नीति निर्माण याइपिंके इन्टरनेट बारे जानकारी मदु

येँ –  इन्टरनेटया सदुपयोग अप्वयेके माःगु खँय् सरोकारावालातय्सं बः बिउगु दु । सेन्टर फर मिडिया रिसर्च नेपालं ग्वसाः ग्वःगु ज्याझ्वलय् नवानादीपिं वक्तातय्सं उगु खँ धयादीगु खः । नेपालय् इन्टरनेट फ्रिडम सम्बन्धी सम्मेलनय् नवासें वक्तातय्सं इन्टरनेटया सदुपयोग अप्वयेकाः दुरुपयोग म्हो यायेमाःगु नापं नेपालय् इन्टरनेट साक्षरताया आवश्यक जूगु खँय् नं बः बिउगु दु ।

नेपालय् नागरिकनिसें नीति निर्माण याइपिंकेतकं इन्टरनेटया बारे सही जानकारी मदुगु धासें थ्व सम्बन्धय् व्यापक जनचेतना अभिवृद्धि यायेमाःगु आवश्यक दुगु इमिसं धाःगु दु । सम्मेलनय् त्रिविवि पत्रकारिता व आम संचार केन्द्रीय विभागया प्रमुख चिरञ्जीवी खनालं इन्टरनेटपाखें आपालं फाइदा काये फइगु खँ दुसां नं थुकिया अधिकार बारे यक्वसित बांलाक जानकारी मदु धयादिल ।

अथे हे प्रदेश नं. ३ या संचार रजिष्ट्रार रेवती सापकोटां इन्टरनेट साक्षरता अप्वयेकेत सरकारं विशेष ध्यान बीगु जुइ धासें आम्दानीया स्रोत अप्वयेकेत नं थुकिया प्रयोग याये फइगु खःसां थुकिया दुरुपयोग याये मजिउ धयादिल । काठमाडौं विश्वविद्यालयया डा. सुधांशु दाहालं सूचना प्रविधि बारे आवश्यक जानकारी मदुगुलिं आपालं मनूत थुकिया शिकार जुइत बाध्य जुयाच्वंगु दु धयादिल ।

संस्थाया अध्यक्ष ऋषिकेश दाहालं नं नवानादीगु ज्याझ्वलय् पवित्रा राउत, उमेश श्रेष्ठ, नीतु पण्डित, सचिन ठकुरी लगायतं इन्टरनेट, आम संचार व पत्रकारिताया सम्बन्धय् ज्यापौ न्ह्यब्वयादीगु खः ।

सम्बन्धित बुखँ

LEAVE YOUR COMMENTS