संघनायक भिक्षु ज्ञानपूर्णिक

#भिक्षु कोन्डण्य

अखिल नेपाल भिक्षु महासंघपाखें २०७६ बैशाख १ गते आइतवाःकुन्हु संघनायक पतिट्ठापनविधिसहित संघसम्मतिंं संघनायक पदवीं विभूषित अति पूजनीय नेपाःया न्हय्म्हम्ह संघनायक, अखिल नेपाल भिक्षु महासंघया संरक्षक अग्गमहापण्डित सासनधज धम्माचरिय भिक्षु ज्ञानपूर्णिक महास्थविरया म्हसीका न्ह्यब्वया ः

यथार्थ इतिहास जीवनया छगू अज्याःगु बाखं खः, कहानी खः गुकिया दुने राष्ट्रिय हित लिसें धर्म, संस्कृति, दर्शन, जातीयता, समाज, भाषा–साहित्य, राजनीति आदि कथहं माः हनाच्वंगु (नालिबेली) आकारप्रकार समाहित जुयाच्वनीगु खःसा थुकिं ईब्यः व थ्वलिसे म्वानाच्वनीगु धाःयात प्रगति व सुधारात्मककथं न्ह्यायेत छगू संवाहकया रूपय् घ्वानाच्वनी, सिचुगु किचः ह्वलाच्वनी ।

ख्यः न्ह्यागु थजुइमा, उगु ख्यःयात सुं गुम्हेसिनं संवाहककथं न्ह्याकेत योगदानपूर्ण ज्याखँ याइ, समर्पित जुयाः न्ह्यायेगु कुतः ब्याकी, उम्हेसित लुमंकेगु व स्मरणीय इतिहासकथं कनेगु, च्वयेगु ज्या न्ह्याकी उम्हेसिया जीवन इतिहासयात जीवन्तता बी, थ्व स्वाभाविक लोकमान्य विधागत च्वज्या खः ।

गबलय् प्रजातन्त्रया लागिं राणा सरकारविरुद्ध सः थ्वयाच्वन, जनचेतनाया लागिं राजनीतिक, सामाजिक, धार्मिक, भाषिकरूपं थःथःगु स्वअस्तित्वलिसे म्हसीका नीस्वने ज्याया लागिं आन्दोलित संघर्षशील पलाः लिसे लिसें बुद्ध–जन्मभूमि नेपालय् स्थविरवाद बुद्धधर्म पुनर्जागरण काल न्ह्यानाच्वंगु ई खः, उगु ईया संघर्षपूर्ण तवरं पुनर्जागरित पुनस्र्थापित जूगु थेरवाद बुद्धशासन इतिहासया जंक्व क्वचाल, चय्दँ फुइधुंकल ।

संघर्षपूर्ण तवरं पुनर्जागरित पुनस्र्थापित जूगु थेरवाद बुद्धशासनिक इतिहासय् धर्मादित्य धर्माचार्य, भिक्षु चन्द्रमणी महास्थविर (बर्मेली, कुशीनगरवासी), न्हापांम्ह प्रव्रजित भिक्षु महाप्रज्ञा (पुनर्जागरित ईया न्हापांम्ह, लिपा बौद्ध ऋषि), भिक्षु अमृतानन्द, अनागारिका धर्मचारी आदिया योगदान च्वछायेबहःजू ।

जुद्ध शमशेर महाराजं आडम्बर–मत प्रचार याःगु द्वपं बिसें ८ म्ह भिक्षु श्रामणेरपिंत वि.सं. २००१ श्रावण १५ कुन्हु देसं हे पितिउँगु खः । वयां लिउ ‘धर्मोदय सभा’ जन्म जुलसा थुकिं बुद्धधर्म व नेपालभाषाया ख्यलय् आन्दोलित मानसिकतायात कःघानाः संगठित जुजुं वनेत माथंवंगु दबू दयेकेगु ज्या जुल अले बहुआयामिक संवाहक स्रष्टात पिलू वल ।

