ने. सं. ११४४ कौलाथ्व चौथी -

नेवाः, तामाङ व खशया आन्दोलन

छवाःयंकं जनजागरण अभियान, वयां लिपा सशक्त प्रदर्शन

येँ – नेवाः व तामाङ जातिं न्ह्याकाच्वंगु पहिचानया आन्दोलनय् आः खशान क्षेत्रया खश जाति नं समावेश जू वःगु दु । थ्वहे झ्वलय् आः नेवाः, तामाङ व खश जातिया थीथी संघ संस्था जानाः ‘नेवाः–तामाङसालिङ–खश जागरण अभियान’ सुरु याःगु दु ।म्हीग असनय् कोणसभा यासें थ्व अभियान सुरु याःगु खः । थ्व झ्वलय् आः वइगु १९ गते तक यल, यल, ख्वप, तोखा, सक्व आदि लागाय् नं कोणसभा याना वनेगु ज्याझ्वः तयातःगु दु ।

थ्व ज्याझ्वः नेपाः राष्ट्रिय पार्टी, नेवाः राजनीतिक अभियान, नेपाल सांस्कृतिक पुनर्जागरण अभियान, नेवाः देय् गुथि नेपालमण्डल, नेवाः जागरण मञ्च, सेभ नेपाः भ्याली, खशान राष्ट्रिय संघर्ष समिति, आदिवासी जनजाति पार्टी नेपाल, नेपाल लोकतान्त्रिक पार्टी, खम्बुराम राष्ट्रिय मोर्चा व संघीय लोकतान्त्रिक राष्ट्रिय मञ्च संघीय लिम्बुवान मञ्चया ग्वसालय् न्ह्याकेत्यंगु खः ।

थुपिं ११ गू संस्था जानाः न्ह्याकूगु थ्व आन्दोलनय् थौंकन्हय् स्वनिगलय् विकासया नामय् स्थानीय नेवाःतय् छेँ थुनाः सुकुम्बासी दयेकीगु ज्या, फास्ट ट्राय्कया नामय् जनताया बुँ लाका कायेगु ज्या, नेवाःतय् पुलांगु वस्ती ध्वस्त यानाः उमिगु भाषा, संस्कृति, लिपि व वास्तु समाप्त यायेगु कुतःयात मूल रुपं ल्ह्वनेगु खँ धयातःगु दु ।

लिसें खश समुदाययात आर्य समानुपातिक क्लष्टरपाखें छुटे यानाः आदिवासी धलखय् तये माःगु व खश पहिचान पिलुइ कथं खशान प्रदेश घोषणा यायेत नं उमिसं माग याःगु दु । आः दुगु थीथी प्रदेश मध्ये प्रदेश २ या नामाकरण यायेधुंकाः जक प्रदेश ३ व १ या नामाकरण यायेत नं माग यानातःगु दुसा राज्य पुनर्संरचना आयोगं बिउगु प्रतिवेदन कथं १० प्लस १ राज्य दइ कथं राज्य पुनर्संरचना याये माःगु माग नं याःगु दु ।

टीकापुर घटनाय् दोषी धकाः कुनातःपिं सकलें थारूतय्त तुरुन्त त्वःते माःगु, निर्मला पन्तया हत्यारातय्त ज्वनाः कारवाही यायेमाःगु, देशय् डुबे याइगु अराजक कर नीति खारेज यायेमाःगु, भ्रष्टाचारीतय्त कारवाही यायेमाःगु व थहां वनाच्वंगु बजाः भाः नियन्त्रण याये माःगु माग नं उमिसं याःगु दु ।
आःयात कोणसभाया ज्याझ्वःत यानाः जनजागरण थकायेगु व लिपा कडा ज्याझ्वः यायेगु खँ धाःगु दु ।

आन्दोलनया कोणसभा
१) २०७५ कात्तिक १४ गते असं (११ बजे), कालिमाटी (३ बजे)
२) २०७५ कात्तिक १५ गते चावही (११ बजे), सक्व (३ बजे)
३) २०७५ कात्तिक १६ गते किपू (११ बजे), थानकोट (३ बजे)
४) २०७५ कात्तिक १७ गते लगंख्यः (११ बजे), ख्वना (३ बजे)
५) २०७५ कात्तिक १८ गते थिमि (११ बजे), टौमधि (३ बजे)
६) २०७५ कात्तिक १९ गते तोखा (११ बजे), बालाजु (३ बजे)