दिल्लीया होटलय् मि च्यानाः १७ म्ह सित

भारतया दिल्लीइ च्वंगु छगू होटलय् मि नयाः झिंन्हय्म्हेसिया ज्यान वंगु दु । म्हो ध्यबां दिल्ली चाःहिउ वइपिं पर्यटकत च्वनीगु अर्पित प्यालेस होटलया दकलय् च्वय्या तँ पूवंक हे च्याःगु खः । मंगलवाः सुथय् ४ बजे निसें मि च्यायेगु सुरु जूगु खः । मि च्यायेवं झ्याःया न्हाय्कं तछ्यानाः न्यातँजाःगु छेँ नं मनूत तिंन्हुयावःगु खः ।

थथे मनूत तिंन्हुयावःगु भिडियो सामाजिक सञ्जालय् भाइरल जुयाच्वंगु दु । सीपिं मध्ये अप्वः धयाथें सासः कुनाः सीगु खँ धाःगु दु । तिंन्हुया वःपिं निम्ह मिसा व छम्ह मचा सीगु खँ धाःगु दु । दमकल कर्मचारीतय्सं मेपिं ३५ म्हेसित धाःसा उद्धार याःगु दु । मि च्याःगु कारण धाःसा अझं सीमदुनि धाःगु दु । थ्व होटल दिल्लीया दथुइ लाःगु करोल बाग धाःथासय् च्वंगु खः । थ्व थाय् म्हो ध्यबा खर्च याइपिं व बजाः वइपिं पर्यटकतय् निंतिं नांजाः ।