स्वंगू शक्तिया सक्रियता
नेपाःया राजनीतिइ आः विशेष यानाः स्वंगू धार दथुइ चलखेल जुयाच्वंगु दु । प्रधानमन्त्री केपी ओली सरकारया नेतृत्व यानाच्वंगु दल नेपाल कम्युनिष्ट पार्टी (नेकपा) दुने हे नेतातय्गु दथुइ चलखेल जुयाच्वंगु दु । एमाले व माओवादी केन्द्र एकता जुइ धुंकाः पार्टी दुने ब्वलनाच्वंगु समस्या समाधान याये मफयाच्वंगु, पार्टीयात क्वंनिसें एकता याये मफयाच्वंगु, सरकारयात प्यखेरं आलोचना यानाच्वंगु, सरकारयात अन्तर्राष्ट्रिय जगतपाखें नं माःगु कथं ग्वाहालि याना मच्वंगु अवस्था दु ।
पार्टी दुनेया गुट उपगुटया कारणंनिसें पार्टी नेतृत्वं न्ह्यःनेलाःथे पार्टी संचालन यानाच्वन धकाः नं उतिकं आलोचना जुयाच्वंगु दु । थुकिं यानाः पार्टी दुने हे नेतातय् दथुइ विवाद जुयाच्वंगु दुसा पार्टीया स्थायी समितियात माःगु कथं सक्रिय मयासे सचिवालयपाखें जक ज्या यात धकाः नं नेतातय्सं हे आलोचना यानाच्वंगु अवस्था दु ।
सत्तापक्ष व प्रमुख प्रतिपक्ष जक मखु राजतन्त्रवादीत नं थ्व इलय् तसकं सक्रिय जुयावःगु दु । इमिसं न्हियान्हिथं हे थीथी कथंया गतिविधि यानाहःगु दु ।
यक्व ई लिपा अन्ततः पार्टी नेतृत्व स्थायी समितिया बैठक सःतेत बाध्य जुल । प्रधानमन्त्री निवासय् मखुसें पार्टी कार्यालयय् हे बैठक सःतेत अध्यक्ष बाध्य जूगु धइगु नं पार्टी दुने तःधंगु कथंया हे वहस व विवाद जुयाच्वंगुया चिं खः । सत्तापक्षीय पार्टी दुने जक मखु प्रमुख प्रतिपक्षी दल नेपाली कांग्रेस दुने नं तसकं विवादया दथुइ बैठक जुयाच्वंगु दु ।
पार्टी प्रमुख प्रतिपक्षी दल जूसां नं प्रतिपक्षया भूमिका म्हिते मफयाच्वंगु, थुगुसीया चुनावय् तसकं बांमलाक पराजय जूगु, नेतातय्गु दथुइ पदया विवाद जुयाच्वंगु नापं पार्टी दुनेया समस्या समाधान याये मफयाच्वंगु खँय् विवाद केन्द्रित दु । थज्वःगु इलय् कांग्रेसया महासमितिया बैठक नं जुयाच्वंगु दु ।
थुगु बैठकय् पार्टी नेतृत्वप्रति तसकं आलोचना यायेगु ज्या जुयाच्वंगु दुसा आः भावी नीति व योजना दयेकेगु निंतिं नं तीव्र रुपं वहस जुयाच्वंगु दु । सत्तापक्ष व प्रमुख प्रतिपक्ष जक मखु राजतन्त्रवादीत नं थ्व इलय् तसकं सक्रिय जुयावःगु दु । इमिसं न्हियान्हिथं हे थीथी कथंया गतिविधि यानाहःगु दु ।
पुलांम्ह जुजु ज्ञानेन्द्रयात हाकनं जुजु दयेकेगु, हिन्दू राज्य कायम यायेगु धकाः सक्रिय जुयाच्वंगु दु । उकिया नितिं पुलांपिं जुजुवादीनिसें न्हून्हूपिं जुजुवादीत नापं वर्तमान सरकार व राजनीतिक दल खनाः असन्तुष्ट जुयाच्वंपिं तकं सक्रिय जुयावःगु खनेदु । न्ह्यागु हे जूसां जुजुवादीत नं थ्व इलय् छगू शक्ति कथं सतकय् खने दयावःगु दु ।
सत्तापक्ष नेकपा व प्रमुख प्रतिपक्ष नेपाली कांग्रेस दथुइ आः गुकथं वनेगु धकाः थःथःगु दल दुने तीव्र रुपं बहस व छलफल यानाच्वंगु दुसा मेखे जुजुवादी शक्ति नं खने दयावःगु दु । थ्व स्वंगू कथंया राजनीतिक शक्ति हे थौंया इलय् हावी जुजुं वयाच्वंगु दु ।
नेपाल कम्युनिष्ट पार्टी (नेकपा)
शनिवाःनिसें न्ह्याःगु स्थायी कमिटीया बैठकय् अप्वः दुजःत पार्टीया नेतृत्व अध्यक्ष केपी शर्मा ओली व पुष्पकमल दाहाल विरुद्ध आक्रामक रुपं प्रस्तुत जूगु दु । बैठकय् नेतातय्सं पार्टी दुने नश्लवाद हावी जूगु, ब्यवहारय् भिंकेमाःगु, नेतृत्व हे गुट उपगुटय् लगे जूगु द्वपं बीगु ज्या तकं याःगु दु ।
पार्टीयात नेतातय्सं यकःति कथं संचालन याःगु, विधि व प्रक्रिया कथं पार्टी चले मयाःगु धकाः तसकं आक्रमक रुपं प्रस्तुत जुयाच्वंगु खः । स्थायी समितिया दुजःतय्गु दथुइ हे विवाद ज्यंके मफयाच्वंगु अवस्थाय् आः उगु पार्टीयात प्रदेश व जिल्ला अले स्थानीय तह तक गुकथं एकता याना यंकीगु खः धकाः मनूतय्सं न्ह्यसः तयाच्वंगु दु ।