बुद्धधर्मया सवालय् धायेगु खःसा पाल्पाली आचार्य डा. भिक्षु अमृतानन्दयात राष्ट्रिय व अन्तर्राष्ट्रिय रूपं थने हल, सशक्त व प्रभावशाली व्यक्तित्वया हुनिं अन्तर्राष्ट्रिय दबाबमूलक ज्याखँया झ्वलय् श्रीलंकां बौद्ध शुभेच्छुक मण्डल (Goodwill Mission) दुतिंकाः पद्म शमशेर महाराजपाखें पितिउँपिं भिक्षु–श्रामणेरपिंत थःगु देसय् दुहां वयेगु लकस दयेकेगु ऐतिहासिक ज्या जुल ।

भिक्षु अमृतानन्दया व्यक्तित्वं पाल्पाली भिक्षुपिं चुन्द, कुमार काश्यप, विमलानन्दपिं छसिकथं पिलूवःगु खःसा वहे झ्वलय् छम्ह प्रभावशाली व्यक्तित्वया रूपय् भिक्षु ज्ञानपूर्णिक नं पिलू वःगु खः ।बासःदँ स्वयां ताःहाकःगु थःगु जीवन बुद्धशासनिक ख्यलय् समर्पित याःम्ह छम्ह थेरवादी भिक्षु ज्ञानपूर्णिक महास्थविर स्वयं जीवन्त इतिहासय् परिणत जुसें नेपाःया थेरवाद बुद्धशासनिक ख्यलय् छम्ह म्वानाच्वंम्ह इतिहास कथं पिलूबिज्याःगु दु ।

धर्मोदय सभाया झिंछम्हम्ह केन्द्रीय अध्यक्ष जुयाबिज्याःम्ह, अखिल नेपाल भिक्षु महासंघया विनयसम्मति तवरं २०६८ फागुन २६ नेपाःया संघउपनायक जुया बिज्याकम्ह पूज्यपाद महास्थविर भन्ते, नेपाःया खुम्हम्ह संघनायक भिक्षु अश्वघोष महास्थविर वि.सं. २०७५ चैत्र २२ कुन्हु दिवंगत जुइधुंका वि.सं. २०७६ बैशाख १ गते नेपालया न्हय्म्हम्ह संघनायक जुयाबिज्यायेधुंकूगु खः ।

छम्ह सफल व कुशल धर्मदेशक, सशक्त प्रत्यक्ष धर्मप्रवचनया भाय्हिउमि, धर्मब्याख्यानया झ्वलय् प्रभावशाली वक्ता, सफल अनुवादक आदिकथं गुगु प्रभावकारी व्यक्तित्व व प्रेरणादायी म्हसीका दुम्ह वसपोल भिक्षु ज्ञानपूर्णिक महास्थविरया जीवन कहानीं झीत निश्चय नं सिचुका बी, प्रभावित याना बी ।

अबु सूर्यलाल शाक्य व मां चन्द्रमाया शाक्यया कुलय् वि.सं. १९९६ कार्तिक शुक्ल हरिबोधनी एकादशी कुन्हु पाल्पा तानसेनय् हिरालाल शाक्यया जन्म जुल । मध्यमवर्गीय परिवाय् बूम्ह हिरालालं भिक्षु शाक्यानन्द महास्थविरया नेतृत्वय् स्थापित शील पाठशालाय् प्यंगू तगिं तक ब्वनेखन ।

जातीय बौद्ध, विहार विहारय् वनेगु चलन, थेरवाद भिक्षुपिं दुतिनाः इलय् ब्यलय् धर्मप्रचार न्ह्यानाच्वंबलय् हिरालालया नं म्हासुगु वसः पुनेगु इच्छा ब्वलन । गुच्चा म्हिते मगाःनिबलय् सांसारिक जीवनं मुक्त जुइगु सिबें बाह्य प्रभावं हिरालालया नुगलय् भय्बिउगु म्हासुगु वसः पुनेगु अभिलाषा मामं पूवंका बिल (मां चन्द्रमाया, गुम्ह लिपा अनागारिका प्रव्रजित जूगु खः) ।

