वार्ता सकारात्मक मजुल दथुइ त्वःते ः ट्रम्प

अमेरिकी राष्ट्रपति डोनाल्ड ट्रम्पं उत्तर कोरियाया नेता किम जोंग उन लिसे जुइगु वार्ता सकारात्मक लँय् न्ह्याः मवन धाःसा दथुइ हे त्वःता वनेगु खँ धयादीगु दु । अमेरिका भ्रमणय् थ्यनाच्वंम्ह जापानी प्रधानमन्त्री शिंजो आबेलिसे मंकाः पत्रकार सम्मेलनय् न्ववानादिसें ट्रम्पं परमाणु निशस्त्रीकरणयात कयाः उत्तर कोरियायात तच्वःगु दबाब बियाच्वनेमाःगु खँ नं धयादीगु दु ।

थ्वहे दथुइ ट्रम्पं सिइआएया निर्देशक माइक पोम्पियों नेता किमयात नापलायेत उत्तर कोरियाया गोप्य भ्रमण याःगु खँ नं पुष्टि यानादीगु दु । वय्कलं पोम्पियां किम लिसे बांलाःगु स्वापू कायम यासें छुं समस्या बिनाः खँल्हाबल्हा याःगु खँ धयादीगु दु ।
ट्रम्प व किम दथुइ वइगु जुन वा वयां न्ह्यः शिखर वार्ता जुइगु खँ पिहां वयाच्वंगु दु । थ्व शिखर वार्ताया निंतिं अमेरिकां जोडतोडं तयारी यानाच्वंगु दु ।

थज्याःगु तयारी जुयाच्वंगु हे इलय् ट्रम्पं यदि थ्व बैठक सफल जुइथें मच्वन धाःसा थम्हं ब्वति हे मकायेगु व यदि वार्ता जु हे जुल धाःसां सकारात्मक लँय् न्ह्याः मवन धाःसा दथुइ हे त्वःता वयेगु खँ धयादीगु दु । मेखे जापानी प्रधानमन्त्री शिंजों ट्रम्प लिसे नापलायेगु झ्वलय् सन् १९७० व ८० या दशकय् उत्तर कोरियां अपहरण यानायंकूपिं जापानी नागरिकतय्त त्वःतकेगु निंतिं ग्वाहालि यायेत इनाप यानादीगु दु । उत्तर कोरियां झिंस्वम्ह नागरिकयात अपहरण यानागु खँ स्वीकार यायेधुंकूगु दु । तर जापानं धाःसा थ्वयां अप्वः मनूत अपहरण याःगु धयाच्वंगु दु ।