२५० दँ लिपाया तःधंगु उपलब्धी, भाषा कानुन कार्यान्वयन न्हि हनेत र्याली व सभा
येँ (नेपालभाषा टाइम्स)- बागमती प्रदेश सरकारं थ्वहे वैशाख २४ गतेनिसें कार्यान्वयनय् वयेत्यंगु सरकारी ज्याखँया भाषा सम्बन्धी ऐन कार्यान्वयन जूगु घोषणा यायेत जुइगु सभा व ¥यालीइ ब्वति कायेत सकसितं इनाप याःगु दु ।
म्हिगः येँय् छगू पत्रकार सम्मेलन यासें बागमती प्रदेशया संस्कृति, पर्यटन तथा सहकारी मन्त्री लिसें वैशाख २४ गते जुइत्यंगु ‘भाषा दिवस मूल समारोह समिति’ या संयोजक शैलेन्द्रमान वज्राचार्यं थ्व आह्वान यानादीगु खः ।
वय्कलं म्हिगः सार्वजनिक याना–दीगु ज्याझ्वः कथं वैशाख २४ गते सुथसिया ७ बजे येँया बसन्तपुलिं छगू सांस्कृतिक ¥याली न्ह्याइ । येँया कुमारी रथ चाःहिलीगु लागा चाःहिलाः उगु ¥याली बसन्तपुलिइ तुं थ्यंकाः सभाय् परिणत जुइ । ज्याझ्वलय् प्रधानमन्त्री पुष्पकमल दाहाल मूपाहां कथं झायादीसा बागमती प्रदेशया मुख्यमन्त्री शालिकराम जम्कट्टेल विशेष पाहां कथं झायादी । वकुन्हु सार्वजनिक बिदाया नं घोषणा यायेधुंकूगु दु । वकुन्हु थ्व कानुन कार्यान्वयन यायेगु झ्वलय् तत्काल छु छु ज्याझ्वः जुइ धइगु खँ नं अन घोषणा जुइगु जानकारी वय्कलं बियादिल ।
पत्रकार सम्मेलनय् न्ववासें वय्कलं वंगु २५० दँ लिपा नेपाःया थीथी भाषा–या सवालय् चूलायेत्यंगु थ्व दकलय् तःधंगु उपलब्धी जूगुलिं थुकियात तःजिक हनेमाःगु खँ कनादिल ।
बागमती प्रदेश सभाय् उगु विधेयक पेश यानादीम्ह पुलांम्ह संस्कृति मन्त्री पुकार महर्जनं देशय् संघीयता वःसां छु जुल धकाः निराश जुयाच्वंपिं मनूतय् लागिं थ्व छगू उत्साहया संकेत खः धासें थ्व भाषा सम्बन्धी कानुनं संघीयताया उपलब्धी चूलानाच्वंगु दु धइगु संकेत बीगु खँ कनादिल ।
ज्याझ्वलय् लसकुस यासें नेवाः देय् दबूया नायः पवित्र वज्राचार्यं देशय् सदियौंनिसें उत्पीडनय् लानाच्वंगु भाषाभाषीया लागिं थ्व छगू तःधंगु उपलब्धी जूगुलिं थुकिया लागिं प्रदेश सरकारयात सुभाय् बियादिल ।
तामाङ घेदुङया उपाध्यक्ष सञ्जु ब्लोनं थ्व कानुनपाखें तामाङ भाषा– या उत्थानय् तःधंगु योगदान याइगु खँ कँसें सरकार व थुकिया लागिं ज्या संपिं सकसितं सुभाय् देछानादिल । प्रदेश मन्त्रालयया सचिव हरिशरण पुडासैंनीं थ्व कानुन कार्यान्वयन जुइवं प्रदेशया मन्त्रालय नेपालभाषा व तामाङ भाय् सःपिं दोभाषेया व्यवस्था यानाः ज्या न्ह्याकेगु खँ कनादिल ।
LEAVE YOUR COMMENTS