अमेरिकाया २५० क्वःगु स्वतन्त्रता दिवस

वाशिंगटन – अमेरिका बेलायतया उपनिवेशपाखें स्वतन्त्र जूगु २५० दँ क्यंगु दु । थ्व लसताय् अमेरिकां थःगु स्वतन्त्रताया २५० दँ थ्यंगु लसताय् देय्‌न्यंकं ऐतिहासिक ‘अमेरिक २५०’ उत्सव हंगु दु ।

सन् १७७६ जुलाई ४ य् उत्तर अमेरिकाया १३ गू बेलायती उपनिवेशतय्सं स्वतन्त्रताया घोषणा यासें बेलायतपाखें अलग जुइगु निर्णय याःगु खः । थ्व हे ऐतिहासिक दिंया लसताय् देय्‌न्यंकं आतिशबाजी, हवाइ प्रदर्शन, संगीतिक ज्याझ्वःलिसे परेडया ज्याझ्वः याःगु खः । खराब मौसमया दथुइ नं उगु लसताया ज्याझ्वः जूगु खःसा छुं छुं थासय् धाःसा प्रभावि जुल । तसकं तांन्वःगु, वाफय् आदि खराब मौसमया कारणं ज्याझ्वः प्रभावित जूसां लखौं मनूत उत्सवय् सहभागि जूगु खः ।

राजधानी वाशिंगटनय् च्वंगु नेशनल मलय् शनिवाः बहनि ग्वसाः ग्वःगु ह्वाइट हाउसया ‘फ्रिडम २५०’ उत्सव तसकं वाफय् वःगुलिं छुं ईया निंतिं ज्याझ्वः अवरुद्ध जूगु खः। ९ः४५ लिपा मौसमय् सुधार जुइवं मलया लुखात चायेकूगु खःसा ११ः१५ ताः इलय् राष्ट्रपति डोनाल्ड ट्रम्प दबुलिइ खने दयेकः वःगु खः । ट्रम्पं खराब मौसमया दथुइ नं वाशिंगटनय् जूगु ज्याझ्वलय् संबोधन याःगु खः ।

४० मिनेट तक याःगु भाषणय् ट्रम्पं खराब मौसमया दथुइ नं च्वनाच्वंपिंत सुभाय् देछासे थः छम्ह कर्मचारीं ज्याझ्वः लिछ्यायेत बिउगु सुझावयात थम्हं अस्वीकार यानागु खँ धाःगु खः ।