मलमासं बुंगद्यः जात्रा मपनीगु

येँ – स्वनिगःया दकलय् ताःहाकःगु जात्रा धाइगु बुंगद्यःया जात्रा थनिंनिसें शुरु जुइत्यंगु दु । थौं बुंगद्यःयात रथय् बिज्याकाः थ्व जात्रा न्ह्याकी । द्यःयात रथय् बिज्याकूगुयां स्वन्हु लिपा बिहीवाः द्यः सालेगु ज्या जुइ ।

वइगु जेठ २ गते निसें मलमास नं शुरु जुइगु जूगुलिं मलमासय् द्यः साले जिउ कि मजिउ धइगु खँ नं पिहां वःगु दु । थुकिया बारे जोतिष कीर्तिमदन जोशीयात स्वापू तयाः न्यनाबलय् वय्कलं मलमास जूसां द्यः सालेगु ज्या धाःसा पनी मखु धयादिल । बुंगद्यः सालेगु निंतिं रथ दयेकेगु ज्या क्वचायेधुंकूगु दुसा न्हवं (दशकर्म) नं क्वचायेधुंकूगु दु ।

यलय् बुंगद्यःयात रथय् तइगु छन्हु न्ह्यः म्हिगः कटुवाल दहलय् नं तःजिगु जात्रा न्यायेकूगु खः । बुंगद्यःयात भारतया कामारुकामाक्षं नेपाः हःगु लसताय् कटुवाल दहलय् जात्रा याइगु खः । म्हिगः चछि धइथें कटुवाल दहलय् पुजाआजा जूगु खँ पुजारी कपिल गुरुजुं कनादीगु दु । थौं भम्बःया रुपय् दुम्ह द्यःयात कलशय् तयाः यलय् हइगु खः । थौं यलय् थ्यनेवं द्यःयात रथय् बिज्याकी ।

थुगुसी बुंगद्यः जात्राया निंतिं ७० लाख तका खर्च जुइगु खँ गुथि संस्थान यलं धाःगु दु । संस्थानया कथं रथ दयेकेत जक ५० लाख तका तूगु खःसा मेगु ध्यबा रथ दयेकेत ज्या याइपिं पुजारी लगायतपिंत बीमाःगु खः ।