नेवाः नुगः दुम्ह पत्रकार विक्रम शाक्य

पत्रकारिता छगू व्यवसायिक ख्यः खःसा नेवाः नुगः धइगु स्वनिगःया आदिवासी नेवाः समुदायया भावना खः । यक्व आदिवासी जनजाति पत्रकारत दु, अले इपिं अप्वः यानाः आदिवासी जनजातिया ख्वाःपाः खः । तर आदिवासी जनजाति समुदायया भावनाया प्रतिनिधित्व यानादीपिं धाःसा म्हो जक दु। नां जकया आदिवासी जनजातिया पत्रकार जुयाच्वंपिं नं आपालं खनेदु। छुं नं राजनीतिक दललिसे दुने दुनें वा पिनें खने दयेक स्वापू तयाः व हे पार्टीया लाइनकथं ज्या यायेगु अले आदिवासी जनजातिया ख्वाःपाः पिब्वयेगु यानाच्वंपिं यक्व पत्रकारत दु। तर नेवाः पत्रकारिता ख्यलय्स्व ल धाःसा अप्वः याना नेवाः नुगः दुपिं पत्रकारत हे आपाः खनेदु। भावनाया ल्याखं नेवाः अले भाषा, संस्कृति, सम्पदा, पहिचानयात तिबः बीमाः धाइपिं हे अप्वः खनेदु ।

पत्रकारिताया माध्यमं हे भाषा, संस्कृतिया निंतिं ज्या याये, सेवा याये धाइपिं नेवाः पत्रकारत म्हो मजू । नेवाः पत्रकारतय् पुचलय् नेवाःतय्गु भाषा, संस्कृति, सभ्यताया जक मखु नेवाः भूमि नापं नेवाःतय्गु सामूहिक अधिकारया निंतिं आदिवासी नेवाः धकाः न्ह्यःने वनेमाः धकाः बिचाः प्वंकादीम्ह छम्ह पत्रकार पासा खः विक्रम शाक्य । यक्व नेवाः पत्रकार पासापिं नेवाः नुगः दुपिं दु तर नेवाःतय्गु अधिकारया सवालय् गबलें नं ग्याःचिकु पहः मतइम्ह अले थम्हं फुकथंया भूमिका म्हितादीम्ह पत्रकार विक्रम शाक्य खः ।

नेपालय् माओवादीं सशस्त्र युद्ध न्ह्याकाच्वंगु इलय् नेवाः अधिकार नापं गणतन्त्र देय्या आवश्यकता खः धइगु तायेकाः पत्रकारिताया माध्यमं तःधंगु भूमिका म्हितादीगु दु। अबलय् कयौं नेवाः पत्रकारपिंसं हये मफुगु समाचार हयादीगु व मेट्रो एफएमय् प्रशारण यानादीगु थौंतक नं लुमं । नेवाःतय्गु आधिकारया निंतिं जुइगु छुं नं कथंया आन्दोलन बाय् घटनायात कयाः समाचार बीत हथाय् चायादीम्ह वय्कः विक्रम शाक्य खः । मेट्रो एफएमया स्थापनाकालनिसें नापं ज्या याना । नापं समाचार बीगु नं याना । नेवाः भासं ज्याझ्वः संचालन जुयाच्वंगु इलय् न्हूकथंया सोचसहित न्हूगु हाथ्याया सामाना यायेत तयार जुयाः एफएमया ख्यलय् समाचार व समाचारमूलककथंया न्हियान्हिथंया अन्तर्वार्ता तत्कालया विषययात कायेगु योजना दयेकूगु इलय् नं साथ बियादीम्ह जक मखु वय्कलं उकथंया ज्याझ्वः तकं नापं जानाः संचालन यानादीगु खः । थुकिं नं क्यं कि नेवाःतय्गु अधिकारया निंतिं संचारमाध्यमपाखें भूमिका म्हितेमाः । नेवाः समुदाययात न्ह्यःने यंकेत न्ह्याथेंजाःगु हाथ्यायात नं सामाना यायेमाः धकाः धयादीम्ह खः पासा विक्रम शाक्य ।

नेपालय् माओवादीं सशस्त्र युद्ध न्ह्याकाच्वंगु इलय् नेवाः अधिकार नापं गणतन्त्र देय्या आवश्यकता खः धइगु तायेकाः पत्रकारिताया माध्यमं तःधंगु भूमिका म्हितादीगु दु। अबलय् कयौं नेवाः पत्रकारपिंसं हये मफुगु समाचार हयादीगु व मेट्रो एफएमय् प्रशारण यानादीगु थौंतक नं लुमं ।

