ने. सं. ११४६ बछलाथ्व सप्तमी -

नीलवाराही व भैलः प्याखं क्वचाल

थिमि (नेपालभाषा टाइम्स)-मध्यपुर थिमि नगरपालिकाय् सापारु धुनेवं न्ह्याइगु भैलः प्याखं व बोडेया नीलबाराही प्याखं क्वचाःगु दु । स्वन्हु प्यचा तक क्यनीगु थ्व प्याखं बुधवाः सुथय् क्वचाःगु खः ।

मध्यपुर थिमिया बोडेय् दँय्दसं सापारुया कन्हय् कुन्हु थीथी देव देवीया ख्वाःपाः पुनाः हुइकूगु नीलवाराही प्याखं स्वचा प्यन्हुतक थनया थीथी त्वालय् क्यंगु खः । सापारुया कन्हय्कुन्हु दुतियाया चान्हसिया इलंनिसें पंचमितक हुइकीगु नीलवाराही प्याखनय् छम्ह भैरव, प्यम्ह वाराही, प्यम्ह कुमारि, प्यम्ह सिंह, प्यम्ह गणेद्यः व द्वारपाल निम्ह यानाः मुक्कं १९ म्ह देवगण दइ ।

अथे हे थ्व प्याखंया निंतिं खुम्ह गुरु, प्रत्येक द्यःया निंतिं छम्ह छम्हया ल्याखं १९ म्ह ग्वाहालिमि नं दइसा प्याखं क्यनीगु इलय् थाइगु धाः, भुस्याः काहा, प्वंगा बाजनय् प्रत्यक्ष रुपं गुम्हेसिया सहभागिता दइ ।

बोडेया लाकुछेँ त्वालं शुरु जुइगु थ्व प्याखं लाछि, विष्णुघाट, महालक्ष्मीथान, भांगुत्वाः, खासि त्वाः नीलवाराही जुयाः हाकनं खासि त्वालं लाकुछेँय् थ्यंकाः क्वचायेकी । प्रत्येक त्वालय् प्याखं क्यनीगु इलय् स्थानीयतय्सं पुजा बीगु परम्परा दया वयाच्वंगु दु ।

नीलवाराही प्याखय् देवगणत निश्चित नियमय् च्वनेमाःसा थथे नियमय् च्वनेबलय् न्हिछिया १४ घौतक परम्परागत नियमय् च्वनेमाः । थ्व प्याखं ज्वःछि नये, त्वने यायेगु, फ्यतुइगु, सुं नापं नवायेगु, कुसां कुइगु, लाकां न्ह्यायेगु, खि, च्व तकं फाये मजिउगु नियम दु ।

थ्व हे झ्वलय् मल्लकाली तान्त्रिक लाय्कू भैलःप्याखं नं क्यनेगु क्वचाःगु दु । वंगु निदँ थुखे कोरोनाया कारणं औपचारिकताय् जक सीमित जूगु थ्व प्याखं थुगुसी धाःसा तःजिक संचालन जूगु दु । झण्डै प्यंगू दशकं मल्याक बन्द जुइधुंकूगु लाय्कू भैलःप्याखं स्थानीय ल्याय्म्हतय् सक्रियताय् हाकनं संचालनय् हःगु खः ।
गुंलागा दुतिया निसें न्ह्याःगु प्याखं पंचमिकुन्हु सुथय् क्वचाःगु खः । लाय्कू भैलः प्याखनय् भैरव निम्ह, दागिं अर्थात कुमारि निम्ह, ज्यापुगं छम्ह यानाः न्याम्ह दइ । थिमिया लाय्कुलिं पिहां वयाः दकलय्् बालकुमारि द्यःया न्ह्यःने क्यनेधुंकाः त्वाःत्वालय् प्याखं क्यंगु खः ।