ने. सं. ११४४ चौलागा अष्टमी -

नक्वाः भैलः द्यवं मतिना याः वइगु जात्रा

येँ- येँया दक्षिणी भेगय् लाःगु किपुल्चा (किसिपिडी) य् म्हिगः कालिका अजिमा–भैलःद्यःया मू जात्रा जुल । न्हय्न्हुयंकं जुइगु थ्व जात्राया झ्वलय् आइतवाः भैलःद्यःया खः जात्रा यानाः कालिका पीठय् कालिका नापलाकेत हःगु खः । द्यःयात म्हिगः हे च्वय् देशय् बिज्याकूगु खः । वंगु चिल्लागा नवमि कुन्हु
छ्वय्लाभू यानाः न्ह्याःगु जात्रा कन्हय् भैलःद्यःयात द्यःछेँय् बिज्याकेधुंकाः क्वचाइ ।

किपुल्चाया कालिका–भैलःद्यः जात्रायात नक्वाः (नुवाकोट) भैरवं किपुल्चाया कालिका द्यःलिसे ख्यालि (मतिना) याःवःगु जात्रा कथं कायेगु याइ । पाहांचःह्रे हे धाइगु थ्व जात्राया झ्वलय् नक्वाः भैरव व कालिका अजिमाया हे मू जात्रा जुइ ।

देशं पिनेच्वंगु कालिका अजिमाया पीठ

थुगुसी जात्राया द्यःपाःलाः जुयादीम्ह राजकाजी महर्जनं धयादीकथं छगू इलय् नक्वाः भैरव थनया कालिका अजिमाया सुन्दरताया बखान न्यनाः वलिसे मतिना यायेत किसिपीडी वःगु जुयाच्वन । तर लिहां वने न्ह्यः हे द्यः तुइया वःगुलिं सुपय् सू वन । सुपय् सुलाच्वंम्ह भैरवयात स्थानीय मनूतय्सं ज्वनेधुंकाः थ्व जात्रा न्यायेकूगु खः ।

थुगुसीया द्यःपालाः राजकाजी महर्जन

थ्व जात्रा आः नं पूवंक नियमय् च्वनाः न्यायेकेमाः । ‘भैलःद्यः तसकं शक्तिशाली, मखुकथं यायेमजिउ, उकिं स्वनिगलय् जुइगु जात्रा मध्ये आः नं थ्व जात्रा पूवंक नियमय् च्वनाः हना वयाच्वंगु दु’ न्हापा भैलःद्यः कुबीम्ह गुथ्याः केदार महर्जनं कनादिल ।

येँया पचली भैरवया बाखं थेंज्याःगु हे बाखं दुगु नक्वाः भैलःद्यः नं पचली थें हे क्वंचाद्यः कथं जात्रा याइगु खः । नक्वाः भैलद्यः दुगु क्वंचाय् निघः थ्वँ
न्ह्यं । निघः थ्वँ व बां स्याना हःम्ह म्येय्या थ्यंमथ्यं ४० किलो लाफः द्यःने तया हइगु क्वंचाद्यःयात क्वबीगु धाःसा प्यम्हेसिनं जक यायेमाः । थुपिं प्यम्हेसित नीसी यानाः जामां सिंकातइ । जात्राया झ्वलय् द्यः कुबीधुंकाः थासय् मथ्यंतले द्यःयात गनं दिके मजिउ । भैलःद्यःयात कालिका पीठं लित यंकीबलय् बासा लायाः देशय् दुत यंकी ।

भैलःद्यः

भैलःद्यः देशय् बिज्याकेत बासा लायाच्वंगु

भैलःद्यः क्वबिया हयाच्वंगु

भैलःद्यःया क्वंचाय् तयाहःगु लाया छ्वया छुयाच्वंगु । द्यःकुबिइपिं, गुथियार, बाजंखलःपिंत छ्वय्ला न्याकू न्याकू व भैलःद्यःया क्वँचाय् च्वंगु थ्वँ त्वंकेधुंकाः द्यःयात देशय् थहांबिज्याकी ।