नेवाःतय्गु अधिकारमुखी आन्दोलनया विश्लेषण यानाः समग्र नेवाःतय्गु हक अधिकारया निंतिं नापं आदिवासी जनजातिया अधिकारया नितिं न्ह्यःने वनेमाः धइगु भाःपियाः सक्रिय जुयादीम्ह खः । कयौं पासापिंसं नेपाःया पत्रकारिता ख्यःया मंकाःगु संगठन नेपाल पत्रकार महासंघया सदस्यता कायेगु सवालय् अलमल यानाच्वंगु अवस्थाय् येँ महानगरपालिकां न्ह्याका वयाच्वंगु मेट्रो एफएम प्रतिष्ठान शाखाया सभापति जुयाच्वनागु इलय् शाखाया सदस्य जुइत इनाप यानागु इलय् अःपुक स्वीकार यानादीगु जक मखु वय्कः महासंघया मेट्रो एफएम प्रतिष्ठान शाखाया सभापति तकं जुयाः नेतृत्व यानादीम्ह व्यक्तित्व खः । अथे हे नेवाः पत्रकार राष्ट्रिय दबू यल कचाया छ्याञ्जे जुया तकं ज्या यानादीगुलिं नं प्रष्ट जू कि वय्कः छम्ह नेवाः नुगः दुम्ह पत्रकार नापनापं व्यवसायिक पत्रकारिता यानाः श्रमजीवी पत्रकारिताया निंतिं न्ह्याः वनेमाः धकाः प्रष्ट विचार दुम्ह खः धकाः ।

छगू इलय् यलया छुं समाचार माल धाःसा सुयात स्वापू तयेगु धकाः सुना नं न्यन धाःसा अःपुक हे लिसः वइगु नां खः विक्रम शाक्य । वय्कःया जन्मभूमि यल अले यलय् च्वंपिंलिसे यक्वकथंया स्वापू दुगु जूसां नं समग्र नेवाःतय्गु सवालय् हे सक्रिय जुयादीम्ह नापनापं नेवाःतय्त अधिकार प्राप्त याकेगु निंतिं भूमिका म्हितेमाः धकाः सः तयादीम्ह व स्पष्ट रुपं ग्याःचिकु गबलें नं मतसे प्रष्ट रुपं थःगु बिचाः संचारमाध्यमपाखें तया वयाच्वनादीम्ह पत्रकार पासा विक्रम शाक्य वंगु असोज १४ गते चान्हय् आकाझाकां मत्यवं ४९ दँया बैशय् मंत । वय्कः मदुगुलिं नेपालभाषा पत्रकारिता ख्यःया निंतिं तःधंगु क्षति जूगु दु ।

थ्यंमथ्यं निदँ न्ह्यःनिसें वय्कःयात हिनू अर्थात नशा सम्बन्धी ल्वचं कःगु खःसा अबलेनिसें वय्कः नियमित रुपं पत्रकारिताय् सक्रिय जुयादी मफुत । लिपांगु इलय् कोरोना महामारी सुरु जुइ धुंकाः नं फयांफत्तले एफएमय् वयाः ज्याझ्वः न्ह्याका वयाच्वनादीगु खः । कयौं न्यनामिपिंसं रेडियो एफएमया निंतिं तसकं बांलाःगु सः दुम्ह, नुगलय् छुं नं कथंया खँ सुचुकेगु ज्या मयासे प्रष्ट रुपं धायेगु नापनापं नेवाः ख्यःया हरेक सवालय् अन्तर्वार्ता काइगु जूसां नं नेवाःतय्गु राजनीतिक अधिकार नाप स्वाकाः मचायेक साला यंके सःम्ह, नेवाःतय्त राजनीतिक रुपं सचेत जुयाः थःपिनिगु अधिकारया निंतिं न्ह्याः वनेमाः धकाः ध्वाथुइकादीम्ह प्रतिभाशाली नापं ज्वःमदुम्ह नेवाः पत्रकार खः धकाः धायेगु याना वयाच्वंगु दु।

यलय् बौद्ध धर्मया ख्यलय् नं विशेष योगदान बीकथं बौद्ध न्ह्यसः लिसः कासाया निंतिं तःधंगु योगदान यानादीम्ह, यलया हरेक संस्कृतिनिसें सम्पदाया बारे च्वयेगु ज्या यानादीम्ह अले नेवाः नुगःयात पिब्वयादीम्ह पत्रकार खः विक्रम शाक्य । उकिं तप्यंक हे धायेफु कि विक्रम शाक्य धइम्ह मात्र यलया नेवाः पत्रकार जक मखु। थःके दुगु नेवाः नुगः पिब्वइम्ह अले नेवाः पत्रकारिता ख्यलय् ज्वःमदुम्ह खः धकाः धायेफइगु अवस्था दु। वय्कः मत्यवं मदुगुलिं नेवाः पत्रकारिता ख्यःनापं नेवाः ख्यःया नितिं नं तःधंगु क्षति जूगु दु। वय्कःया योगदानयात सदां सदां लुमंकातयेमाः ।वय्कःया भावना कथं हे नेवाः पत्रकारता ख्यलं ज्या यायेफत धाःसा अवश्य नं पत्रकार विक्रम शाक्ययात लुमंकेगु ज्या जूगु जुइ । दकलय् लिपा पासा विक्रम शाक्ययात श्रद्धाञ्जली प्वंकुसे दुःखंकःपिं छेँजःपिंत धैर्य धारण याये फयेमाः धकाः बिचाः हायेकाच्वना । सुभाय् ।