येँय् स्थानीय तहय् सहकारी हस्तान्तरण

देय् संघीयताय् वनेधुंकूगु दु । संघीयता देय् वनेगु राज्यया फुक्कं संरचना नं आः संघीयताया मर्म कथं न्ह्याःवनेगु ज्या जुयाच्वंगु दु । थ्वहे झ्वलय् आः सहकारी संस्थायात नं स्थानीय तहलय् छ्वयेगु ज्या जुयाच्वंगु दु ।उकिया निंतिं देय्न्यंकं दुगु डिभिजन सहकारीपाखें थःथःगु क्षेत्रय् लाःगु सहकारी हस्तान्तरण यायेगु ज्या धमाधम जुयाच्वंगु दु । उकथं हे स्वनिगलय् गुलि सहकारी संस्था हस्तान्तरण जुल धइगु बारे जानकारी कायेगु ज्या जुयाच्वंगु दु । येँय् नं डिभिजन सहकारी कार्यालय काठमाडौं पाखें स्थानीय निकाययात सहकारीया नियमनया ज्या हस्तान्तरण जुयाच्वंगु दु ।

येँ जिल्लाय् जक मुक्कं बहुउद्देश्यीय व बचत तथा ऋण सहकारी यानाः ३८३९ गू सहकारी संस्था सक्रिय जुयाच्वंगु दु । थुपिं सहकारीया नियमन यायेगु ज्या न्हापा डिभिजन सहकारी कार्यालय पाखें जुयाच्वंगु खः । आः थुपिं सहकारी बुलुहुं स्थानीय निकाय अन्तर्गत यंकेगु ज्या जुयाच्वंगु खँ डिभिजन सहकारी, येँया वरिष्ठ सहकारी अधिकृत आनन्द सारुं कनादीगु दु ।
वय्कलं बियादीगु जानकारी कथं येँ जिल्लाय् थांैकन्हय् नगरपालिका दुनेया सहकारी संस्थायात हस्तान्तरण यायेगु ज्या न्ह्यानाच्वंगु दु । येँया चन्द्रागिरी नगरपालिका, शंखरापुर नगरपालिका, कागेश्वरी–मनोहरा नगरपालिका, दक्षिणकाली नगरपालिका व गोकर्णेश्वर नगरपालिका दुनेया सहकारीया लगत हस्तान्तर जुइधुंकूगु दु ।

आः नार्गाजुन नगरपालिका हस्तान्तर प्रक्रिया न्ह्यानाच्वंगु जानकारी बियादिसें उकिया अभिलेख तयेगु ज्या लिपांगु चरणय् थ्यने धुंकूगु जानकारी नं वय्कलं बियादीगु दु ।येँ महानगरपालिकाया सहकारी गबलय् हस्तान्तरण जुइ ? थुकियात कयाः वय्कलं धयादिल, ‘स्वनिगः दुनेया फुक्कं नगरपालिका व उपमहानगरपालिकाया सहकारी हस्तान्तरण जुइधुंकाः तिनि महानगरय् सहकारी हस्तान्तरण यायेगु ज्या जुइ ।’ येँ महानगरय् मेमेथाय् स्वयां अप्वः सहकारी दुगुलिं यानाः भचा ई काइगु खँ वय्कलं कनादीगु दु । अथे हे वय्कलं धयादिल, ‘आः फुक्कं नगरपालिका दुने दुगु सहकारीया अभिलेख तयेगु ज्या जुयाच्वंगु दु । अभिलेख तयेगु ज्या क्वचाःगु नगरपालिकाया हकय् सहकारी हस्तान्तरण याना वनेगु जुइ ।’

चन्द्रागिरी नगरपालिकाया प्रमुख धनश्याम गिरीं सहकारी हस्तान्तरण पूवंक मजूनिगु खँ कनादिसें हस्तान्तरणया लिपांगु चरणय् थ्यंगु खँ कनादीगु दु । लिसें वय्कलं स्थानीय निकाय अन्तर्गत सहकारी वयेवं उकियात माःकथं व्यवस्थित यायेगु निंतिं कर्मचारी निसें ज्याकू तयेगु आदि तयारी जुयाच्वंगु जानकारी बियादीगु दु । वय्कलं चन्द्रागिरी नपा दुने लाःगु १ सय ४० गू सहकारीया दुजःत लिसे सहलह ब्याकेधुनागु व ३६ म्ह दुजः दुगु छगू सञ्जाल नं नीस्वने धुनागु खँ कनादिसें उगु सञ्जालं बिउगु सुझाव कथं ज्या न्ह्याकेगु खँ नं धयादीगु दु । आः नं छुं छुं सहकारी दर्ता यायेमाल धकाः वयाच्वंगु जानकारी बियादिसें वय्कलं ऐन वयेधुंकाः कार्यविधि दयेकाः जक न्हूगु सहकारी दर्ता यायेगु खँ कनादीगु दु ।

