नागढुङ्गाया सुरुङ्गमार्ग ः निला दुने ब्रेक थु्

येँ (रासस)÷ नागढुङ्गा सुरुङमार्गया मू सुरुङ म्हुइ क्वचायेकेत आः ७३.६० मिटर जक म्हुइ ल्यं दनिगु खँ धाःगु दु । थ्व सुरुङमार्गया वैकल्पिक सुरुङ ‘इभ्याकुएसन टनेल’ वंगु साउन २२ गते हे ब्रेकथ्रु जुयधुंकूगु दु । सुरुङ दुनेया कंक्रिटया ज्या नं ५१ प्रतिशत क्वचायेधुंकूगु खँ धाःगु दु । सुरुङ मार्गया ज्या क्वचायेवं सुरुङमार्ग दुने अक्सिजन, मत व सञ्चार थेंज्याःगु अत्यावश्यक सेवा ‘टनेल फ्यासिलिटी’ धाःसा थ्यंके ल्यंदनि ।

सुरुङ मार्गया भौतिक निर्माण पूवंकेधुंकाः सवारीसाधन संचालन यायेत सछिम्हेसित न्हियान्हिथं ज्या यायेमालीगु खँ पपिरयोजनाया परामर्श दातृ संस्था निप्पन कोइया इन्जिनियर रमेशप्रसाद कोइरालां धयादीगु दु । थुकिया लिसें छुं छुं पंगः चिइकेफत धाःसा वइगु दँ दुने थ्व सुरुङमार्ग पूवंक चले जुइगु खँ धाःगु दु । सुरुङमार्ग संचालनय् वयेवं त्रिभुवन राजपथया बलम्बु निसें नागढुंगा तकया दूरी स्वंगू किलोमिटर म्हो जुइ ।

स्वंगू किलामिटर जक म्हो जुइगु खःसां सुरुङमार्गया पश्चिम प्रवेश विन्दु निसें नागढुंगाया पाखा गयेगु व अनया ट्राफिक जामयात स्वयेगु खःसा म्होतिं नं बाघौ बचे जुइगु खँ इन्जिनियर कोइरालां कनादिल । थुकिया लिसें न्हापा अनुभव मजूनिगु यातायातया निंतिं सुरुङ्गमार्ग दयेकेगु राष्ट्रिय क्षमता अप्वयेकेगुलिसें प्रविधि हस्तान्तरणय् नं ग्वाहालि जुइगु कोइरालां कनादिल ।

अक्सिजननिसें एफएम सिग्नल तक
थुगु सुरुङ्गमार्गय् अक्सिजन निरन्तर आपूर्ति दकलय् संवेदनशील विषय खः । थुकिया निंतिं झिंन्यागः जेट फ्यान आवश्यक जुइगु खँ कोइरालां धयादीगु दु । थ ुकिया लिसें मुक्कं २६८८ मिटर ताःहाकःगु मार्गय् २४ घन्टा हे मत च्याके आवश्यक जुइ । मत व मेमेगु संयन्त्रया निंतिं मुक्कं निगू मेगावाट मत आवश्यक जुइ । थुकिया निंतिं विद्युत प्राधिकरणं मातातीर्थ स्टेशनपाखें ११ केभिएया २४ घौया डेडिकेटेड लाइन हयेगु व्यवस्था यानागु खँ नं वय्कलं धयादीगु दु । थुकिया लिसें जेनेरेटर नं तयारी अवस्थाय् तयातयेगु खँ वय्कलं धयादीगु दु । अथेहे सञ्चार संयन्त्र व अग्निनियन्त्रक यन्त्र, सुरुङ दुने जडान जुयाच्वंगु मेमेगु संयन्त्र ‘टनेल फ्यासिलिटी’ न्ह्याबलें तयारी अवस्थाय् तयेमाःगु जुइ ।

सुरुङमार्गय् मि च्याइगु दकलय् जोखिमया विषय जूगुलिं उकी तसकं संवेदनशील जुइमाःगु खँ नं वय्कलं धयादिल । यदि सुरुङमार्गय् मि च्यान धाःसा थन जडान यानातःगु मि स्यायेगु यन्त्रय् तुरुन्त छ्यलेगु निंतिं कन्ट्रोल रुमयात तुरुन्त परिचालन यायेगु व मि च्यानाच्वंगु अवस्था सुरुङमार्गय् दुुपिं व दुहां वनेत्यंपिंत माइक व एफएम रेडियापाखें तुरुन्त सुचं थ्यंकेफइगु जुइ । थुकिया निंतिं ट्राफिक व्यवस्थापन व डाइभर्सन तुरुन्त याकेगु, सुरुङमार्गय् दुगु भिजुअल बोर्डय् तुरुन्त मि च्याःगु व सुरक्षा सम्बन्धी सुचं डिस्प्ले यायेगु लिसें फुक्कं सञ्चार कन्ट्रोल रुमपाखें याकेगु व्यवस्था नं जुइगु खँ वय्कलं कनादिल ।

