ने. सं. ११४४ कौलाथ्व तृतीया -

निजी स्कुलत धमाधम बन्द निषेधाज्ञां यानाः शुल्क उठे यायेत तकं समस्या

येँ -कोरोना संक्रमण व उकियात पनेगु लागिं सरकारं याःगु निषेधाज्ञाया कारणं थगुने व थुगुसी स्वनिगःया आपालं निजी स्कुलत बन्द जूगु दु । कोरोनाया महामारी न्यना वनेवं आपालं विद्यार्थीत थःथःगु गामय् लिहां वंगुलिं स्कुल बन्द यायेमाःगु खँ सञ्चालकतय्सं धाःगु दु ।

छम्ह स्कुल सञ्चालकं कनादीकथं निसःत्या स्वयां म्हो विद्यार्थी दुगु स्कुलत धमाधम बन्द जुयाच्वंगु दु । वय्कःया कथं आपालं विद्यार्थीत स्कुलयात पुलेमाःगु फि तकं मपुसें गामय् वंगुलिं स्कुल सञ्चालन यायेत तकं समस्या जुयाः बन्द यायेमाःगु अवस्था वःगु खः ।

आः निसःत्या स्वयां म्हो विद्यार्थी दुगु स्कुल कि त मर्जय् वनेमाःगु कि त बन्द हे यायेमाःगु नियम वःगु कारणं यानाः अज्याःगु स्कुलत बन्द यायेमाःगु खः । न्हापा द्वःछि विद्यार्थी दुगु स्कुलय् नं आः २५ प्रतिशत स्वयां अप्वः विद्यार्थी म्हो जुजुं वनाच्वंगु लूगु दु ।

स्वनिगःया आपालं स्कुलय् आखः ब्वनाच्वंपिं विद्यार्थीया अभिभावकतय्सं शुल्कय् छुट बीमाः धकाः स्कुलयात दबाब बियाच्वंगु खँ नं स्कुलया सञ्चालकतय्सं धाःगु दु । छुट मबिल धाःसा विद्यार्थी लिकया यंकीगु व बिल धाःसा स्कुलया शिक्षक, कर्मचारीयात तलब बीत तकं समस्या जुइगु खँ नं सञ्चालकतय्सं धाःगु दु । थज्याःगु दबाब फयाच्वंगु छगू मेगु स्कुलया सञ्चालकं धाःगु दु, ‘थगुने जूगु लकडाउनया कारणं पीगु लाख स्वयां अप्वः फी उठे याये मानि । आः व ध्यबा उठे जुइ मजुइ धाये फुगु अवस्था मदु ।’

अथे २५ लाख तका स्वयां अप्वः फी उठे याये ल्यं दनिगु मेगु स्कुलया सञ्चालकं कंगु दु, ‘आः विद्यार्थीत हे गामय् लिहां वनेधुंकल, ध्यबा उठे याये फइ मफइ ठेगान हे मदु ।’
वय्कलं धयादिल, ‘स्कुलय् विद्यार्थी न्हापा स्वयां म्हो जुयाच्वंगु दु, पुलांगु ध्यबा उठे यायेगु अवस्था मदु, थथे हे जुयाच्वन धाःसा मेगु दछि हे स्कुल चले याये फइ मफइ धाये मफयेधुंकल ।’

येँ महानगरपालिका शिक्षा विभागया अधिकारी मोतिराज खनालं स्कुल बन्द जुल धइगु हल्ला थःपिसं नं न्यनाच्वनागु दु तर उकिया डाटा धाःसा थःपिंके मवःनिगु कनादीगु दु ।
वय्कलं धयादिल, ‘स्कुल बन्द जुल धइगु हल्ला ला जिमिसं नं न्यनाच्वनागु दु, तर उकिया डाटा धाःसा वःगु मदुनि । कलंकीया छगू स्कुलं बन्द यायेगु धकाः खँ न्ह्यथंगु ला खः, तर बन्द यात मयात मसिउनि ।’

स्कुल सञ्चालकतय्सं धाःकथं स्कुलतय्सं छेँया बाः जक लय् निगू निसें न्यागू लाख तका पुलेमाः । बाः पुले मफुत धाःसा छेँ त्वःते मालीगु अवस्था वयेफु । उकिं मेगु स्कुलत नं बन्द जुइगु सम्भावना दु । वय्कःपिनि धापू कथं आः स्कुल मर्ज यायेगु कि बन्द यायेगु धइगु बारे सञ्चालकतय् दथुइ सहलह जुइगु क्रम नं अप्वयाच्वंगु दु ।