भागबन्डां सत्य निरुपण अलपत्र
पार्टी दथुइ भागया विवाद वयेवं निर्देशिका तयार
येँ – नेपाःया द्वन्द्व व्यवस्थापन यायेगु ज्याय् असफल साबित जूगु सत्य निरुपण तथा मेलमिलाप आयोग व बेपत्ता छानबिन आयोग गठन यायेगु ज्याय् तकं सरकार असफल जुयाच्वंगु दु । सरकारं न्हापा गठन याःगु थ्व निगुलिं आयोगं बांलाक ज्या याये मफुसेंलि सरकारं उकियात भंग याःगु खः ।
तर आः हानं न्हूगु आयोग गठन यायेगु ज्याय् धाःसा समस्या पिहां वःगु दु । थ्व निगुलिं आयोगया दुजः व प्रमुखत खुल्ला रुपं आह्वान यानाः योग्ययात जक नियुक्त यायेगु धकाः सरकारं स्वला न्ह्यः खुल्ला आह्वान याःगु खः । उगु आह्वान कथं ५७ म्ह मनूतय्सं आवेदन बिउगु खः । तर आवेदन यक्व वःसां उकी दलीय भागबन्डा मिले मजुयाः आः तकं सुयातं नियुक्त धाःसा याये फयाच्वंगु मदुनि ।
धायेत नियुक्त जुइगु इलय् दुजः जुइपिं मनूत छुं नं राजनीतिक दलया सदस्य मजूगु जुइमाः धइगु प्रावधान तया तःगु दु । तर निगुलिं आयुक्तया अध्यक्ष लगायत दुजः जुइगु लागिं धाःसा राजनीतिक लबिङ तीव्र जुयाच्वंगु दुसा थुकी स्वयम् सत्तारुढ दल नेपाल कम्युनिष्ट पार्टी दुने तकं सु सु वनेगु धकाः धेंधेंबल्लाः जुयाच्वंगु खँ सीदुगु दु ।
थुकी जुइगु भागबन्डाय् प्रमुख प्रतिपक्षी नेपाली कांग्रेसं समेत भाग फ्वनाच्वंगु नं सूत्रया दावी दु । सत्य निरुपण व बेपत्ता छानबिन निगुलिं ज्या माओवादी द्वन्द्वलिसे सम्बन्धित जूगु कारणं माओवादीं थुकियात अझ नं गम्भीर रुपं कयाच्वंगु दनि ।
यदि थ्व आयोगय् लाथेपाथे मनूत वल धाःसा उमिसं जनयुद्धय् ल्हाः दुपिं माओवादी नेता व लडाकूतय्त राजनीतिक कार्यकर्ता मखुसें अपराधी सरह कारवाहीया सिफारिस याये फइगु सम्भावनायात ध्यानय् तयाः माओवादीं थुकियात गम्भीर रुपं कयाच्वंगु खँ सूत्रं धाःगु दु ।
माओवादी द्वन्द्व समाप्त जुइसातकि हे गठन जुइमाःगु थ्व निगुलिं आयोग द्वन्द्व क्वचाःगुयां तःदँ लिपा गठन जूगु खःसा निदँ म्याद दुगु थ्व निगुलिं आयोगं प्यदँ तक ज्या यानाः नं छुं लिच्वः धाःसा पिहां मवःगु खः । अन्तय् सरकारं उकियात भंग यानाः हानं न्हूकथं आयोग गठनया तयारी याःगु खः ।
न्हूकथं आयोग गठनया लागिं खुल्ला आह्वान यानाः नं गठन धाःसा याये मफुगुलिं म्हिगः सरकारं उगु आयोगय् गज्याःगज्याःपिं मनू च्वने दइ धइगु विषयय् छगू निर्देशिका तयार याःगु दु ।
थ्व निर्देशिका नं पारित मजूनि, उकिया मस्यौदा तयार जुइधुंकल । आयोगया दुजः जुइगु लागिं पीडितमैत्री बिचाः दुपिं व मानव अधिकारया ख्यलय् नां दुपिं जुइमाः धइगु खँ उल्लेख यानातःगु दु । थुकी न्हापा हे वयेमाःगु निर्देशिका लिपा वःगु टिप्पणी जुयाच्वंगु दु ।
LEAVE YOUR COMMENTS