वैशाख २४ : बसन्तपुलिइ नेवाः–तामाङ सभा
येँ (नेपालभाषा टाइम्स)÷ बागमती प्रदेश संसदं पारित याना तःगु सरकारी ज्याखँया भाषा सम्बन्धी विधेयक कार्यान्वयन जुइगु न्हि कुन्हु संघीय राजधानी येँय् छगू तःजिगु ¥याली व सभा यायेगु तयारी बागमती प्रदेश सरकारं याःगु दु । वकुन्हु येँय् विशेष यानाः नेवाः व तामाङ समुदायं थःपिनि जातीय भेषभुषा पुनाः बाजागाजा सहित तःजिगु ¥याली पिकयाः लसता प्वंकेगु ज्याझ्वः दयेकूगु दु । वकुन्हु येँया बसन्तपुलिइ मू ज्याझ्वः यायेगु ग्वसाः दुसा ¥यालीं येँया थःने व क्वःने लागा चाःहिलीगु ज्याझ्वः दयेकूगु दु ।
ज्याझ्वःयात तःजिक सम्पन्न यायेगु लागिं म्हिगः बागमती प्रदेशया संस्कृति मन्त्रालयं येँय् याःगु छगू मुँज्यां २४ गते जुइगु ज्याझ्वःया समारोह समिति नं गठन याःगु दु । संस्कृति मन्त्री शैलेन्द्रमान वज्राचार्यया अध्यक्षताय् गठन याःगु उगु समितिइ नेवाः व तामाङ समुदायया थीथी ख्यलय् सक्रिय जुयाच्वंपिं ३०३ म्ह दुजः दुथ्याकूगु दु । लिसें नेवाः न्ह्यलुवा मल्ल के. सुन्दर, तामाङ न्ह्यलुवा परशुराम तामाङ आदि समेत दुथ्याःगु सल्लाहकार पुचः नं गठन याःगु दु । समारोह समितिइ दुथ्याःपिं दुजःत हे च्वनाः छगू सचिवालय नं दयेकूगु दु । सचिवालयया तयारी मुँज्या धाःसा न्हिंन्हिं हे च्वनेगु खँ धाःगु दु ।
प्रदेश सरकारं वैशाख २४ गतेया ज्याझ्वःया लागिं माःगु तयारी यायेगु जिम्मा नेवाः देय् दबू व तामाङ घेदुङयात बिउगु दु । म्हिगः ज्याझ्वलय् नेवाः देय् दबूया नायः पवित्र वज्राचार्य व तामाङ घेदुङया सह अध्यक्ष कुमार सिंह घिसिङपिंसं नं सम्बोधन यानादीगु खः । ज्याझ्वलय् न्ववासें वय्कःपिंसं थ्व नेपालभाषा व तामाङ भाषाया लागिं थ्व छगू ऐतिहासिक घटना खः, आः थुकियात सफल कार्यान्वयन यायेगु लागिं निगुलिं समुदायं अझ यक्व ज्या याये मानि धयादिल ।
प्रदेश मन्त्री वज्राचार्यं बागमती प्रदेशय् कानुन हे हयाः भाषायात मान्यता बिउगु थ्व खँ सकस्यां सीमा धकाः वकुन्हु सार्वजनिक बिदा बियागु खँ कँसें थ्व घटनायात राष्ट्रिय महत्व बीकेगु लागिं प्रधानमन्त्रीया हे मूपाहांसुइ संघीय राजधानीइ ज्याझ्वः यायेत्यनागु खँ कनादिल ।
ज्याझ्वः बारे प्रचार प्रसार यायेगु लागिं ग्वसाः खलकं छगू पत्रकार सम्मेलन नं यायेत्यंगु खँ सीदुगु दु । वकुन्हुया ज्याझ्वलय् सकल नेवाः खलः पुचः, क्लब लिसें जातीय संगठन, गुथि खलःतय्सं नं ब्वति कायेत मन्त्री वज्राचार्यं इनाप यानादीगु दु ।
LEAVE YOUR COMMENTS