वय्कलं सहकारीया व्यवस्थापन यायेगु निंतिं छगू बिस्कं विभाग स्वने धुनागु जानकारी बियादिसें तर उकिया निंतिं माःगु अफिसया व्यवस्था धाःसा यायेत थाकुयाच्वंगु खँ कनादीगु दु । मेखे शंखरापुर नगरपालिकाया नगरप्रमुख सुवर्ण श्रेष्ठं धाःसा सहकारी हस्तान्तरण जुइधुंकूसां नं ज्या धाःसा यायेमफुगु खँ कनादीगु दु । वय्कलं सहकारी स्वइपिं दक्ष जनशक्ति मदुगु धासें उकिया निंतिं छम्ह कर्मचारीयात तालिमया निंतिं छ्वयागु जानकारी बियादीगु दु । सहकारी थःपिनिगु अन्तर्गत वःसां नं उकिया निंतिं खास हे छुं ज्या जुयामच्वंगु जानकारी बियादिसें वय्कलं वइगु वैशाख १ गते लिपा जक सहकारीया प्रक्रिया न्ह्याकेगु कथं तयारी जुयाच्वंगु खँ कनादीगु दु ।

वय्कलं धयादी, ‘अनुभवी कर्मचारी मदु, सरकारं छ्वयाहःसा जिउगु खः, अझ सहकारी विज्ञ छ्वयाहल धाःसा ज्या यायेत अःपुइ ।’ वय्कलं नं स्थानीय वासिन्दा सहकारी दर्ता यायेमाल धकाः वयाच्वंगु जानकारी बियादिसें थुकिया निंतिं छु यायेगु धइगु अलमल जुयाच्वंगु खँ कनादीगु दु । सहकारी थःपिनिगु अन्तर्गत वःसां नं उकिया निंतिं विभाग दयेकेगु वा अफिसया छुं नं ज्या जुयामच्वंगु जानकारी नं वय्कलं बियादीगु दु । वय्कलं धयादिल, ‘दक्ष कर्मचारी वल धाःसा जक प्रक्रिया न्ह्याकेगु जुइ, तालिम काःवंम्ह कर्मचारी गुलि दक्ष जुयाः वइगु खः उकि नं भर परे जुइ ।’हस्तान्तरण जुइधुंकूगु फाइल थःपिंसं स्वयेमलाःनिगु खँ निगुलिं नगरपालिकाया प्रमुखपिंसं स्वीकार यानादीगु दु ।

निम्हेस्यां छप्वाः म्हुतुं धयाथें धयादी, ‘फाइल वयेधुंकूगु दु, अथें पँचिना तयातयेमाःगु अवस्था दु ।’मेखे काठमाडौं जिल्ला सहकारी संघया अध्यक्ष टेकप्रसाद चौरासियां धाःसा स्थानीय निकायलय् सहकारी वःगुलिं ज्या यायेत अःपुइगु बिचाः तयादीगु दु । वय्कःया कथं आः सहकारीयात संघ, प्रदेश व स्थानीय निकायं स्वइगु जुयाः अनुगमन यायेगु ज्या अझ अःपुइ । वय्कलं धयादी, ‘न्हापा ७५ गू जिल्लाया सहकारीयात स्वयेत ३८ गू डिभिजन सहकारी कार्यालय दुगु खः । आः देय् न्यंकं ७५६ स्थानीय निकाय दु, देय्न्यंकंया स्थानीय निकायं सहकारीयात स्वइगु जुयाः अझ अःपुइ ।’ स्थानीय निकायया पहुँच अःपुक हे सहकारीइ लाइगु जूगुलिं अनुगमन यायेगु ज्या नं अःपुइगु खँ कनादिसें वय्कलं थुकिं सहकारीयात व्यवस्थित यायेत अःपुइगु खँ कनादी ।