशिक रोजगारीइ वनाच्वंपिं मनूत व उमि छेँजःपिंके मानसिक समस्या खने दयेवं कैलालीइ छुं मनोपरामर्शकर्तातय्सं उमित मनोपरामर्श सेवा बीगु नं शुरु याना हःगु दु । कैलालीया छगू संस्थाय् ज्या यानाच्वंम्ह लक्ष्मी चौधरीं धयादिल, ‘जिमिसं दछिया अवधिइ वैदेशिक रोजगारीइ वनाच्वंपिं मनूत व उमि परिवारया दुजःत ८६ म्हेसित मनोपरामर्श सेवा बियागु खः ।’ मनोपरामर्शकर्तातय्सं मनोसामाजिक समस्याय् लानाच्वंपिं मनूतय्त परामर्श बीगु नापं उपचार यायेत ग्वाहालि नं यानाच्वंगु दु ।

चिकित्सकतय्सं धाः कथं मानसिक समस्याय् लानाच्वंपिंत इलय् हे व्यवस्थापन याये मफुत धाःसा भविष्यय् झन् जोखिम अप्वइगु खतरा दु ।

वय्कःपिंसं धाःकथं थुकियात इलय् हे वासः मयात धाःसा मनूतय्के वँय्सू वइगु सम्भावना दु । अझ वयां नं तच्वया वन धाःसा मनूतय्सं आत्महत्या तक नं याः वनीगु सम्भावना दु ।

सम्बन्धित बुखँ

LEAVE YOUR COMMENTS