अमेरिकाया द्वपं चीनपाखें खण्डन

बेइजिङ – अमेरिकी राष्ट्रपति डोनाल्ड ट्रम्पं अमेरिकी निर्वाचनय् चीनं हस्तक्षेप याःगु धकाः बिउगु द्वपंया खण्डन याःगु दु । राष्ट्रपति ट्रम्पं चीनं अमेरिकी निर्वाचनया तथ्यांकय् हस्तक्षेप याःगु धकाः बिउगु द्वपंयात चीनं ‘पूर्णरुपं कपोल कल्पित व निराधार’ जूगु धासें उकिया खण्डन याःगु खः ।

ट्रम्पं मध्यावधि निर्वाचन स्वयां न्ह्यः मतदाता ठगी बारे थःगु पुलांगु व आधारहीन दावी हाकनं दोहोरे याःगु खः । गुकिं यानाः ट्रम्पयात हाकनं थप विवादित याइगु अपेक्षा नं यानाहःगु दु ।

ट्रम्पं वंगु विहीवाः ह्वाइट हाउसय् याःगु संबोधनय् अमेरिकी निर्वाचन प्रणाली ग्यानापुसे च्वंक जोखिमय् लानाच्वंगु धाःगु खः । लिसें ट्रम्पं कानुनया निर्मातातय्त मतदानय् न्हूगु प्रतिबन्ध लागु यायेत नं आह्वान याःगु खः । यद्यपि ट्रम्पया थुगु आह्वानयात वयागु थःगु हे पार्टी रिपब्लिकन दुने नं खास हे रुचि तयाच्वंगु व ययेकाच्वंगु धाःसा मदु ।

चीनं अवैध रुपय् २२ गू करोड मतदाता फाइलत प्राप्त याःगु व उकियात क्यनेगु जासुसी जानकारीयात वर्गीकरण मयाःगु नं द्वपं ट्रम्पं बिउगु खः ।