गामय् सुनसान–येँय् भीडमभीड

येँ (नेपालभाषा टाइम्स)- म्हिगः घ्यःचाकु संल्हू कुन्हु थारू व मगर जातिं हनीगु विशेष पर्वयात कयाः निगू समाचार पिदन । थ्व निगू समाचारयात छथासं तयाः स्वयेबलय् नेपाःया समाजय् वयाच्वंगु तीव्र हिउपाः व आन्तरिक बसाइँ सराइया विकराल रुपया स्पष्ट किपा खने दइ ।

छगू समाचार खः, येँया तिंख्यलय् थारु व मगः जातिं घ्यःचाकु संल्हू कुन्हु हनीगु विशेष समारोह ब्वति काः वःपिं मनूतय् दथुइ तसकं भीड जुयाः च्याम्ह घाःपाः जुल । तिंख्यः दुने जूगु तःधंगु भीडय् कानाः च्याम्ह घाःपाः जूगु खःसा उमित वासः याकेत अस्पताल यंके माःगु खः । उमित वीर अस्पतालया ट्रमा सेन्टरय् तयाः वासः याकेमाःगु खः । म्हिगः तिंख्यलय् जूूगु थ्व नखः हनेज्यां यानाः उगु लागाया यातायात समेत प्रभावित जूगु खः ।

अथे हे मेगु समाचार खः, बागलुङय् स्थानीय मगः तथा छन्त्याल जातिं घ्यःचाकु संल्हू कुन्हु हनीगु विशेष पर्व हनीपिं मनूत हे मदयाः सुनसान जुल । थ्व पर्व कुन्हु अन दँय्दसं भीड जुयाः तामझामपूर्वक नखः न्यायेकीगु खः । तर थुगुसी धाःसा यक्व हे सुनसान जूगु बुखँ राससं बिउगु दु ।

थ्वकुन्हु अन थवंथः नापलायेगु लिसें होरे कापै (डम्फु थानाः प्याखं हुलेगु) चलन दुगु खः । तर वंगु छुं ई न्ह्यवंनिसें निसीखोला गाउँपालिका–१ या लेबाङ, निसीखोला–५ या निसी व ६ या भल्कोट गाउँ बाहेक मेगु फुक्क हे थासय् कापै म्हितेगु बन्द जुइधुंकूगु दु ।

डेढदशक न्ह्यः तक मुख्य बजारंनिसें ग्रामीण लागाय् भव्य रुपं न्यायेकीगु थ्व पर्व आः तना वनाच्वंगु खँ तमानखोला–३ या वीरबहादुर बुढा मगरं कनादिल । न्हापा थें नखःचखः हनीपिं म्हो जुया वंगु धासें थन च्वंपिंसं थुकी चिउताः मतःगु खँ नं वय्कलं कनादिल ।

ढोरपाटन नगरपालिका–६ या ७५ दँ दुम्ह केशवबहादुर छन्त्यालं ल्याय्म्हतय्सं माघे सङ्क्रान्तिया महत्व मथूगुलिं मौलिक परम्परा लोप जुइगु अवस्थाय् थ्यंगु खँ कनादिल । थःपिनि पालय् तक पुर्खां ल्यंकातःगु संस्कृति संरक्षण याना वयाच्वनागु खःसां आः धाःसा थुकियात ल्यंकेत थाकुया वःगु खँ नं वय्कलं कनादिल ।

नेपाःया थीथी गामय् स्थानीय पर्व हनेगु ज्या म्हो जुजुं वंगु व गनं ला लोप हे जुइगु अवस्था थ्यंसां राजधानी येँय् धाःसा वहे पर्व हनेत भीडमभीड जुइगु अवस्थापाखें नेपाःया जनसंख्या वितरणय् तसकं हिउपाः वयाच्वंगु संकेत बिउगु खँ विज्ञतय्सं धाःगु दु । थौंकन्हय् येँय् तामाङ, मगः, गुरुङ, राई, लिम्बु, थारु जाति लगायत तराई व सुदूर पश्चिमया नखःत तःजिक न्यायेकेगु ज्या जुयाच्वंगु दु ।