राष्ट्रपति ट्रम्पयात कर छले याःगु द्वपं

एजेन्सी – अमेरिकी राष्ट्रपति डोनाल्ड ट्रम्प अमेरिकाया अर्बपतिमध्ये छम्ह खः । थुम्ह अर्बपति राष्ट्रपति ट्रम्पयात कर छले याःगु द्वपं लाःगु दु। अर्बपति अमेरिकी राष्ट्रपति डोनाल्ड ट्रम्प विरुद्ध आयकर चुक्ता मयाःगु द्वपं लाःगु दु। अमेरिकाया राष्ट्रपति निर्वाचन न्ह्यः हे ट्रम्प छम्ह अर्बपति जूगु समाचार पिहां वःगु खः । राष्ट्रपतिइ निर्वाचित जूगु हे दँय् ट्रम्पं ७५० अमेरिकी डलर जक संघीय आयकरयात पूगु खुलासा जूगु दु ।

अमेरिकाया राष्ट्रपतिइ निर्वाचित जूगु दँय् अर्बौंया मालिक ट्रम्पं जम्मा ७५० डलर जक अमेरिकी संघीय आयकर विभागयात पूगु खुला अमेरिकी पत्रिका ‘न्यूयोर्क टाइम्सं’ याःगु खः । न्यूयोर्क टाइम्सया कथं राष्ट्रपति ट्रम्पं वंगु १५ दँया दुने न्यादँया जक आयकर पूगु दुसा मेगु १० दँया आयकर पूगु मदु। थःगु कम्पनी द्यापनय् वंगु धासें वंगु १० दँ तक कर मपूम्ह ट्रम्पयात कर छले याःगु द्वपं बिउगु दु।

राष्ट्रपतिया वर्तमान कार्यकाल सिधयेत्यंगु व निक्वःगु कार्यकालया निंतिं राष्ट्रपतिया निर्वाचनया दावेदारया रुप न्ह्यःने वनाच्वंम्ह ट्रम्प विरुद्ध राष्टपति पदया निर्वाचन जुइ करिब लछि जक ई ल्यं दुगु इलय् उकथं कर छले याःगु द्वपं लाःगु खः ।

उखे न्यूयोर्क टाइम्सं च्वःगु समाचारयात कयाः ट्रम्पं आपत्ति प्वंकूगु दु। न्यूयोर्क टाइम्सया समाचार पूणरुपं फय्गं जूगु धासें समाचारप्रति ट्रम्पं आपत्ति प्वंकूगु खः। न्यूयोर्क टाइम्सं सन् १९९० निसें थःपिंसं ट्रम्पया कम्पनीया करसम्बन्धी विवरण अध्ययन यानाच्वनागु दावी याःगु दुसा सन् २०१६ व २०१७ य् ट्रम्पया व्यक्तिगत कर विवरणतकं थःपिंसं अध्ययन यानागु दावी याःगु दु ।

उखे ट्रम्पं टाइम्सया समाचारय् छुं नं सत्यता मदुगु व थम्हं कर पुलागु जिकिर याःगु दु ।