वि.सं. २००६ पाखे भिक्षु बुद्धघोष महास्थविर पाल्पा तानसेन बिज्याःबलय् थ्यमथ्यं ११ दँ तिनि दुम्ह हिरालालयात बुद्धशासनिक आज्जु तसें मांम्हं भन्तेया ल्हातय् जिम्मेवारीपूर्वक लःल्हात । म्हधिकः बागःचाम्ह, तुइसे, मिखा ततःग्व, मचांनिसें ब्वनेगुली जाःम्ह हिरालालं यलया सुमंगल विहारय् गुरु बुद्धघोष भन्ते (दिवंगत न्याम्हम्ह संघनायक) या छत्रछाँयाय् बुद्धशिक्षा व पालिभाय् सयेकल ।

१६ दँ ति दुबलय् बुद्धघोष भन्तें हिरालालयात बर्मा ब्वनायंकल । राजधानीस्थित गभाय् जम्बुद्विप च्याउँछ्याउँ विहारय् अग्रमहापण्डित विद्यालंकार भिक्षु विशुद्धाभिवंश महास्थविरया उपाध्यायत्वय् श्रामणेर प्रवज्या दीक्षा बिल । हिरालालया मचांनिसें नुगलय् भय्बियाच्वंगु प्रव्रजितदीक्षा वि.सं. २०१३ श्रावण शुक्ल नवमि कुन्हु प्राप्त जुल ।

अले श्रामणेर ञाणपूण्णिक वा श्रामणेर ज्ञानपूर्णिक हिरालालया न्हूगु नां जुल । पालि भाय् व धर्मया अध्ययनय् न्ह्यब्वात । शाक्यसिंहय् श्रामणेर शिक्षा तगिं पास जुल । २०१५ साल चैत्र चतुर्थी कुन्हु यांगुनया गभाय् महाखण्डसीमाय् अभिधज महाराष्ट्रगुरु अग्रमहापण्डित सुरियाभिवंशया उपाध्यायत्वय् श्रामणेर ज्ञानपूर्णिक उपसम्पदादीक्षा प्राप्त यासें पूर्णरूपं २२७ गू भिक्षुविनयसहित (प्रातिमोक्षशील) उपसम्पन्न भिक्षु जुल ।

अध्ययनय् नुगः क्वसाःम्ह भिक्षु ज्ञानपूर्णिकं धार्मिक अध्ययनयात क्वातुक न्ह्याकां तुं च्वन, बर्माया सरकारी पालि विश्वविद्यालयपाखें ईश्वी सम्बत् १९६३ स ‘सासनधज धम्माचरिय’ उपाधि परीक्षा उत्तीर्ण जुसें बुद्धशासनया ध्वाँय् ब्वयेकीम्ह गुरु जुइगु छुमां (संकेत) बिसें नांयात ल्वःकथं ज्ञानपूर्णिक धाथें हे ज्ञांजाः जुइगु लुँपुइ न्ह्यात, थुकथं नेपाःया न्हापांम्ह शासनध्वज धर्माचार्य भिक्षु जुइगु ह्वःताः चूलात ।

धर्मया उच्च अध्ययनं लिउ ईश्वी संवत् १९६४–१९६६ तक पालि बर्मेली शब्दकोष निर्माण ज्याय् ल्हाः न्ह्याकल । ईश्वी सम्वत् १९६७ स वाराणसेय संस्कृत विश्वविद्यालयं संस्कृत विषयय् डिप्लोमा ब्वन । थुकथं झण्डै १२ दँया धर्माध्ययनं लिउ वि.सं. २०२४ पाखे नेपाः लिथ्यन । उबलय् नेपालभाषा व साहित्य लिसें धर्मया ख्यलय् च्वमि व वक्ताकथं थःगु म्हसीका स्थापित श्रामणेर सुदर्शन (दि. भिक्षु सुदर्शन महास्थविर) लिसेया स्वापू क्वातुया वन ।

