भाटभटेनी साहु गय् लानाः लात ?
येँ (नेपालभाषा टाइम्स)÷ललिता निवास काण्डया फाइल चायेकाः सरकारं अभियुक्ततय्त धमाधम ज्वनेगु ला शुरु यात । तर ज्वंपिं मध्ये भाटभटेनी सुपर मार्केटया संस्थापन मिनबहादुर गुरुङयात समेत छाय् ज्वन धइगु खँय् धाःसा राजनीतिक ख्यलय् न्ह्यसः पिहां वःगु दु ।
मिनबहादुर गुरुङ विशेषतः माओवादीया हे अवैध ध्यबायात सुरक्षा बीगु ज्या याइम्ह ‘पार्टनर’ धकाः चर्चा जुइगु याः । वय्कलं येँ लगायत देय्या थीथी थासय् भाटभटेनी सुपर मार्केट चायेकूगु हे माओवादीया ध्यबा प्रयोग यानाः खः धाइ । उकिं माओवादी अध्यक्ष पुष्पकमल दाहाललिसे वय्कःया बांलाःगु स्वापू दु धाइ । तर दाहाल हे प्रधानमन्त्री जूगु इलय् वय्कःयात ज्वनाः कारवाही याःगुलिं दाहाललिसे वय्कःया ‘कनेक्सन’ सिउपिं मनूत अजूचायाच्वंगु दु ।
गुरुङं थःपिंत जेल मुक्त यानाः मुद्दा न्ह्याकेमाः धकाः सर्वोच्च अदालतय् रिट बिउगु खःसा अदालतं गुरुङ लगायत सुधीर कुमार शाह व धर्मप्रसाद गौतमयात छाय् त्वःते मजिउ धकाः प्रहरीया सीबीआईयात कारण देखाउ आदेश बिउगु खः ।
सीबीआई प्रमुख किरण वज्राचार्यं उमित त्वःतल धाःसा प्रमाण नष्ट याये फइगु, साक्षी व जाहेरवालायात प्रभावित याये फइगु जूगुलिं त्वःते फइ मखु धकाः अदालतयात लिसः छ्वःगु दु ।
LEAVE YOUR COMMENTS