राष्ट्रियसभा चुनावय् मनोनयन दर्ता , १९ सिटय् ५२ उम्मेदवार
येँ (नेपालभाषा टाइम्स)÷ राष्ट्रिय सभा दुजः निर्वाचनया निंतिं न्हय्गुलिं प्रदेशय् शान्तिपूर्ण रुपं उम्मेदवार मनोनयनपत्र दर्ता जूगु खँ निर्वाचन आयोगं धाःगु दु । निर्वाचन आयोगया प्रवक्ता शालीग्राम शर्मा पौडेलं म्हिगः विज्ञप्ति जारी उगु खँ धयादीगु खः ।
म्हिगः १ नम्बर प्रदेशय् महिला समुहया नितिं निगू राजनीतिक दलपाखें व अन्य समूहया नितिं स्वंगू राजनीतिक दलपाखें न्याम्हेसिया उम्मेदवारया मनोनयनपत्र दर्ता जूगु खःसा मधेश प्रदेशय् महिला समूहया नितिं निगू राजनीतिक दलयापाखें व अन्य समूहया निंतिं स्वंगू राजनीतिक पार्टीपाखें न्याम्हेस्यां उम्मेदवारया मनोनयनपत्र दर्ता याःगु दु ।उकथं हे बागमति प्रदेशय् मिसा समूहया नितिं प्यंगू राजनीतिक दलपाखें, दलित समूहया नितिं स्वंगू राजनीतिक दलपाखें, अपांगता दुपिं वा अल्पसंख्यक समुदायया निंतिं प्यंगू राजनीतिक दलपाखें व अन्य समूहया नितिं प्यंगू राजनीतिक दलपाखें यानाः झिंन्याम्ह उम्मेदवारं मनोनयनपत्र दर्ता याःगु दु ।
गण्डकी प्रदेशय् महिला समूहया निंतिं स्वंगू राजनीतिक दलपाखें, अपांगत दुपिं व्यक्ति वा अल्पसंख्यक समुदायया निंतिं निगू दलपाखें व अन्य समूहया निंतिं स्वंगू राजनीतिक दलयापाखें मुक्कं च्याम्हेस्यां मनोनयन पत्र दर्ता याःगु दु ।
लुम्बिनी प्रदेशय् महिला समूहया निंतिं स्वंगू राजनीतिक दलपाखें व अन्य समूहया नितिं प्यंगू राजनीतिक दलपाखें न्हय्म्हेस्यां मनोनयनपत्र दर्ता याःगु दुसा कर्णाली प्रदेशय् महिला समूह, दलित समूह व अन्य समूहपाखें निगू निगू राजनीतिक दलपाखे खुम्हेस्यां मनोनयनपत्र दर्ता याःगु दु ।
अथे हे सुदूरपश्चिम प्रदेशय् नं महिला समूह, अपांगता दुपिं समूह व अल्पसंख्यक समूहपाखें नं निगू निगू दलया खुम्हेस्यां मनोनयनपत्र दर्ता याःगु दु ।
थुकथं न्हय्गुलिं प्रदेशय् महिला समूहपाखे झिंच्याम्ह, दलित समूहपाखें न्याम्ह, अपांगता दुपिं वा अल्पसंख्यक समुदायपाखें प्यम्ह व अन्य समुदाय यानाः मुक्कं ५२ म्हेस्या उम्मेदवारया मनोनयनपत्र दर्ता याःगु दु । थुकी मध्ये दकलय् अप्वः बागमति प्रदेशय् झिंन्याम्हेस्यां मनोनयन दर्ता याःगु दु । राष्ट्रियसभाया १९ म्ह दुजःया नितिं निर्वाचन जुइत्यंगु खः ।
निर्वाचन ज्याझ्वः कथं थौं उम्मेदवारया विरोधय् उजुरी बीगु, २५ व २६ गते मनोनयनपत्र व उजुरी उपर जाँचबुझ यानाः नामावली पिथनेगु, २७ गते उम्मेदवारं नां लित कायेगु व लिपांगु नामावली पिथनेगु व २८ गते उम्मेदवारयात निर्वाचन चिं इनेगु ज्याझ्वः क्वःछिनातःगु दु ।
राष्ट्रियसभा अध्यक्षय् सिटौला
आमचुनावय् निक्वः बूम्ह कांग्रेस नेता कृष्णप्रसाद सिटौलायात आः राष्ट्रियसभाया चुनावय् त्याकेगु जक मखु राष्ट्रिय सभाया अध्यक्ष हे दयेकेगु तयारी नेपाली कांग्रेसं याःगु दु । सिटौलायात राष्ट्रिय सभाया उम्मेदवार दयेकाः राष्ट्रियसभाया अध्यक्ष हे दयेकेगु खँय् नेपाली कांग्रेसया देउवा व कोइराला निगुलिं गुट सहमत दुगु खँ सीदुगु दु । थौंकन्हय् राष्ट्रियसभाया अध्यक्ष पदय् एमालेया गणेश तिमिल्सिना खःसा वय्कःया नं कार्यकाल क्वचाःगुलिं पद त्वःते मालीगु जूगु दु ।
LEAVE YOUR COMMENTS