ने. सं. ११४४ ञलाथ्व नवमी -

बिमस्टेकया सफलताय् विज्ञतय् आशंका

येँ – तःधंगु तामझामया दथुइ म्हिगः बिहिवाः निसें बिमस्टेक (बहुक्षेत्रीय प्राविधिक तथा आर्थिक सहयोगया निंतिं बंगालया खाडीया राष्ट्रतय् कुतः) या प्यक्वःगु सम्मेलन येँय् सुरु जुल । तःधंगु तामझामया दथुइ थ्व बैठक सुरु जुयाच्वंगु हे इलय् बिमस्टेकया प्रभावकारितायात कयाः धाःसा विज्ञतय्सं न्ह्यसः थना हयाच्वंगु दु ।

बिमस्टेक सुरु जूगु २१ दँ दयेधुंकल । थ्व २१ दँया दुने बिमस्टेकं छुं नं कथं न्ह्यथनेबहगु उपलब्धि चूलाके मफुगु व आःया बैठकं नं अज्याःगु छुं न्ह्यथनेबहःगु सहमति याये मफइगु धापू विज्ञतय् दु । पुलांम्ह परराष्ट्रमन्त्री व परराष्ट्रविद् भेषबहादुर थापां ला बिमस्टेकं आःतक संगठनया स्वरुप तकं काये मफुगु खँ धयादीगु दु ।

‘शान्ति, लगानी, उत्पादन व व्यापार वृद्धियात कयाः ठोस रुपं न्ह्याः वने मफयेकं मेगु न्ह्यागु हे सहमति याःसां संगठनयात न्ह्याके यंकेत ग्वाहालि याइ थें मताः’ वय्कलं धयादीगु दु ।

मुख्यत दक्षिण एशियाली देय्तय् दथुइ दुगु राजनीतिक समस्याया कारणं हे बिमस्टेकं बांलाक ज्या याये मफुगु खँ राजनीतिक विश्लेषकतय्सं धाःगु दु । दक्षिण एशियाली क्षेत्रीय संगठन (सार्क)यागु राजनीतिक समस्याया हे कारणं बांलाक न्ह्याः वनेफुगु मदु ।

बिमस्टेकय् नेपाःया लिसें थाइल्यान्ड, म्यानमार, भूटान, बंगलादेश, भारत व श्रीलंका दुथ्यानाच्वंगु दु । स्थापना जूगु २१ दँ दयेधुंकाः तकं बिमस्टेकया बडापत्र तकं दयेकेफुगु मदुनि । हरेक निदँय् छक्वः सम्मेलन यायेगु धयातःसां आःतक नकतिनि प्यक्वःगु सम्मेलन जुयाच्वंगु दु । थुगुसी येँय् जुयाच्वंगु सम्मेलनं बिमस्टेकया बडापत्र अनुमोदन यायेगु लिसें प्राथमिकताया क्षेत्रय् निगू क्षेत्रयात थप याइगु खँ दु ।
अप्वःसिनं बिमस्टेकयात पाकिस्तानयात अलग्ग लाकेगु लागिं भारतं सार्कया विकल्पय् हःगु मेगु संगठन धकाः द्वपं बीगु याः ।