भारतीय नक्सायात कयाः विरोध

नेमकिपां ख्वपय् जुलुस पिकाल, कांग्रेसया ध्यानाकर्षण

ख्वप – नेपाःया सीमा अतिक्रमण यानाः भारतं जारी याःगु न्हूगु नक्साया विरोध यासें नेपाल मजदुर किसान पार्टी म्हिगः ख्वपय् ¥याली पिकाःगु दु । कमल विनायकं न्ह्याकूगु विरोध ¥याली ख्वपया थीथी थासय् चाःहिलाः सूर्यविनायकय् थ्यंकाः विरोध सभाय् हिउगु खः ।

ताःइलंनिसें विवादय् लानाच्वंगु नेपाःया भूभाग लिपुलेक, लिम्पियाधुरा व कालापानीयात भारतं थःगु नक्साय् दुथ्याकाः न्हूगु नक्सा यायेवं नेपालय् विरोध सुरु जुयाच्वंगु दु । ख्वपय् जूगु विरोध ज्याझ्वलय् न्ववायेगु झ्वलय् नेमकिपाया सचिव लिसे प्रतिनिधि सभाया सांसद प्रेम सुवालं भारतं सीमा अतिक्रमण यानाः जारी याःगु नक्साया बारे सरकारं तत्काल चिउताः प्वंकाः अन्तर्राष्ट्रिय मञ्चय् सः थ्वयेकेमाः धयादीगु दु ।

वय्कलं सत्तारुढ दल व तःधंगु पार्टीं भारतया पलाःयात कयाः विरोध मयाःगुलिं भारतं सीमा अतिक्रमण याःगु द्वपं नं बियादीगु दु ।भारतीय केन्द्र सरकारं जम्मु काश्मिरय् याःगु हस्तक्षेप बारे नेपाःया राजनीतिक नेतातय्सं न्वमवाःगु व संयुक्त राष्ट्र संघय् जूगु सभाय् नेपाःया पक्षं सीमा विवादयात कयाः खँ ल्ह्वनेगु मयाःगुलिं यानाः आः नेपाःया भूमि अतिक्रमण यायेत भारत न्ह्यचिउगु खः धयादिसें वय्कलं नेपाःया सीमा अतिक्रमण यानाः भारतं जारी याःगु नक्सा भिंकेगु ज्या मयातले नेमकिपां सतक व सदनं विरोध यानाच्वनी धयादिल ।

थ्वहे झ्वलय् प्रमुख प्रतिपक्षी नेपाली कांग्रेसं नं नेपाःया कालापानी व लिपुलेक भारतं थःगु नक्साय् दुथ्याकूगु खँय् थःपिनिगु ध्यानाकर्षण जूगु खँ धाःगु दु । कांग्रसया प्रवक्ता विश्वप्रकाश शर्मां सामाजिक सञ्जालपाखें थःगु धापू तसें तत्काल सरकारया धापू सार्वजनिक यायेत व माःगु पलाः ल्ह्वनेत माग यानादीगु दु ।

कालापानी व लिपुलेक नेपाःया अभिन्न अंग जूगु धासें वय्कलं नेपाःया भूभाग अतिक्रमण थःपिंत स्वीकार्य मजूगु खँ धयादीगु दु । उकथं हे कांग्रेसया भातृ संगठन नेपाल तरुण दलं नं म्हिगः छगू विज्ञप्ति जारी यासें कालापानी व लिपुलेकया बारे सरकारया आधिकारिक धापू वयेमाःगु माग याःगु दु । तरुण दलया अध्यक्ष जितजंग बस्नेतं छगू प्रेस विज्ञप्ति जारी यासें उगु खँ धयादीगु खः ।

विप्लव नं सतकय्
नेपाःया भूभाग भारतया नक्साय् तःगु विरोधय् सरकारं प्रतिबन्ध तयातःगु नेत्रविक्रम चन्द (विप्लव) पुचलं भारतीय प्रधानमन्त्री नरेन्द्र मोदीया पुत्ला च्याकेगु लिसें चरणबद्ध आन्दोलनया घोषणा याःगु दु । म्हिगः पुचःया अध्यक्ष विप्लवं छगू प्रेस विज्ञप्ती जारी यासें आन्दोलनया घोषणा याःगु खः ।

आन्दोलनया झ्वलय् विप्लव पुचलं २१ गते मसाल जुलुस, २२ गते थीथी थासय् कोणसभा, २३ गते भारतीय दूतावासय् ज्ञापन पौ लःल्हायेगु, २४ गते न्हू जारी याःगु भारतीय नक्सा च्याकेगु, २५ गते विरोध सभा, २६ गते भारतीय प्रधानमन्त्री मोदीया पुत्ला च्याकेगु व २७ संयुक्त राष्ट्र संघया नेपाः ज्याकुथीइ विरोध पौ लःल्हाइगु जूगु दु ।

सम्बन्धित बुखँ

LEAVE YOUR COMMENTS