कोरियन सपय् अनुगमनया शिलबन्दी

येँ – वाणिज्य, आपूर्ति तथा उपभोक्ता संरक्षण विभागं उपभोक्तायात थिकेगु भावं सामान मिउगु धासें जमलय् च्वंगु ‘द कोरियन सप’य् म्हिगः तालं ग्वया बिउगु दु । विभागया पुचलं अनुमगनया झ्वलय् उगु पसःया सञ्चालकं ५ सय प्रतिशत तक अप्वः भाः कयाः सामान मिउगु लुइकूगु खः ।

कोरियन सपं उपभोक्तायाके अप्वः भाः कयाः सामान मियाच्वंगु उजुरी वयेवं विभागं अनुगमन यानाः पसः शिलबन्दी यानाबिउगु खः ।
न्याःगु भाः स्वयां अप्वः मू तयाः सामान मियाच्वंगु अनुगमनय् खनेदुगुलिं शिलबन्दी यानागु खँ विभागं धाःगु दु । विभागया कथं उगु पसलं ७० निसें ५ सय प्रतिशत मुनाफा तयाः सामान मियाच्वंगु खः ।

उपभोक्ता संरक्षण ऐन, २०७५, कालोबजारी ऐन लिसें सामाजिक अपराध ऐन बमोजिम पसःया सञ्चालकयात कारबाही जुइगु खँ विभागं धाःगु दु । कालोबजारी ऐन कथं व्यापारीं उपभोक्तायाके २० प्रतिशत स्वयां अप्वः लबः नयेमदु ।