अथे ला छम्ह हे गुरुया शिष्य सहोदर गुरुभाइ नं खः । वि.सं. २०२६ सालय् ‘पायासि सुत्त’ नेपालभाषाय् अनूदित सफूकथं पिलूबलय् ब्वंमितय्सं भिक्षु ज्ञानपूर्णिकया अनुवाद कुशलता नं म्हसीके खन । थ्वयां लिउ ‘अहिंसा विजय’ नांगु देवदत्तया विद्रोही चारित्रिक चित्रण सफू लेखन व सम्पादकीय शैलीं पिदंगु खः ।

थुकथं भिक्षु ज्ञानपूर्णिकं अनुवाद विधायात बःकासें दिपाः मदयेक सफू पिथनाः बौद्ध साहित्य भण्डार (विशेषतः नेपालभाषाय्) तःमि यायेगु ज्याखँय् न्ह्याःगु पलाः अद्यावधि न्ह्याना हे च्वंगु दनि । नेपाः लिथ्यनेधुंकाः थीथी विहारय् च्वन–भिक्षु ज्ञानपूर्णिक महास्थविर । श्रामणेर सुदर्शनया हस्ते–हैस्तेपाखें नेपाःया सरकारीस्तरीय एसएलसी परीक्षा बीत तयार जुल ।

३१ दँया उमेरय् उगु परीक्षा पास नं जुल । आइ.ए.ब्वन, सन् १९७७ स बी.ए. पास जुल । एम.ए. तक नं ब्वंगु खः, तर दथुइ त्वःतल । बुलुहुँ नेपालय् स्थापित भिक्षु जुइगु झ्वःलिसे भिक्षु र वे थ्वनं साहसिक अनागारिका धम्मवतीया संघर्षपूर्ण धर्मयात्रा विषयस बर्मी भासं च्वयातःगु लोकंह्वाःगु उपन्यास ‘यःम्ह म्ह्याय्’ (तम्हि छेत्) नेपालभाषाय् अनुवाद यानाः ने.सं. १०९० स च्वसापासां बीगु सम्मानित श्रेष्ठ सिरपालं छाये पिउगु खःसा उकिया नापनापं छम्ह सशक्त भाय्हिउमिया रूपय् वसपोलया म्हसीका नं न्यनावन ।

नेपालभाषा, नेपाली, पालि, बर्मिज, संस्कृत, अंग्रेजी, हिन्दी भासं सलल न्ववायेगु च्वयेगु कुशलता दुम्ह भिक्षु ज्ञानपूर्णिकं पालि भाय्या सूत्र नेपालभाषाय् नं हयादिल । थौंतक पिदंगु ५० गू प्रकाशन धलखय् मिखा ब्वयेगु खःसा बर्मीज भासं च्वयातःगु आपालं मूवंगु धार्मिक सफूत नेपालभाषाय् ल्ह्ययातःगु खनेदु ।

भिक्षु ज्ञानपूर्णिक नेपाल संवत् ११०८ स मूलपालि नापं नेपालभाषाय् उभयप्रातमोक्ष नांगु विनय पिटकअन्तर्गत छगू अंश सफू भाय् हिउगु खः । ३२६ पौया थ्व अनूदित सफुति राष्ट्रिय व अन्तर्राष्ट्रिय ख्यातिप्राप्त भिक्षु अमृतानन्दं ६२ पृष्ठया स्यल्लाःगु भूमिका च्वसें थथे धयाबिज्याःगु दु, “वर्तमान इतिहासय् थेरवाद बुद्ध–शासन नेपाः गालय् दुहां वयाः न्यय्दँ मदयेकाः तिनि बल्लबल्ल भिक्षुपिंत अथवा बुद्धशासनयात दयेकं मगाःगु प्रातिमोक्ष सफू झीगु मांभासय् थौं दत ।

