ने. सं. ११४४ कौलाथ्व पारू - नःलास्वनेगु

आनन्द निकेतन अन्तर्राष्ट्रिय स्तरया सुविधासम्पन्न वृद्धाश्रम

चितिक्क च्वंगु क्वथा, क्वथाय् दुने हे एटाय्च बाथरुम, नये त्वनेगु निंतिं सफा–चितिक्क च्वंगु मेस, सफा व आधुनिक भुतू क्वथा, थहां–कुहां जुइत लिफ्ट, न्यासि वने मफुपिनिगु निंतिं ह्विलचेयरय् च्वनाः तलय् कुने याये जिइक अपाङ्ग मैत्री लँ, ध्यान यायेगु क्वथा, योग यायेगु क्वथा, सफूकुथि, सुं विरामी जूसा तुरुन्त उपचारया निंतिं उपचार क्वथा, न्हियान्हिथं उसाँय चेकजाँच यायेगु निंतिं नर्सिङ्ग स्टेशन, २४ सै घन्टा स्वास्थ्यकःमिपिनि उपस्थिति, उपचारया निंतिं पिने यंकेमाःसा निःशुल्क एम्बुलेन्स सेवा । थ्व फुक्कं सुविधा दुगु छगू भवन । उकिसनं पिनें स्वयेबलय् स्वनिगःया पुलांगु लाय्कू लागाय् च्वंगु दरवार थें दाचि अप्पां दयेकातःगु, च्वय् गजू छायातःगु भव्य भवन । थ्व फुक्क सुविधा दुगु भवन धायेबलय् छिगु मतिइ वन जुइ, थ्व छुं थिकेगु अपार्टमेन्ट वा स्टार होटलया भवन जुइ । तर अथे मखु, थ्व ला सितिकं च्वनेगु भवन खः ।

सितिकं च्वनेगु धायेबलय् छि पत्या मजुइफु, तर सत्य थ्व हे खः । सुनां स्वः मदुपिं ज्याथजिथिपिंत तयेगु निंतिं यलया ज्यापु समाजं दयेकूगु वृद्धाश्रमया भवन खः थ्व । छेँय् सुनां स्वः मदयाः निरस जीवन म्वानाच्वंपिं ज्याथजिथिपिंत थः म्वातले आनन्दं जीवन म्वायेगु निंतिं च्वनेत दयेकूगु भवन खः थ्व । उकिं थ्व भवनया नां हे तयातःगु – ज्येष्ठ नागरिक आनन्द निकेतन भवन ।

झीगु समाज बुलुहुं स्वार्थी समाज जुया वनाच्वंगु दु । थःगु स्वार्थया निंतिं काय–म्ह्याय्पिंसं बुराबुरी जुइधुंकूपिं मांअबुपिंत तकं मस्वइगु समाज जुया वनाच्वंगु दु । तर थज्याःगु समाज दुने नं थःगु निंतिं मखु, मेपिनि निंतिं छुं यायेमाः धयागु भावना दुपिं मनूत नं दइगु जुयाच्वन ।

थज्याःगु हे भावनां छम्ह सामान्य किसान परिवारय् बूम्ह यलया अष्टमान महर्जनं झिदँ न्ह्यः वृद्धाश्रम दयेकेगु निंतिं यलया बागडोलय् च्वंगु थःगु १ रोपनी १३ आना जग्गा व न्यय्गू लाख दां ज्यापु समाजयात लःल्हाःगु खः ।

जग्गा ला दत, तर अन गज्याःगु भवन दयेकेगु, समाजं वृद्धाश्रम संचालन याये फइ कि मफइ धयागु विवाद ब्वलन । थ्व विवादया झ्वलय् समाजया छगू दँमुँज्याय् हे छम्हेसिनं ‘थ्व जग्गा समाजयात स्यंकेत दान बिउगु खः, गथे सुं मनूयात स्यंके माल धाःसा किसि दान याइ धाइ, अथेहे समाजयात स्यंकेत जग्गा दान बिउगु खः । समाजं वृद्धाश्रम संचालन हे यायेफइमखु’ धकाः तकं धाल ।

उबलय् हे थुगु वृद्धाश्रम दयेकेमाः धकाः पहल याना वयाच्वनादीम्ह ज्यापु समाजया वर्तमान नायः तीर्थलाल महर्जनं थुकिया लिसः बी कथं धयादिल, ‘धाथें दान ला किसि हे बिया हःगु खः । तर किसि धयाम्ह लक्ष्मीया बाहां खः । उकिं आः झीथाय् लक्ष्मी हे दुहां वःगु दु, उकिं वृद्धाश्रम दयेकेगु निंतिं नं यक्व हे थज्याःपिं दान बीपिं वइतिनि धन्दा कायेम्वाः । वृद्धाश्रम दयेकेगु निंतिं सुयाकें नं जबर्जस्ती चन्दा कायेगु जुइमखु, नुगः क्वसाःपिंसं अथें हे बी ।’

