ख्वःसिं नयाया फाइदा व उकी दुगु वासःया गुण

ड्राइ फ्रुट्स गथे कि ख्वःसिं, मुनक्का, मस्र्याबरां, काजु, अजीर, पेस्ता, छोहरा आदि तसकं हे तागत दुगु चीज खः । थुकी न्ह्यपु व नुगःस्येँयात बल्लाकेत माःगु दक्वं हे गुण दु । थुकिं म्हयात यक्व हे इनर्जी बी । थुकिया सेवनं म्हया ल्वय्लिसे ल्वायेगु क्षमता अप्वयावइ ।

आयुर्वेदय् धयातःकथं ख्वःसिं पचय् याये थाकुगु अले कफ व पित्त अप्वयेकीगु चीज खःसां कब्जियत लंकेगु गुण नं थुकी दु । मस्र्याबरां धुंकाः दकलय् नांजाःगु ड्राइफ्रुट्स ख्वसिं हे खः । थ्व स्वास्थ्य व चिकित्साया निंतिं थुलि महत्वपूर्ण फल खः कि थुकिया गुणयात जक कयाः छगू सफू हे च्वये फइ । थुकी प्रशस्त मात्राय् क्यालोरी दुगुलिं थ्व सम्पूर्ण आहार खः । बांलाःगु स्वास्थयया निंतिं छु छु भिटामिन, मिनरल व फायट मालीगु खः व दक्वं सन्तुलित मात्राय् ख्वःसिंलय् दु ।

ख्वःसिं ख्वाउँगु पहाडी प्रदेशय् हे सइ । अथे जुयाः थ्व गरम स्वभावयागु जुइ । अथे जुयाः तांन्वःगु थासय्च्वंपिंसं थ्व नये मजिउ । अथेहे पाचन शक्ति बमलाःपिंसं नं नयेमजिउ । ख्वःसिं चिकुलां नयेगु यायेमाः । ख्वःसि. नयेगु बांलाःगु ई सुथय् खालि प्वाथय् हे खः ।

ख्वःसिं नयाया फाइदा
– ख्वःसि. २५ ग्रामया मात्राय् न्हिं न्हिं नयेगु यानाच्वन धाःसा न्ह्यपु फ्रेस जुयाच्वनी, गुकिं यानाः मानसिक विकार मदयावनी ।

– लुमंकेगु क्षमता कम जुया वनाच्वंगु दुसा ख्वःसि.२५ ग्राम सुथय् ज्यःनां यायेबलय् हे नयेगु यानादिसँ, फाइदा जुइ । मचा, ल्याय्म्ह, बुरा, न्ह्यागु हे उमेरयापिंसं नं थथे यानाः नल धाःसा दिमाग थिनावइ । लिसें नुगःस्येँ नं बल्लाकी ।

– डायबिटिजया ल्वगितय्त नं थुकिं यक्व हे फाइदा याः । यदि छितः हाइब्लड प्रेसरया समस्यादुसा उकियात नियन्त्रित यायेत नं थुकिं ग्वाहालि याइ । ख्वःसिंलय् दुगु फायट व पौष्टिक तत्वं म्हय् इन्सुलिनया मात्रा सन्तुलित यायेत ग्वाहालि याइ ।

– ख्वसिंलय् यक्व मात्राय् फाइबर दु । थुकिं यानाः छितः नये पित्याके बीमखु । अथे जुइबलय् छिं कम जक नयेगु यानादी, गुकिं यानाः छिगु म्हया ताल अप्वः जुइमखु । उलि जक मखु, उकी दुगु फाइबरं छिगु प्वाथय् जुइगु कब्जियत, एसिडिटी थेंज्याःगु समस्या नं मदयेकाबी । तौल कम यायेत जा नये न्ह्यः ख्वःसिं भपियादिसँ, वयां लिपा मखु ।

– क्याल्सियम क्वँय्यात बल्लाकीगु छगू महत्वपूर्ण तत्व खः, गुगु ख्वःसिंलय् प्रशस्त मात्राय् दइ । अथे जुयाः थ्व बल्लाःगु क्वँय्या निंतिं नं ज्या वः ।

– ख्वःसिं २५ ग्राम व मुनक्का ५ ग्राम नापं तयाः न्हिं न्हिं नयेगु यात धाःसा म्ह बल्लानावइ ।

– ख्वःसिं ५० ग्राम, छोहरा ४० ग्राम कयाः घ्यः भतिचाय् निनाः मिश्री ल्वाकछ्यानाः तयातइदिसँ । थुकिया २५ ग्रामया मात्रा न्हिं न्हिं नयाच्वन धाःसा प्रमेह अर्थात याकनं याकनं च्व फायेमालीगु ल्वय् लानावनी । तर थ्वयां लिपा दुरु त्वने मजिउ ।

– मस्तय् प्वाथय् की दायाच्वंगु दुसा ख्वःसिं छगः तछ्यानाः नकाः वयां लिपा लुमुलुम धाःगु दुरु त्वंकादिसँ ।

– छुयातःगु ख्वःसिं नं सर्दि यानाः वःगु मुसुयात लंका बी ।

– ख्वःसिंयात एन्टिक्यान्सर फुड्स धकाः नं धाः । छाय्कि थुकी प्रशस्त मात्राय् एन्टिअक्सिडेन्ट कम्पाउन्ड दु । थुकिया सेवन यायेबलय् प्रोस्टेट व ब्रेस्ट क्यान्सर जुइगु खतरायात पनेफइ ।

– ख्वःसिं नं न्ह्यः नं बांलाक वयेकाबी । थुकी मेलाटोनिन हारमोन दइ, गुकिं न्ह्यःयात प्रेरित याइ । अथे जुयाः बहनी द्यने त्ययेकाः ख्वःसिं नयेगुयात धाःसा न्ह्यः क्वातुक वइ ।

– प्यंगःख्वःसिं तछ्यानाः वःगु ला निनाः बागू लीटर दुरुइ दायेकादिसँ । थुकी २ रति केशर व सवाः कथं चिनि तयाः त्वनादिसँ । म्हय् तागत दयावइ ।

– १० ग्राम ख्वःसिंया ला, न्यागः मस्र्याबरां, झिगः मुनक्का थ्व स्वतां न्हिं न्हिं सुथ् नयाः दुरु छगू कप त्वनादिसँ । थुकिं यानाः छिगु म्ह बल्लानावइ ।