सामान्यतयाः सुरुङमार्ग दुने एफएम रेडियोया तरङ मथ्यनीगु जूगुलिं अन दुहां वनीगु यातायात साधनय् निर्वाध रेडियो सम्पर्क दयेकेगु निंतिं रेडियो सिग्नल थ्यंकीगु सञ्जाल नं स्थापना याइगु खँ वय्कलं कनादीगु दु ।

जमिनयात कयाः लफडा
देय्या हे न्हापांगु आधुनिक सुरुङमार्गया दयेकेगु झ्वलय् थ्व आयोजनां मुआब्जा व जमिन सम्बन्धी विवादय् तक्यनाच्वनेमाल । थ्यंमथ्यं ३० कित्ता जग्गाया मुआब्जा सम्बन्धी समस्या जुयाच्वंगु दु । सुरुङमार्गया पूर्वी विन्दु बलम्बुपाखेया जग्गाया छुं ब्व राजकुलो लाःगु व थन सरकारी मापदण्डया कारणं जग्गाधनीतय्सं आशिंक जक मुआब्जा कायेखनीगु जुयाच्वंगु दु । जग्गाधनीतय्सं थःपिंत नं पूवंक हे मुआब्जा माः धासें थुखे ज्या याके बियाच्वंगु मदुनि ।

अथेहे पश्चिमपाखेया धादिङया खत्री पौवापाखे न्हापा सतक कायम जुयाच्वंगु खःसा लिपा तब्यागु लँ दयेकेधुंकाः थन स्थानीयतय्सं बुँज्या याना वयाच्वंगु जग्गा नं आयोजनाय् लानाच्वंगु दु । थज्याःगु जग्गाय् कानुन कथं मुआब्जा बी मछिनाच्वंगु दु । थ्व हे कारणं थन नं ज्या न्ह्याके फयाच्वंगु मदुनि । ‘थन मुआब्जा विवादया कारणं यात्रुसेवा भवन, चःबि व विश्रामस्थल दयेकेगु ज्या दिनाच्वंगु दु’ इन्जिनियर कोइरालां कनादीगु दु । अथेहे छुं छुं जग्गाय् धाःसा सरकारी अभिलेखय् हे जग्गाधनीया नां सडक विभागया नापं व्यक्तिया नां नं लानाच्वंगुलिं नं समस्या जुयाच्वंगु दु । थज्याःगु समस्याया कारणं क्वःछिनातःगु इलय् ज्या सिधयेकेत थाकुइगु लिसें खर्च नं अप्वयेफुगु खँ धाःगु दु । ज्या ढिला जुल धाःसा ठेकेदारं क्षतिपूर्ति दावी यात धाःसा उकिया ध्यबा पुलेमालकि खर्च अप्वइगु जुइ ।

आयोजनायापाखें सम्बद्ध मन्त्रालययात थज्याःगु समस्याया बारे जानकारी बीनागु व समस्या ज्यंकेत मन्त्रालयस्तरं हे पहल जुयाच्वंगु खँ नं कोइरालां कनादीगु दु । आयोजनाया निमत्ति प्रमुख गोविन्द डुमरुया कथं वइगु मार्च ३ य् मू सुरुङ म्हुइ क्वचायेकेगु (ब्रेक थ्रु)या लक्ष्य दु । वय्कलं नं यदि आःया ज्याय् पंगः मवल धाःसा दछिया दुने सुरुङमार्ग संचालनय् वइगु खँ धयादीगु दु ।

लःया व्यवस्थापन
सुरुङमार्ग दयेकेगु झ्वलय् लःया परम्परागत मुहान सुना वनीगु समस्या खनेदुगुलिं थज्याःगु समस्या ज्यंकेगु निंतिं नं आयोजना व चन्द्रागिरी नगरपालिका दथुइ सहकार्य जुयाच्वंगु खँ नगरप्रमुख घनश्याम गिरीं कनादीगु दु । वय्कलं चन्द्रागिरी नगरपालिका वडा नं. २ लय् न्हूगु बोरिङ यायेगु व सुरुङ दयेकेधुंकाः चन्द्रागिरि नगरपालिकां सुरुङया पश्चिम पोर्टलपाखे न्ह्याः वंगु लःयात मुनाः पम्पपाखें हाकनं चन्द्रगिरीइ हे हयेगु सहमति जूगु खँ नं कनादीगु दु ।

सम्बन्धित बुखँ

LEAVE YOUR COMMENTS