वृद्धाश्रमया भवन दयेकेगु निंतिं तीर्थलाल महर्जनया हे संयोजकत्वय् छगू कमिटी नीस्वन । वय्कःया हे नेतृत्वय् ज्यापु समाज भोल गणेशय् च्वंगु थौंकन्हय्या भवन नं दयेकूगु खः । वृद्धाश्रम दयेकेगु जिम्मा वयेधुंकाः वय्कलं सामान्य मखु सुविधासम्पन्न, अन्तर्राष्ट्रियस्तरया हे वृद्धाश्रम भवन दयेकेगु परिकल्पना यानादिल ।

अन्तर्राष्ट्रियस्तरया भवन दयेकेगु परिकल्पना ला यानादिल, तर थुकियात पूवंकेगु उलि अःपुगु ज्या धाःसा मखु । उबलय् हे थ्व भवन दयेकेत झिंनिगू करोडं अप्वः तुइगु अनुमान जूगु खः । नुगः क्वसाःपिंसं निगू लाख–प्यंगू लाख, न्यागू लाख ग्वाहालि ला बिल, तर सुविधा सम्पन्न भवन दयेकेत भचा भचा ध्यबां गाइगु ला मखुत । थुकिया निंतिं सरकारीस्तरं, अन्तर्राष्ट्रियस्तरं हे ग्वाहालि दयेमाः धयागु जुल । अले थुकिया निंतिं पहल सुरु जुल । थ्वहे झ्वलय् देशय् संघीय गणतन्त्र वयेधुंकाः स्थानीय तह, प्रदेश सभाया लिसें प्रतिनिधि सभाया चुनाव जुल । स्थानीय चुनावय् यल महानगरपालिकाय् ज्यापु समाजया हे पुलांम्ह नायः चिरिबाबु महर्जन त्यात । वय्कलं वृद्धाश्रम दयेकेगु निंतिं दँय् छगू करोड दां ग्वाहालि यायेगु घोषणा यानादिल । अथेहे बागमति प्रदेश सरकारपाखें थ्यंमथ्यं स्वंगू करोडया ग्वाहालि जुल । थ्व हे झ्वलय् नेपाःया निंतिं भारतीय राजदूतावास पाखें नं न्यागू करोडया ग्वाहालि जुल । थुकिया निंतिं भाजु महर्जनं यक्व हे कथं कुटनीतिक पहल यानादिल ।

‘भारतीय दूतावासं ग्वाहालि कायेगु अःपुगु खँ मखु । भारतीय दूतावासलिसे समाजया तप्यंक स्वापू दुगु ला ख हे मखुत । थुकिया निंतिं तीर्थलालजुं यक्व हे कुटनीतिक पहल यानादिल । वय्कःया कुटनीतिक सुझबुझया कारणं हे जक थ्व सम्भव जूगु खः’ महर्जनयात समाजया ज्याखँय् थीथी कथं सल्हा सुझाव बिया वयाच्वनादीम्ह उपप्राध्यापक तुलसीलाल सिं धयादी ।

सरकार, प्रदेश सरकार, यल महानगरपालिका, सांसद, नुगलय् स्वां ह्वःपिं दातापिनि ग्वाहालिं वय्कःपिनि कल्पना कथं हे वृद्धाश्रम भवन तयार जूगु दु । वय्कःपिनि परिकल्पना साकार जूगु दु । निला न्ह्यः प्रधानमन्त्री शेरबहादुर देउवां भवनया उलेज्या याःगु दु ।

भवन ला तयार जुल, आः थ्व वृद्धाश्रम संचालन यायेगु हाथ्या वय्कःपिंत दु । वय्कःपिं आः वृद्धाश्रम संचालनया निंति थीथी कार्ययोजना दयेकेगुली लगे जुयाच्वनादीगु दु । थुकिया निंतिं सनराइज, सिभिल बैंकया पुलांम्ह कार्यकारी प्रमुख किशोर महर्जनं ज्या यानाच्वनादीगु दु । दकलय् न्हापां वृद्धाश्रम गुकथं संचालन यायेगु धयागु कार्यविधि दयेकाच्वंगु दुसा वृद्धाश्रम संचालनया निंतिं आर्थिक व्यवस्थापन गुकथं यायेगु धयागु योजनात दयेकाच्वंगु दु ।

