‘ट्राफिकं ताःचाः व लाइसेन्स काये दइमखु’

येँ (नेपालभाषा टाइम्स) – ट्राफिक प्रहरीं लाइसेन्स व ताःचाः कायेमदइगु नियम लागू हे जुइगु जूगु दु । नेपाल प्रहरीया मू ज्याकुथिं ताःचा व चालकया कागजात कायेमदइगु अदालतया फैसला विरुद्ध तःगु पुनरावेदन निवेदनयात अदालतं स्वीकार मयायेवं थ्व नियम कायम हे जुइगु जूगु खः । म्हिगः स्वम्ह न्यायाधीशत महेश शर्मा पौडेल, बालकृष्ण ढकाल व नृपध्वज निरौलाया इजलासं ताःचा व भ्वं कायेमदइगु फैसलाया पुनरावलोकन यायेगु अनुमति बीत अस्वीकार याःगु खः ।

थ्वयां न्ह्यः सर्वसाधारण विवेक चौधरीं ट्राफिक प्रहरीं लाइसेन्स, सवारी चालकया कागजात व ताःचा ट्राफिकतय्सं लाकाकाइगु विरुद्ध तःगु रिटय् सर्वोच्च अदालतं वंगु पुस ६ गते थथे छुं नं भ्वं व ताःचा कायेमदइगु फैसला न्यंकूगु खः । थ्व हे फैसलाविरुद्ध प्रहरी प्रधान कार्यालयं पुनरावलोकन यायेत स्वःगु खः ।

पुनरावलोकन अस्वीकृत यायेगु फैसलाय् धयातःगु दु, ‘थ्व अदालतया मंकाः इजलासं २०८२ पुस ६ गते जूगु फैसलाय् न्याय प्रशासन ऐन, २०७३ या दफा ११ य् न्ह्यथनातःगु छुं नं अवस्था विद्यमान मदुगुलिं पुनरावलोकनया अनुमति बी मजिल ।’