ने. सं. ११४४ कछलागा द्वादशी -

मेस्सीया गोल, म्याराडोनायात समर्पण

एजेन्सी/ ताःई न्ह्यवनिसें बांलाक फर्मय् म्हिते मफयाच्वंम्ह व गोल यायेत मफयाच्वंम्ह लियोनल मेस्सीं थौं गोल यासें अर्जेन्टिनाया महान कासामि डिएगो म्याराडोनायात समर्पण याःगु दु । स्पेनिस ला लिगाया थौं सनिलय् जूगु कासाय् ओसासुना विरुद्ध ४–० गोलं त्याकेगु झ्वलय् मेस्सी कासाया ७३ औं मिनेटय् बार्सिलोनाया निंतिं दकलय् लिपांगु गोल याःगु खः । कडा प्रहार यासें आकर्षक गोल यायेवं मेस्सीं थःगु जर्सी त्वःताः म्याराडोनाया १० नम्बर च्वयातःगु अर्जेन्टिनी क्लब नेवेल्स ओल्ड ब्वाइया जर्सी क्यंगु खः । म्याराडोना बार्सा वये न्ह्यः थ्व हे क्लबं प्रशिक्षण काःगु खःसा म्याराडोनां थःगु क्यारियरया अन्तिम इलय् थ्व क्लबं म्हितूगु खः ।

थ्व सिजनय् थःगु पहःया गोल याये मफयाच्वंम्ह मेस्सी थौं म्याराडोनायात सपर्मण यायेगु निंतिं गोल हे याये धयाकथं थःगु जर्सी दुने हाकनं बार्साया पुलांगु जर्सी फिनाः वःगु खः । अले बक्सं पिनें दर्शनीय गोल यायेवं थःगु जर्सी त्वःताः रंगशालाया तःग्वःगु स्क्रिनय् क्यनातःगु म्याराडोनाया तस्वीर स्वयाः प्रार्थना याःगु खः । बार्साया हे मैदान क्याम्प नोउइ थौं कासा जुइ न्ह्यः नं म्यारोडोनाया लुमन्तिइ छगू मिनेट मौन धारण लिपा जक कासा न्ह्याकूगु खः ।

मेस्सी म्याराडोनायात तसकं सम्मान याइम्ह खः । म्याराडोना अर्जेन्टिनाया प्रशिक्षक जुयाच्वंगु इलय् हे मेस्सी अर्जेन्टिनाया कप्तान जूगु खः । बार्साया सहज जितया निंतिं न्हापांगु गोल कासाया २९ औं मिनेटय् ब्रेथवेटं न्हापांगु गोल याःगु खःसा न्हापांगु हाफ क्वचाये न्ह्यः ४२ औं मिनेटय् एन्टिनो ग्रिजम्यान नं छगू दर्शनीय गोल याःगु खः । ग्रिजम्यान नं बार्साय् गोल यायेमफयाः तसकं आलोचित जुयाच्वंम्ह खः । कासाया ५७ औं मिनेटय् कोन्टिन्हों बार्साया निंतिं स्वंगूगु गोल याःगु खः ।