नेपाल बुद्धशासनया निंतिं थ्व साप तःधंगु उपलब्धि खः तथा अनुवादक आयुष्मान्या थ्व अति तःधंगु देन खः । आः धाःसा आशा काये फइ कि नेपाल थेरवादी भिक्षुपिनि जीवन पद्धतिइ नं छुं सुधार जुयाः विनयानुरूपं प्रतिपत्तिलय् छुं सुधार जुइ ।

आशा दु कि शासनध्वज धर्माचार्य थेंज्याःगु पदं सुशोभितं जुया बिज्याःम्ह विनयधर, धर्मधर तथा विद्वान जुयाबिज्याःम्ह आयुष्मान् ज्ञानपूर्णिकया अनुवादसहितगु थ्व प्रातिमोक्षयात प्रत्येक थेरवाद–शासनप्रति ममता तइपिं उपासक उपासिका तथा दातापिंसं कमसेकम
छधाः जक जूसां ब्वनादिल धाःसा नेपाल थेरवाद बुद्धशासनया लागिं तिबः बिउगु जूवनी ।

भिक्षुपिनि निंतिं ला धाये हे माःगु मखु ।” थ्वयां लिउ ने.सं. ११२१ स बुद्धवचन पालि त्रिपिटकअन्तर्गत सूत्रपिटक खुद्दनिकायया झिगूगु ग्रन्थ जातकपालि (न्हापांगु द्या, ४६९ ल्याः) भिक्षु सुदर्शनया प्रेरणाकथं भिक्षु ज्ञानपूर्णिक नेपालभाषाय् अनुवाद यायेत सफल जुल सा नेपालय् त्रिपिटक प्रकाशन संस्थाकथं म्हसिका दुगु वीरपूर्ण पुस्तक संग्रहालयपाखें ने.सं. ११३७ स प्रतिसम्भिदामार्ग (ल्याः ४६०) नं अनूदित जुया पिदनेधुंकूगु जुल ।

नेपालभाषाय् बुद्धवचन त्रिपिटकया मूल अनुवाद विधाया खँय् दुण्डबहादुर वज्राचार्यया योगदान न्ह्याबलें लुमंके बहःजू ।भिक्षु ज्ञानपूर्णिक अभिधर्मया ब्याख्याता नं खः । अभिधर्मार्थ संग्रह (सम्पूर्ण) मूलपालि शब्दार्थ व भावार्थ नेपाल संवत् १११३ स पिदंगु खः सा ने.सं. ११३१ स आचरणीय व्यावहारिक अभिधर्म पिदंगु खः ।

महान सल्लेख सूत्रोपदेश निद्या, वम्मिक सूत्र, महान धर्मचक्र सूत्रोपश, महास्मृतिप्रस्थान सूत्र पालि शब्दार्थ व अभिप्राय, कर्म व मनुष्य आदि भिक्षु ज्ञानपूर्णिकया कुशल अनुवादकीय कृतित खः ।

करिब खुसः पृष्ठया न्हूगु परित्राण निश्चय नं भिक्षु ज्ञानपूर्णिकया अनुवाद कृतिमध्यय् दक्कलय् तपँगु सफू खःसा परित्राण थेंज्याःगु उगु सफुति उल्लेख्य शब्दार्थ, भावार्थ, तŒवार्थ व अभिप्रायार्थसमेत न्ह्यथनाः अझ थीथी उदाहरणसहित बाखं व त्रिपिटक प्रसङ्ग प्रमाण हे न्ह्यब्वयातःगु सफूया अनुवाद कार्य व प्रकाशन स्वयं ऐतिहासिक घटना खः ।

अनुवादक भिक्षु ज्ञानपूर्णिकया नेपाली भासं अनूदित बुद्ध र बुद्धवाद, प्रतीत्यसमुत्पाद महान उपदेश, कथावस्तुद्वारा उपदेशित अनुशासन आदि महत्वपूर्ण कृति खः । वस्तुतः भिक्षु ज्ञानपूर्णिक सफूया सफल भाय्हिलामि जक मखु प्रत्यक्ष धर्मप्रवचनया सशक्त प्रभावशाली प्रवचन अनुवादक नं खः ।

