मांअबुं मस्तय् नां तये मदु !

काय जुइमा वा म्ह्याय् आखिर व थः हे सन्तान खः । धाइ नापं कि ‘सन्तान ईश्वरया वरदान ।’ हरेक निम्हतिपुलिं इहिपा याःगु दँबदंया दुने सन्तान सुख प्राप्त याइ । थ्व इमिगु निंतिं जीवनया हे दकलय् लसताया ई जुया बी । अथे खयां नं गुलिं अभिभावकयात थः सन्तानया नां छु तयेगु धइगु खँय् द्विविधा जुइगु जक मखु, कपाः स्याःगु विषय नं जुयाबी ।

गुलिसिनं मांया नां क्वकयाः अले गुलिसिनं अबुया नां क्वकयाः थः मस्तय् नां तइ । गुलिसिनं धाःसा मांअबु निम्हेसिगु नां क्वकयाः वा ज्वःलाकाः तइपिं नं दु । अझ गुलिसिनं ला थः सन्तानया नां तयेगु निंतिं हे थीथी सपूm, खँग्वःधुकू, ज्योतिष, परामर्शदातानिसें इन्टरनेटय् तकं मालेगु ज्या यानाच्वंगु दु ।

मांअबुं थः मस्तय् नां थःगु स्वेच्छां तइगु खःसां आः अभिभावकं थः मस्तय् नां थः यस्सें तये मदइगु जूगु दु । खः, न्युजिल्याण्डय् अनया सरकारं हःगु न्हूगु व्यवस्थाकथं आः मांअबुं थः मस्तय् नां थः यस्सें तये मदइगु जूगु दु । सरकारी तथ्यांककथं न्युजिल्याण्डय् दछिया दुने ख्वीद्वः मस्त जन्म जुयाच्वंगु दु ।

उकीमध्ये १ प्रतिशतं जक सरकारं क्वःछिनातःगु नां तयेगु यानाच्वंगु दुसा ल्यं दुपिं मेपिं मस्तय् नां मिले मजूगुलिं उकियात भिंकेत छ्वयेगु यानाच्वंगु दु । थ्व हे झ्वलय् अभिभावकं थः सन्तानयात मेपिं स्वयां बिस्कं क्यनेगु निंतिं अनेतने थन तक कि अश्लील खने दइकथंया नां तकं तयेगु याना हयेवं उकिं सामाजिक सद्भाव स्यंकीगु धासें उकिया समाधान यायेकथं न्युजिल्याण्ड सरकारं आः अभिभावकं आः थः मस्तय् नां तये मदइकथंया प्रतिबन्ध तःगु खः । सन् २०१७ य् जक सरकारं झण्डै न्यासः नांयात प्रतिबन्धया धलखय् तःगु खः ।

सम्बन्धित बुखँ

LEAVE YOUR COMMENTS