अफगानिस्तानय् गैरसैनिक विमानं नं उद्धार याइगु

एजेन्सी- अफगानिस्तानया काबुलय् च्वंगु हामिद कारजाइ विमानस्थल लागाय् अफगानी सुरक्षाकर्मी व अज्ञात पुचः दथुइ सोमवाः स्थानीय ईकथं सुथसिया ४ ताः इलय् गोली हानाहान जूगु दु । विमानस्थलया उत्तरी गेटय् सुरक्षाकर्मी व अज्ञात पुचःया दथुइ गोली हानाहान जूगु खःसा गोलीं लानाः छम्ह सुरक्षाकर्मी सीगु दु । मेपिं स्वम्ह सुरक्षाकर्मी घाःपाः जूगु दु । गोली हानाहान जुइधुंकाः अमेरिकी सेना व जर्मन सेनां नं जवाफी कारवाही याःगु खः ।

अफगानिस्तानयात तालिबानं कब्जाय् कायेधुंकाः देय् त्वःतीपिं मनूतय्गु हुल काबुल विमानस्थलय् कम जूगु मदुनि । समाचार संस्था रोयर्टसयात नेटों बिउगु जानकारीकथं विमानस्थलय् जूगु गोलीप्रहार व भागदौडय् लानाः छवाःया दुने नीम्हसिबें अप्वः मनूत सीधुंकूगु दु ।

उद्धारया निंतिं विमानस्थलय् ४५ सय अमेरिकी सेना व ९ सय बेलायतया सेना परिचालन जुयाच्वंगु दुसा तालिबानं अफगानी नागरिकतय्त विमानस्थलय् वनेत पनाच्वंगु समाचार नं थीथी सञ्चार माध्यमय् वयाच्वंगु दु । थ्वया हे दथुइ अमेरिकां अफगानिस्तानया मनूतय्गु उद्धारया निंतिं गैरसैनिक विमान नं छ्यलीगु जूगु दु ।

अमेरिकी रक्षा मन्त्रालय पेन्टागनं मेगु १८ गः विमान छ्यलाः मनूतय्त उद्धार यानाः सुरक्षित देसय् यंकेत्यंगु धाःगु दु । आइतवाः अमेरिकी राष्ट्रपति जो बाइडेनं २८ हजारसिबें अप्वः मनूतय्गु उद्धार जूगु धाःगु खः ।

मंगलवाः अफगानिस्तानया स्थितिया बारे खँल्हाबल्हा यायेत जी–७ या बैठक च्वनेत्यंगु दु । अमेरिकी राष्ट्रपति जो बाइडेन व बेलायतया प्रधानमन्त्री बोरिस जोनसोनया दथुइ जूगु वार्ताय् जी–७ या बैठक यायेगु क्वःजिउगु खः ।

जी–७ या बैठकय् आफगानिस्तानया समस्या व तालिबानतलिसे गज्याःगु रणनीति छ्यलेगु धयागु खँय् खँल्हाबल्हा जुइ । जी–७ या नेतृत्व बेलायतं यानाच्वंगु दु । जी–७ य् बेलायत, अमेरिका, क्यानाडा, फ्रान्स, जर्मनी, इटाली व जापान दु । बैठक भर्चुअल माध्यमं जुइ ।