भिक्षु ज्ञानपूर्णिकया बर्माया प्रसिद्ध ध्यान केन्द्र महाशी शासनयैतां विपश्यना ध्यानया ख्यलय् ओवादाचार्य व कर्मस्थानाचार्य उपाधि देछानातःगु खयानं नेपालय् ध्यान गुरुया रूपय् बिस्कं म्हसीका स्थापित यायेगु ज्या मन्ह्यात वा न्ह्याकेगु लकस मदयावन ।

अथे खःसां भिक्षु ज्ञानपूर्णिक सन् १९९१ स विश्वप्रसिद्ध ध्यान गुरु महासि सयादोया धर्मदूत मण्डलया दुजः जुसें एशिया, युरोप व अमेरिकाय् ध्यानसम्बन्धी अंग्रेजी भासं प्रत्यक्ष धर्मप्रवचनया भाषा परिवर्तक जुसें तःदँतक धार्मिक सेवा याःगुलिं अन्तर्राष्ट्रिय ख्यलय् नं थःगु म्हसीका स्थापित याःगु दु ।

विशेषतः थौंकन्हय् तक नं मलेसियाय् ध्यानगुरु व धर्म प्रवचककथं भिक्षु ज्ञानपूर्णिकया धर्मयात्रा न्ह्यानाच्वंगु दु । नेपालय् थेरवाद बुद्धधर्मयात गुलुलल् तुइक न्ह्यज्याकेगु झ्वलय् भिक्षु ज्ञानपूर्णिकपाखें वि.सं. २०४१ सालय् न्हूगु बानेश्वरस्थित मीनभवनय् विश्वशान्ति विहारया स्थापनां लिउ बुद्धशासनिक ज्याखँय् ब्यवस्थित रूपंन्ह्याना वनेत ह्वःताः चूलानावनी, झिदँया दुने न्हूगु भौतिक संरचनागतरूपं विहारया पुनःनिर्माण ज्या विशेषतः सिंगापुर व मलेशियाली दातापिनि श्रद्धां सम्भव जूगु खःसा २०५३ सालय् उगु हे विहारय् विश्वशान्ति बौद्ध शिक्षालय नीस्वनेत सफल जुल ।

मचापिं, बःचाधिकःपिं श्रामणेरदीक्षा व अनागारिका दीक्षा प्रदान यासें बुद्धधर्म व सरकारीस्तरीय शिक्षा नापनापं ब्वनेगु सुविधां लिउ स्वयं विहार भौतिक संरचनागतरूपं सम्पन्नलिसें आध्यात्मिक चर्याया अभ्यास क्षेत्रकथं नेपाःया हे छगू नमूना विहारया रूपय् धिसिलाक थनेगुली भिक्षु ज्ञानपूर्णिकय योगदान तसकं च्वछायेबहःजू ।

भिक्षु ज्ञानपूर्णिक युवक बौद्ध मण्डल थ्ःद्यब् थेंज्याःगु संस्थाया संस्थापक अध्यक्ष खःसा मणिमण्डप विहार व वेलुवनाराम विहारया प्रणेता खः । अखिल नेपाल भिक्षु महासंघया सचिव थेंज्याःगु जिम्मेवारी २० दँ तक क्वबिउम्ह भिक्षु ज्ञानपूर्णिक निवर्तमान अध्यक्ष नं खः । नेपाल बौद्ध परियत्ति शिक्षाया स्थापना कालंनिसें थीथी पदीय अभिभारा क्वबियाः शिक्षाध्यक्षकथं नं योगदान बिउगु नं न्ह्यथनेबहःगु पलाः खः ।

