फेसबुकं यानाः लोकतन्त्र कमजोर

एजेन्सी- फेसबुकया छम्ह पुलांम्ह कर्मचारीं अमेरिकाया सांसदतय्त कम्पनीया वेबसाइट व एपं यानाः मस्तय्त हानि यानाच्वंगु, समाजय् विभाजन हयाच्वंगु व लोकतन्त्रयात कमजोर यानाच्वंगु धाःगु दु । फेसबुकया पुलांम्ह कर्मचारी फ्रान्सिस हाउगनं बिउगु जानकारीकथं कम्पनीयाके थ्व विषययात कयाः जानकारी दुसां कम्पनीया वरिष्ठ कर्मचारीतय्सं फाइदायात प्राथमिकता बियाच्वंगु दु । हाउगन फेसुबकय् प्रोजेक्ट म्यानेजर जुयाः ज्या यायेधुंकूम्ह कर्मचारी खः । अमेरिकाया संसद च्वनीगु क्यापिटल हिलय् हाउगनं फेसबुकया आलोचना याःगु खः ।

फेसबुकया संस्थापक मार्क जुकरवर्गं धाःसा हाउगनया द्वपं अस्वीकार याःगु दु । फेसबुकं हाउगनं थःत जानकारी मदुगु विषयय् नवाःगु धाःगु दु । हाउगनं कम्पनीया मखुगु छवि क्यनेत स्वःगु व हाउगनया दाबीया मतलब मदुगु खँ नं फेसबुकं धाःगु दु । तर फेसबुकं इन्टरनेटय् परिष्कृत नियम हयेमाःगु खँया धाःसा समर्थन याःगु दु ।

मंगलवाः अमेरिकाया सदनय् जूगु बहसय् अमेरिकाया निगुलिं पार्टी रिपब्लिकन व डेमोक््रयाटिकया सांसदतय्सं फेसबुकय् हिउपाः हयेमाःगु खँय् समर्थन याःगु खः ।

फेसबुकया विश्वन्यंक २.७ अर्ब सक्रिय प्रयोगकर्ता दु । अथे हे फेसबुकया इन्स्टाग्राम व ह्वाट्स एपया नं करोडौं प्रयोगकर्ता दु । फेसबुकयात प्रयोगकर्तातय्सं थःपिनिगु गोपनीयता तयेमफुग द्वपं बियाच्वंगु दुसा फेसबुकं गलत जानकारीया प्रचार यनाच्वंगु धकाः आलोचना नं जुयाच्वंगु दु ।