किम नापलायेत ट्रम्प उत्सुक

अमेरिकी राष्ट्रपति डोनाल्ड ट्रम्पं उत्तर कोरियाया सर्वोच्च नेता किम जङ अनयात नापलायेत थः उत्सुक जूगु खँ धयादीगु दु । किमया चीन भ्रमण तसकं सफल जूगु धयागु ट्रम्पयात जानकारी बीधुंकाः थ्व ट्रम्पया थ्व धापू वःगु खः । तर ट्रम्पं वार्ता न्ह्यः नं उत्तर कोरिया विरुद्ध तयातःगु नाकाबन्दी व दबाब धाःसा जारी हे जुयाच्वनीगु खँ धयादीगु दु । थ्व झ्वलय् वय्कलं उत्तर कोरियाली प्रायद्वीपय निसशस्त्रीकरण आः सम्भव जूगु टिप्पणी नं यानादीगु दु ।उत्तर कोरियाली नेता सोमवाः बेइजिङ भ्रमणय् वंगु खः । किम व वय्कःया कलाःयात बेइजिङ गार्ड अफ अनर बियाः सम्मान याःगु खः । थ्व भ्रमणया झ्वलय् किमं थः निसशस्त्रीकरणया निंतिं प्रतिबद्ध दु धयादीगु खँ पिहां वयाच्वंगु दु । बेइजिङय् उत्तर कोरियाली नेता व चिनिया नेता दथुइ जूगु वार्तायात कयाः बांलाःगु व प्रगतिया खँ पिहां वयेवं बुधवाः ट्रम्पं थुकियात लसकुस यानादीगु खः ।ट्रम्पं ट्विट यासें धाःगु दु, ‘किम जङ अनयात थः जनता व मानवताया निंतिं बांलाःगु ज्या यायेगु अवसर वःगु दु ।’ अथेहे मेगु ट्विटय् किम थःलिसे नापलायेगु ई पियाच्वंगु खँ नं धयादीगु खः । ट्रम्प व किम दथुइ वइगु मे महिनाय् वार्ता यायेगु तयारी जुयाच्वंगु दु । ट्रम्पं अप्रत्याशित रुपं किमयात नापलायेत तयार जूगु खँय् यक्व विश्लेषकत आश्चर्यचकित जुयाच्वंगु दु । यदि थ्व भेटवार्ता जुल धाःसा ट्रम्प सुं नं उत्तर कोरियाली सर्वोच्च नेता नापलाःम्ह न्हापांम्ह बहालवाला अमेरिकी राष्ट्रपति जुइ ।