थीथी विहारय् बौद्ध संस्थाया धर्मानुशासक, संरक्षक आदि पदय् आसीन जुयाः आपालं राष्ट्रिय व अन्तर्राष्ट्रिय बौद्ध सभा–सम्मेलनय् ब्वति कायेधुंकूम्ह भिक्षु ज्ञानपूर्णिकं दकलय् न्हापां सन् १९७९ स मंगोलियाया उलानबतोरय् जूगु सम्मेलनय् ब्वति काःगु खःसा आपालं अन्तर्राष्ट्रिय बौद्ध सम्मेलनय् ब्वति कयातुं च्वनाबिज्याःगु दु ।

भिक्षु ज्ञानपूर्णिकं बुद्ध जन्मभूमि नेपाः देसय् धर्मया माध्यमं थीथी विधाय् बिउगु योगदानयात कःघासें म्यानमार सरकारं सन् २००१ स ‘अग्गमहासद्धम्म–जोतिकधज’, सन् २०१३ स ‘अग्गमहापण्डित’ उपाधिं’ छायेपिउगु नेपाःया लागिं धार्मिक गौरवया विषय खः । थथे हे थाइलैण्डस्थित महाचुलालंकर्ण व महामकूट बौद्ध विश्वविद्यालयपाखें मानार्थ विद्यावारिधि उपाधिं छायेप्यूग खः ।

स्वयम्भू ज्ञानमाला भजन खलःपाखे २०५८ स ज्ञानमाला रत्नवत सिरपाः, धर्मोदय सभापाखें धर्मोदय धर्मसम्मान सिरपाः, धर्मबहादुर धाख्वाः कल्याण कोष सिरपाःपाखें छाय्पियातःम्ह वसपोलयात अखिल नेपाल भिक्षु महासंघपाखे २०५८ बैशाख १, २०७० बैशाख २८ सार्वजनिकरूपं धार्मिक अभिनन्दन याःगु खःसा लिसेलिसें मेमेगु संघसंस्था व विहारपाखें नं अभिनन्दन याःगु खः ।

दिवंगत पूज्यपाद ऐतिहासिक त्रिपिटकाचार्य भिक्षु कुमार काश्यप महास्थविरया अध्यक्षताय् भिक्षु ज्ञानपूर्णिक महास्थविर उपसम्पन्न स्वर्णदिवस समारोह समितिं २०६५ चैत्र ३० कुन्हु तःजिक ग्वसाः ग्वःगु अभिनन्दन समारोहस सम्माननीय राष्ट्रपति डा. रामवरण यादवया उपस्थितिस ११३ बौद्ध संघसंस्थां वसपोलया बुद्धशासनिक व्यक्तित्व कृतित्वयात लुमंकुसें भिंउसाँय्, ताःआयु व उत्तरोत्तर शासनिक अभिबृद्धिया लागिं दुनुगलंनिसें भिंतुगु थ्व इलय् लुमंके बहःजू ।

समग्रं धायेगु खःसा कुशल व प्रभावशाली धर्मदेशक भिक्षु ज्ञानपूर्णिकया प्रव्रजित जीवन यात्रा ख्वीनिदँ स्वयां अप्वः दयेधुंकूगु खःसा पूर्ण भिक्षुत्व उपसम्पदादीक्षा प्राप्त याःगु नं ख्वीदँ क्यन । अले भिक्षुत्वय् पलाः छिउगु लिसें श्रामणेर जीवनय् दुतिनाः बुद्धशासनिक ख्यलय् गुगु च्वछायेबहःगु योगदान यात उपिं ज्याखँ नांयात ल्वःकथं ज्ञानपूर्णिक ज्ञांजाःजुसें स्वयं जीवन्त इतिहासय् परिणत जुल श्रद्धेय नेपाःया न्हय्म्हम्ह संघनायक भिक्षु ज्ञानपूर्णिक महास्थविर ।

चिरं जीवतु थेरो संघनायको, सुखितो निरूपद्दवो
खेमी अवेरी अभयो, निद्दुक्खो रोगमुत्तको ।।

 

सम्बन्धित बुखँ

LEAVE YOUR COMMENTS