जर्जियाय् बाइडेन हे त्यात

ट्रम्पपाखें सत्ता हस्तान्तरण यायेगु संकेत

एजेन्सी – अमेरिकाया जर्जियाय् राष्ट्रपति चुनावया पुनः मतगणनाय् नं डेमोक्र्याटिक उम्मेदवार जो बाइडन हे त्याःगु दु । बाइडेन सन् १९९२ लिपा जर्जिया त्याकूम्ह न्हापांम्ह डेमोक्र् याटिक उम्मेदवार जूगु दु । अथेहे थ्व विजय लिपा बाइडेन रिपब्लिक उम्मेदवार डोनाल्ड ट्रम्पलिसे तःधंगु मतान्तरं राष्ट्रपतिइ त्याकूगु दु। जर्जियाय् त्यायेवं बाइडेनया ल्हातय् ३०६ इलेक्ट्रोल मत थ्यंगु दु । अमेरिकाय् राष्ट्रपति जुइगु निंतिं २७० इलेक्ट्रोल मत दःसा गाः ।

मेखे पुनः मतगणनाय् नं जर्जियाय् बाइडेन हे त्यायेवं राष्ट्रपति डोनाल्ड ट्रम्पं सत्ता त्वःतेगु संकेत बियादीगु दु। तर वय्कलं अझ नं पराजय धाःसा स्वीकार यानादीगु मदुनि । नर्थ क्यारलोनाय् त्याकेवं मुक्कं २३२ जक इलेक्ट्रोल मत थ्यंम्ह ट्रम्पं बाइडेन त्याइगु संकेत वसां निसें हे मतगणनाय्धाँ धली जूगु धासें थःम्हं पराजय स्वीकार मयायेगु धया वयाच्वंगु खः । वय्कःया चुनावी अभियान थीथी राज्यय् पुनःमतगणनाया निंतिं अदालत नं वनेधुंकूगु खः । तर जर्जियाया पुनःमतगणनाया लिच्वः वयेवं वय्कलं ह्वाइट हाउस परिसरय् यानादीगु प्रेस ब्रिफिङ्गय् धयादीगु दु, ‘थ्व प्रशासनं लकडाउन याइमखु , आशा याये…. भविष्यय् छु जुइ । सुनां छु स्यू छु सरकार वइ । इलं हे धाइगु जुइ’ वय्कलं धयादीगु दु । तर वय्कलं बाइडनया नां नं कयादीगु मदुसा संवाददातातय् न्ह्यसः नं कयादीगु मदु ।

ट्रम्पयात आः पराजय स्वीकार यानाः सत्ता हस्तान्तरण यायेत तयार जुइत दबाब लानाच्वंगु दु । जो बाइडेनया विजय आधिकारिक रुपं घोषणा याये ल्यं दनि। तर सत्ता हस्तान्तरणया संक्रमणकालया निंतिं गठन याःगु वय्कःया पुचःयात ट्रम्प प्रशासनं छुं नं आर्थिक ग्वाहालि व सरकारी निकायय् पहुँच बिउगु मदुनि ।

ट्रम्प प्रशासनं सुरक्षा निकायया बर्गिकृत ब्रिफिङय् दुमथ्याकूगुलिं न्हू वइगु प्रशासनयात राजकाजया ज्याय् समस्या जुइफुगु बाइडनया प्रवक्ता जे पास्कीं धयादीगु दु। कोरोना महामारीया अवस्थायात न्ह्यथँसें वय्कलं धयादीगु दु, ‘वर्तमान संकटया सामना यायेत न्हूगु ताजा सुचंया आवश्यक जुइ । जिमिगु पुचः व जिमि विज्ञतय् पहुँच थन तक थ्यने आवश्यक दु ।’

सत्ता हस्तान्तरण प्रक्रियाय् मू भूमिका म्हितीगु निकाययात छगू पौ छ्वसें थ्व पुचलं जो बाइडन व कमला ह्यारिसयात आधिकारिक रुपं स्वीकार यायेत व उमित राष्ट्रिय सुरक्षाया गम्भीर विषयय् जानकारी बिइगु अवस्था दयेकेत इनाप याःगु दु। रिपब्लिकन पार्टीया छुं नेतातय्सं नं राष्ट्रपतिइ निर्वाचित बाइडनयात दैनिक रुपं गुप्तचरी सुचं बीमाःगु मागया समर्थन याःगु दु ।

सम्बन्धित बुखँ

LEAVE YOUR COMMENTS