दुने नेतातय्गु विवादया कारणं कार्यकर्तात झन झन निराश जुया वनाच्वंगु दु । पार्टी एकता नांया जक जुयाच्वंगु दुसा स्थानीय तहलय् ला एकता जूगु महसुस तकं याके फयाच्वंगु अवस्था मदु । अय्नं आः जुयाच्वंगु स्थायी समितिया बैठकय् तीव्र वहस व छलफलया दथुइ बांलाःगु खँ वइ ला धकाः कार्यकर्तातय्सं आशा यानाच्वंगु खनेदु ।
कांग्रेस दुनेया चलखेल
महासमितिया बैठक मंसीर २८ गतेनिसें येँय् जुयाच्वंगु दु । आः कांग्रेसया कार्यदिशा छु जुइ धइगु विषययात कयाः हे सहलह ब्याकेगु ज्या न्ह्याकूगु दु । महाधिवेशन लिपा सर्वोच्च निकाय धइगु हे महासमिति खः । मूल विषय धइगु विधान मस्यौदा पारित यायेगु खः । संघीयताया स्वरुप कथं विधान तयार यायेमाःगु अवस्था दु ।
पार्टीया राजनीतिक, आर्थिक, सांगठनिक व लेखा प्रतिवेदन पेश यानाः छलफल यायेमाःगु अवथा खः । बैठकय् न्ववाःपिंसं पार्टी नेतृत्वं गुट उपगुट यानाः पार्टीयात स्यंकूगु अले नेतृत्वं हे उकिया जिम्मेवारी कायेमाः खँ तःगु दुसा एजेण्डाय् हे मदुगु हिन्दू राष्ट्र घोषणाया बारे तकं प्राथमिकता बिया न्ववायेगु यानाच्वंगु दु ।
बैठक जुयाच्वंगुया पिने ला झन हिन्दु राष्ट्रया पक्षय् ला ल्हाःचिं मुंकेगु अभियान तकं संचालन यानाच्वंगु दु । कांग्रेसया निंतिं योगदान याःपिं व अन्यायलय् लानाच्वंपिं कांग्रेसया नेता कार्यकर्तातय्गु संरक्षणय् पार्टीया भूमिका प्रभावकारी दयेकेमाःगु, कांग्रेस दुगु हे गामय् माओवादी आन्दोलनया परिवारया सदस्यत गुमे याःपिंत यायेमाःगु व्यवहार, स्वदेशय् थःपिनिगु भविष्य सुनिश्चितता मदयाः खाडी मुलुकय् श्रम मियाच्वंपिं नेपाःमिपिनिगु प्रति कांग्रेसया धारणा, प्रधानमन्त्रीया किपा थामय् तयेगु ज्या याःगु तर न्यायया निंतिं निर्मलाया किपा तिके मबिउगु सरकारी दमनया सवालयात कयाः, संविधान संशोधनया माग याना वयाच्वंपिं मधेसी जनताप्रति दृष्टिकोण स्पष्ट यायेमाः धकाः नेतृत्वयात माग यानाच्वंगु दु ।
थुगु ल्याखं स्वल धाःसा कांग्रेसया नेतृत्वयात कार्यकर्तातय्त छगू हे थासय् तया यंकेगु नितिं झन झन चुनौती अप्वया वयाच्वंगु दु । पार्टी दुने हिन्दू राज्यया पक्षधरत खने दयावःगुलिं पार्टी धर्म निरपक्षेताया पक्षय् जूसां नं गुकथं न्ह्याः वनेगु धइगु तःधंगु हाथ्या ब्वलना वःगु दु ।
हिन्दू राज्यया नामय् जुजुवादीतय् चलखेल
पुलांम्ह जुजु ज्ञानेन्द्र शाहया जयजयकार यानाः हिन्दू राज्यया माग याइपिं मनूतय्सं थ्व इलय् गणतन्त्रया विरुद्ध तकं नारा थ्वयेकेगु यानाहःगु दु । राजतन्त्रया समर्थकतय्सं गणतन्त्रयात फाँसी बिउ धकाः नारा थ्वयेकेगु, संघीयता खारेज या धायेगु व हिन्दू राष्ट्र कायम या धकाः नाराबाजी यायेगु ज्या यानाहःगु दु ।
नेपाःया राष्ट्रिय ध्वाँय् ज्वनाः येँनिसें स्वनिगलं पिने तकं प्रदर्शन यायेगु ज्यायात तीव्रता बियाहःगु दु । पुलांम्ह जुजु ज्ञानेन्द्र नं थीथी धार्मिक ज्याय् सक्रिय जुयावःगुलिं नं हिन्दूवादी व राजतन्त्रवादीत सतकय् खने दयावःगु दु । उकिं गुलि गुलिसिनं आः नेपालय् धार्मिक ल्वापु तकं जुइफु धायेगु यानाहःगु दु ।
थुकथं नेपाःया राजनीतिइ स्वंगू कथंया शक्ति सक्रिय जुयाच्वंगु दु । थ्व स्वंगू शक्ति गुकथं वनी धइगु सवालय् अझ नं स्पष्ट जूगु मदुनि । कन्हय्या दिनय् झन झन स्पष्ट जुयावनी । अले जक नेपाःया राजनीति गुखेपाखे वनी धकाः धाये फइगु अवस्था वइ ।
LEAVE YOUR COMMENTS