वृद्धाश्रम संचालनया निंतिं तत्कालया निंतिं न्यागू करोडया छगू अक्षय कोष दयेकेगु तयारी जुयाच्वंगु खँ भाजु महर्जनं कनादी । ‘थ्व बाहेक केन्द्रीय सरकार, प्रदेश सरकार व स्थानीय सरकारपाखें वार्षिक रुपं हे ग्वाहालि कायेगु जुइ । थथे ग्वाहालि यानादीगु बापत सरकारयात नं वृद्धाश्रमय् कोटा छुटे यायेगु जिमिगु योजना दु’ वय्कलं धयादिल ।

आनन्द निकेतन भवन ११० बेडया खः । थुकी मध्ये ज्यापु समाजया पीगू त्वाःया निंतिं हरेक त्वाःयात छम्ह छम्हया ल्याखं पीगू, यलया थीथी जातीय खलः पुचःतय् निंतिं नीगू, यल महानगरपालिका, प्रदेश सरकार व केन्द्रीय सरकारया निंतिं छुं बेड कोटा कथं हे छुटे यायेगु व्यवस्थापन पुचःया योजना दु । कोटा कथं बीगु थ्व फुक्क बेड निःशुल्क जुइ । फुपिंसं थःपिंसं मनं खं कथं ग्वाहालि यायेफइ, मफुपिंसं छुं नं बीम्वाः, निःशुल्क हे अन दुगु फुक्क कथंया सुविधा छ्यले दइ । थ्व बाहेक ल्यं दुगु बेड धाःसा ध्यबा पुलाः च्वनीपिंत सशुल्क उपलब्ध जुइ ।

‘झीथाय् ध्यबा दयां नं स्वइपिं सुं मदयाः याकःचा च्वंच्वनेमाःपिं ज्याथजिथिपिं यक्व दु । काय म्हयाय् विदेशय् जुइ, थन मां अबु जक जुयाच्वनी । बुराबुरी जुइधुंकूपिं थुमित ध्यबा दःसांं स्वइपिं सुं दइमखु, सुसाःकुसाः याइपिं सुं दइमखु, अज्याःपिंत ध्यबा कयाः हे थन च्वनेगु व्यवस्था यायेत्यनागु दु । ध्यबा दुपिंसं भचा भचा पुलाबीगु ध्यबां मेपिं पुलेमफुपिंत नं यक्व ग्वाहालि जुइगु जिमिसं खना’ समाजया नायः महर्जनं धयादी ।

वय्कःपिसं आः आनन्द निकेतनया लिक्क च्वंगु स्वंगू रोपनी जग्गा कायेगु व थ्व वृद्धाश्रमं १०० मिटर ति तापाक च्वंगु १२ रोपनीया पर्ति जग्गाय् पार्क दयेकेगु योजना नं दयेकाच्वंगु दु । ‘भवन मनं खना थें तयार जूसां थन पार्किङ्गया निंतिं थाय् भचा मगानाच्वंगु दु । उकिं नापं च्वंगु ३ रोपनी जग्गा न्याना कायेगु जिमिगु योजना दु । अथेहे थनं १०० मिटरति च्वय् च्वबहा द्यःया न्हवं याइथाय् १२ रोपनी पर्ति जग्गा दु । थन छगू पार्क दयेकेगु योजना दु । पार्क दयेकेफत धाःसा थन च्वनीपिं बाज्या अजिपिंत न्हि छ्यायेत अःपुइ । अन वनाः क्यबय् लः बीगु लिसें थःम्हं फुकथं ज्या यानाः याउँक न्हि छ्यायेफइ धयागु जिमिगु बिचाः खः’ भाजु महर्जनं थःपिनिगु थप योजना बारे कनादिल ।

छुं ई लिपा हे संचालनय् हयेगु थ्व वृद्धाश्रम बांलाक हे संचालन जुइगु विश्वास वय्कःपिनि दु । ‘याये धयागु ज्या मन तयाः यात धाःसा न्ह्याथें ज्याःगु ज्या नं सम्भव जुइ । दातापिनि ग्वाहालि, पासापिनि सहयोगया कारणं थःपिसं मनं खना थें भवन दयेकेज्या ताःलाःगु दु’ तीर्थलाल महर्जनं धयादी, ‘आः थ्व वृद्धाश्रम संचालन यायेगु ज्याय् पूवंक ध्यान बीगु जुइ । वृद्धाश्रम सुविधा सम्पनन जुयाः बांलाक हे संचालन जुइ धयागु जिमिगु विश्वास दु ।’