बार्सिलोनायात प्यंगू कासा न्ह्यः हे ला लिगा उपाधी

मेस्सीया ह्याट्रिक

लियोनल मेस्सीया ह्याट्रिकया ग्वाहालिं डिपोर्टिभा ला कोरुनयात ४–२ गोलं बुकाः बार्सिलोनां ला लिगा उपाधी त्याकूगु दु ।
बार्साया थ्व २५ औं ला लिगा उपाधी खःसा प्रशिक्षक अर्नेस्टो भाल्भेर्डयात न्हापांगु सिजनय् हे उपाधी चूलाःगु दु ।
वंगु चान्ह्य जूगु कासाय् कोन्टिन्हो कासाया न्हय्गू मिनेटय् हे न्हापांगु गोल यासें बार्सायात अग्रता बिउगु खः । थ्व धुंकाः मेस्सीं ३८ आंै मिनेटय् लुइस स्वारेजया क्रसय् थप छगू गोल यात ।

तर न्हापांगु हाफय् हे आर्सेनलं डिपोर्टिभाय् लोनय् वःम्ह पेरेज छगू गोल यासें बार्साया अग्रता चिब्या यानाबिल । कासाया ६४ औं मिनेटय् कोलकं थप छगू गोल यानाः कासा बराबरीइ हयाः बार्साया थुगु कासाय् हे उपाधी ल्ह्वनेगु ह्वःताः च्वतुंकाबिइ त्यंगु खः । तर मेस्सीं बार्साया निंतिं थःगु व्यक्तिगत ४६ औं ह्याट्रिक यायेगु झ्वलय् कासा क्वचायेत ८ मिनेट बाँकी दनिबलय् थप छगू गोल यातसा थ्वयां ३ मिनेट लिपा मेगु छगू गोल यानाबिल । थ्व निगुलिं गोलया निंतिं नं मेस्सीयात स्वारेजं हे बल मिले यानाबिउगु खः ।बार्सिलोनां ला लिगाय् प्यंगू कासा ल्यं दनिबलय् हे ३४ गू कासाय् ८६ अंक कासें उपाधी ल्ह्वंगु खः । बार्साया लिउने लानाच्वंगु एथलेटिको म्याड्रिडया ३५ गू कासाय् ७५ अंकं जक दु । आः वं म्हिते ल्यंदनिगु स्वंगू कासा त्यासां नं बार्सिलोनायात लिउने लाकेमफइगु जुइवं बार्सा प्यंगू कासा म्हिते न्ह्यः हे उपाधी ल्हातय् लाकूगु खः ।

सम्बन्धित बुखँ

LEAVE YOUR COMMENTS