ने. सं. ११४४ कौलाथ्व पारू - नःलास्वनेगु

भाषा कानुन व झीगु दायित्व बारे बिराटया अन्तक्र्रिया

ख्वप(नेपालभाषा टाइम्स)- भाषा कानुन व झीगु दायित्व विषयय् विराट नेपालाभाषा साहित्य सम्मेलन गुथिया ग्वसालय् बृहत अन्तक्र्रिया ज्याझ्वः जुल । ज्याझ्वःया मूपाहां नेवाः देय् दबूया संरक्षक नरेश ताम्रकारं बागमती प्रदेशय् नेपालभाषा छ्यलाबुला याये दइकथं कानुन पारित याःगु छुं तःधंगु खँ मखुसे झीगु संघर्षया चीधंगु उपलब्धी जक खः धयादिसें थ्व कानुन लागू यायेत आः भाषा प्रतिष्ठान, विज्ञ समूह व गैर नेवाःत समेत जानाः नियम, नियमावली व विनियमत दयेकेमाः धयादिल । उगु ज्याझ्वलय् वय्कलं दैनिक जीवनलिसे स्वापू दुगु सवालय् भाषा छ्यलेत बः बिइमाःगु सुझाब बियादिसें उपलब्धी सितिकं छ्वये मजिउ धयादिल ।

नेवाः देय् दबूया सल्लाहकार त्रिरत्न शाक्यं थ्व कानुन लागू जुइवं काय्, म्ह्याय्, छय्पिंत छ्ययेकेगु वातावरण चूलाइगु आशा यानादिसें आः थप अधिकारया लागिं नं दबाब बीमाः धयादिल । डा. योगेन्द्र प्रधान सहजकर्ता जुयाः न्ह्याकूगु अन्तक्र्रिया ज्याझ्वलय् राजभाई जकःमि, सरिता महर्जन, शाक्य सुरेन, नरेश नेवाः, कृष्णबहादुर घजू, न्हुछेबहादुर प्रजापति, कृष्ण प्रजापति, हिराकाजी महर्जन, प्रदीपरत्न शाक्य, जितेन्द्र रसिक, राजा शाक्य, ज्ञानराम श्रेष्ठ लगायतं थीथी सुझाब बियादीगु खः । नेवाः देय् दबूया न्वकू उमेश स्थापितं कानुनी प्रावधान व संघर्षया उपलब्धीयात कयाः ध्वाथुइकादीगु ज्याझ्वलय् विराटया नायः महेन्द्रगोपाल कर्माचार्यं च्यागू बुँदाया सार न्यंकादीगु खः । सिद्धिदास प्रतिष्ठान लिसे जानाः जूगु ज्याझ्वः प्रतिष्ठानया नायः नरेन्द्रभक्त हाडाया सभापतित्वय् जूगु खः ।