काश्मिरय् सेना व विद्रोही दथुइ झडप

भारतया काश्मिरय् सुरक्षा फौज व पृथकतावादीतय् दथुइ झडप जूगु दु । स्वंगू थीथी थासय् जूगु झडपय् लानाः झिंछम्ह पृथकतावादी सीधुंकूगु खँ धाःगु दु । झडप लिपा स्थानीय मनूत पिहां तकं वयेमफयाच्वंगु खँ धाःगु दु । सुरक्षाकर्मीतय्सं शोपियां जिल्लाया छगू गां घेरे यानातःगु दु । जम्मु काश्मिरया प्रहरी डिजीपी एसपी वैद्यं पत्रकारत लिसें खँ ल्हासें झिंछम्ह पृथकतावदीत लिसें स्वंम्ह सैनिक व निम्ह आम नागरिक सीगु जानकारी बियादीगु दु । शनिवाः चान्हय् श्रीनगरं ५० किमि तापाक लाःगु शोपियां जिल्लाया द्रागडा धाःगु गामय् पृथकतावादीत सुलाच्वंगु जानकारी वयेवं सेनां कारवाही न्ह्याकूगु खः ।
डिजीपी वैद्ययया कथं द्रागडा गामय् जूगु झडपय् न्हय्म्ह पृथकतावादी सीगु खःसा अनंतनागया दायलगाम छम्ह पृथकतावादी सीगु खः । डिजीपी वैद्यं कचडोरा धाःगु गामय् आम नागरिकत फँसे जुयाच्वंगु धासें उमित उद्धारया निंतिं कुतः जुयाच्वंगु ट्विट यानादीगु दु ।