छाँयादेवी कम्प्लेक्सयात देय् दबूया ख्याच्वः

येँ (नेपालभाषा टाइम्स)-थनया थँबहिलिइ ऐतिहासिक पुखू त्वपुनाः दयेकूगु छाँयादेवी कम्प्लेक्सया सवालय् नेवाः देय् दबुलिं छाँयादेवी मार्केटिङ डाइरेक्टर सुमन विक्रम पाण्डेया धापूया खण्डन याःगु दु । डाइरेक्टर पाण्डें छाँयादेवी कम्प्लेक्स दयेके न्ह्यः नेवाः देय् दबूलिसे थम्हं निघौ ब्रिफिङ यानागु धकाः याःगु दावी गलत खः धासें देय् दबूपाखें उकिया खण्डन याःगु खः ।

देय् दबूया नायः पवित्र वज्राचार्यं म्हिगः छगू वक्तव्य जारी यासें देय् दबुलिं छाँयादेवीया सुं नं मनूलिसे थुकिया बारे खँल्हाबल्हा मयाःगु व नेवाः संस्कृति एवं सम्पदालिसे स्वाःगु ऐतिहासिक पुखू स्यंकाः व्यापारिक भवन दयेकेगु ज्यायात देय् दबुलिं गबलें नं समर्थन याये फइ मखु धाःगु दु ।

छाँयादेवीपाखें देय् दबूयात स्वानाः पित बिउगु धापू लित कायेत इनाप यासें उगु थासय् पुलांगु पुखू हे कायम जुइमाः धइगु बिचाः नं देय् दबुलिं स्पष्ट याःगु दु ।