ने. सं. ११४६ बछलाथ्व अष्टमी - लाेकतन्त्र दिवस

टोखा क्षेत्र सिल

रासस – टोखा नगरपालिकाया निम्ह मनूयात कोरोना सङ्क्रमण खनेदुगु दु । स्वास्थ्य तथा जनसङ्ख्या मन्त्रालयया कथं सोमवाः थपे जूपिं ७२म्ह सङ्क्रमितत मध्ये टोखा नगरपालिकाया निम्ह खः । येँया उत्तरी क्षेत्रय् लाःगु टोखा नगरपालिकाया वडा नं ३ टोखा बजाः वनेगु पाःचा नापसं व वडा नं ६या धनेश्वरं ढलमलटार वनेगु लँय् बालं च्वनाच्वंपिं निम्ह मिजंयात कोरोना सङ्क्रमण खनेदुगु खः ।

नगरपालिकाया प्रमुख प्रकाश अधिकारीं टोखाया निम्ह मनूयात कोरोना सङ्क्रमण खनेदयेवं उगु क्षेत्रयात सिल यानगु जानकारी बियादिल । लिप्पांगु इलय् स्वनिगलय् कोरोना सङ्क्रमितया ल्याः अप्वयेवं टोखा नगरपालिकां आरडिटी व पिसीआर परिक्षणयात तीव्रता बिउगु खः ।

टोखाय् आःतक ८०० स्वयां अप्व मनूतय् आरडिटी याःगु इलय् १३म्हेसिया आरडिटी रिपोर्ट पोजेटिभ खनेवं उमित पिसीआर परीक्षणया निंतिं राष्ट्रिय जनस्वास्थ्य प्रयोगशाला टेकुइ छ्वःगु खः ।